នៅថ្ងៃទី២៦ ខែមិថុនា ឆ្នាំ២០២០ ឯកឧត្តម ស៊ុន ចាន់ថុល ទេសរដ្ឋមន្ត្រី និងជារដ្ឋមន្ត្រីក្រសួងសាធារណការ និងដឹកជញ្ជូន រួមជាមួយមន្ត្រីក្រោមឱវាទនាំយកទៀនចំណាំវស្សា និងទេយ្យវត្ថុមួយចំនួន ប្រគេនដល់ព្រះសង្ឃ គង់ក្នុងវត្តចំនួន៧ ក្នុងខេត្តសៀមរាប ដើម្បីជាតម្រូវការ ចាំបាច់របស់ព្រះសង្ឃគ្រប់អង្គ សម្រាប់ស្វាធ្យាយសិក្សារៀនសូត្រព្រះធម៌គម្ពីរក្បួនខ្នាតផ្សេងៗ ក្នុងរដូវចូលវស្សារយៈពេល៣ខែ។
វត្តទាំង៧នោះ រួមមាន វត្តទេពពោធិវង្ស វត្តព្រះព្រហ្មរ័ត្ន វត្តរាជបូណ៌ វត្តអង្គរខាងត្បូង វត្តអង្គរខាងជើង និងវត្តចំនួន២ទៀត នៅលើភ្នំគូលែន គឺ វត្តព្រះក្រាល និងវត្តព្រះអង្គធំ ដោយវត្តនីមួយៗទទួលបានទៀនធំ សម្រាប់ចំណាំព្រះវស្សា ១ គូ បច្ច័យមួយចំនួន រួមជាមួយទេយ្យវត្ថុមានដូចជា៖ សាដក អង្ករ ប្រេងម៉ាស៊ូត៣០លីត្រ មី ទឹកត្រី ទឹកស៊ីអ៊ីវ ត្រីខ អំបិល ស្ករស ទឹកដោះគោ ទឹកបរិសុទ្ធ និងទឹកក្រូច។ ដោយឡែក នៅថ្ងៃដដែលនេះ ឯកឧត្តមទេសរដ្ឋមន្ត្រី ក៏បានអញ្ជើញទៅគោរពនៅទីសក្ការបូជាផ្សេងទៀតផងដែរ រួមមាន ព្រះនាងចេកព្រះនាងចម យាយទេព លោកតារាជ្យ និងលោកតាពេជ្រ។
ឯកឧត្តមទេសរដ្ឋមន្ត្រី ស៊ុន ចាន់ថុល លើកឡើថា ការបូជាធូបទៀន និងថ្វាយផ្កាភ្ញីដល់ព្រះពុទ្ឋរូប គឺដើម្បីឧទ្ទិសបុណ្យកុសលរំលឹកនឹកគុណទៅដល់ មាតាបិតា ញាតិកាទាំងឡាយដែលបានចែកឋានទៅ ដែលមាននៅក្នុងជំនឿព្រះពុទ្ធសាសនា បន្ថែមពីនោះ ក៏បានឯកឧត្តម រំលឹកកគុណ ដល់អតីតវីរយុទ្ឋជនយុទ្ឋនារីកងទ័ព និងប្រជាពលរដ្ឋកម្ពុជាដែលបានពលីជីវិតក្នុងបុព្វហេតុជាតិទាំងអស់ ដើម្បីបុព្វហេតុជាតិមាតុភូមិកម្ពុជា សូមឲ្យ ដួងវិញ្ញាណក្ខ័ន្ធ លោកអ្នកទាំងអស់នោះទៅកាន់ សុគតិភពជារៀងដរាបទៅ។
ព័ត៌មានជាតិ ថ្មីៗ
មានប្រសាសន៍ក្នុងឱកាសប្រគេនទេយ្យវត្ថុនេះដែរ ឯកឧត្តមទេសរដ្ឋមន្ត្រី បញ្ជាក់ថា នៅកម្ពុជាវិស័យពុទ្ឋចក្រនិងអាណាចក្រតែងតែដើរទន្ទឹមគ្នាមិនអាចខ្វះមួយណាបានឡើយ។ វិស័យពុទ្ឋចក្រអាចរីកចម្រើនទៅបាន លុះត្រាតែវិស័យអាណាចក្រមានការរីកចម្រើនផងដែរ។ ហើយ ការរីកចម្រើននេះគឺអាស្រ័យដោយ ប្រទេសជាតិមានសុខសន្តិភាព ពិតប្រាកដ ហេតុនេះ បងប្អូនប្រជាពលរដ្ឋ ត្រូវចេះស្រឡាញ់សន្តិភាពនិងការពារសន្តិភាព ពីព្រោះ សន្តិភាពរកបានដោយលំបាក យើងត្រូវរួមគ្នារក្សាសន្តិភាពនេះឱ្យស្ថិតស្ថេរគង់វង្ស។
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក សេង ផល្លី
