គិតចាប់ពីខែមករា ដល់ខែឧសភាឆ្នាំ២០២០នេះ ការរៃអង្គាសប្រាក់សម្រាប់ទ្រទ្រង់មន្ទីរពេទ្យកុមារអង្គរខេត្តសៀមរាប បានប្រមាណតែ៣០ភាគរយប៉ុណ្ណោះ នៃថវិកាសរុប ដែលបានគ្រោងទុកសម្រាប់ប្រតិបត្តិការប្រចាំឆ្នាំ២០២០ របស់មន្ទីរពេទ្យ នេះបើតាមការលើកឡើងរបស់ អ្នកស្រី ស៊ិនកេត អរុណ ប្រធានការិយាល័យទំនាក់ទំងសាធារណៈប្រចាំប្រទេសកម្ពុជា នៃមន្ទីរពេទ្យកុមារអង្គរខេត្តសៀមរាប ក្នុងឱកាសទទួលមូលនិធិជាង៤ម៉ឺនដុល្លា ពីក្រុមហ៊ុនរ៉ូយអ៊ីនហ្វីនីធីខូលិធីឌី នៅថ្ងៃទី២៩ខែមិថុនាឆ្នាំ២០២០។
អ្នកស្រីបន្តថា អំឡុងវិបត្តិជំងឺកូវីដ១៩ ថវិកា ដែលឧបត្ថម្ភដោយ ម្ចាស់ជំនួយនៅក្រៅស្រុក និងក្នុងស្រុកមានការថយចុះជាលំដាប់។
អ្នកស្រី បញ្ជាក់ថា កាលពីឆ្នាំ២០១៩កន្លងមក ពោលរយៈ៥ខែដូចគ្នានេះ មន្ទីរពេទ្យកុមារអង្គរទទួលថវិកាពីសប្បុរសជនបានប្រមាណ៥០ភាគរយ ដែលធ្វើអោយមន្ទីរពេទ្យត្រូវកាត់បន្ថយការចំណាយថវិកាប្រចាំឆ្នាំជាង៦លាន៥សែនដុល្លាមកត្រឹមជាង៥លាន៩សែនដុល្លាក្នុងមួយឆ្នាំវិញ។ សម្រាប់ឆ្នាំ២០២០នេះ កម្មវិធីរៃអង្គាសថវិកាជាច្រើនរបស់មន្ទីពេទ្យត្រូវបានលុបចោល ដោយសារបំរាមជួបជុំរបស់រាជរដ្ឋាភិបាល ក្នុងការបង្ការការឆ្លងរិករាលដាលនៃជំងឺកូវីដ១៩ ខណៈ អ្នកជំងឺជាកុមារតូចៗ នៅសម្រាកព្យាបាលនៅមន្ទីរពេទ្យមិនគិតកម្រៃសេវាមួយនេះ មានការកើនឡើងជាបន្តបន្ទាប់។
ប្រធានការិយាល័យទំនាក់ទំងសាធារណៈប្រចាំប្រទេសកម្ពុជា រូបនេះ មានការព្រួយបារម្ភ ពីកង្វះថវិកានៅឆ្នាំក្រោយទៀត បើសិនវិបត្តិនៃជំងឺកូវីដ១៩ នៅតែបន្ដបន្លាយជាសកលបន្ដទៀត ព្រោះម្ចាស់ជំនួយដល់មន្ទីរពេទ្យកុមារអង្គរភាគច្រើនជាសប្បុរសជននៅក្រៅប្រទេស។
បើតាមតំណាងមន្ទីរពេទ្យកុមារអង្គរ លើកឡើងថា បើទោះបីបាត់បង់ការរៃអង្គាសប្រាក់ពីកម្មវិធីផ្សេងៗក្ដីមានការអាក់ខាន ប៉ុន្តែក្រុមការងារនៃមន្ទីរពេទ្យកុមារអង្គរ បាននិងកំពុងស្វែងរកការរៃអង្គាសនៅតាមអនឡាញបន្ថែម ដើម្បីជួយទ្រទ្រង់ដល់មន្ទីរពេទ្យកុមារក្នុងខេត្តសៀមរាបមួយនេះ។ ជាក់ស្ដែង ក្រុមហ៊ុនរ៉ូយអ៊ីនហ្វីនីធីខូលិធីឌី បានរៀបចំកម្មវិធីរៃអង្គាស តាមរយៈការផ្សាយផ្ទាល់ អំពាវនាវនៅលើបណ្ដាយសង្គមហ្វេសប៊ុក មេរ៉ូយ ឃ្វីន អោវ យូនីវើស (MaeRouy Queen of Universe) កាលពីថ្ងៃទី១៣ ខែមិថុនា ឆ្នាំ២០២០ ដើម្បីប្រមូលយកនូវថវិកា មកជួយទ្រទ្រង់មន្ទីរពេទ្យ ក្នុងកាលៈទេសៈដ៏លំបាកនេះ។
សូមជម្រាបថា មន្ទីរពេទ្យកុមារអង្គរគឺជាអង្គភាពមិនស្វែងរកប្រាក់ចំណេញ ដែលមានបេសកកម្មលើកកម្ពស់សុខុមាលភាពកុមារកម្ពុជាគ្រប់រូប។ មន្ទីរពេទ្យកុមារអង្គរបានផ្តល់នូវការយកចិត្តទុកដាក់ក្នុងការពិនិត្យព្យាបាល និងថែទាំសុខភាពដល់កុមារកម្ពុជា ប្រកបដោយក្តីមេត្តាករុណា អស់រយៈពេលជាង២០ឆ្នាំ ចាប់តាំងពីឆ្នាំ ១៩៩៩ រហូតដល់បច្ចុប្បន្ននេះ ដែលត្រូវចំណាយជាង៦លានដុល្លាក្នុងមួយឆ្នាំ៕
អត្ថបទ និង រូបថត ៖ លោក បូ សាវី
កែសម្រួលអត្ថបទ ៖ លោក សេង ផល្លី
