ខណៈវិបត្តិជំងឺកូវីដ១៩ នៅតែបង្កហានិភ័យដល់អាយុជីវិតមនុស្ស ការធ្វើដំណើរពីប្រទេសមួយទៅប្រទេសមួយ តាមមធ្យោបាយធ្វើដំណើរផ្សេងៗ មានការរឹតបណ្តឹង ក្នុងនោះវិស័យទេសចរណ៍ ក៏ទទួលរងនូវផលប៉ះពាល់យ៉ាងខ្លាំងផងដែរ។
ក្នុងឱកាសចុះពិនិត្យ ជីវភាពរស់នៅរបស់ប្រជាពលរដ្ឋក្នុងស្រុកបន្ទាយស្រី កាលពីថ្ងទី២៥ ខែមិថុនាឆ្នាំ២០២០ ឯកឧត្តម ទៀ សីហា អភិបាលខេត្តសៀមរាប មានប្រសាសន៍ថា ទោះបីប្រជាពលរដ្ឋក្នុងខេត្ត ពុំទទួលបាន ចំណូលពីវិស័យទេសចរណ៍ ក្នុងពេលជួបនូវវិបត្តិជំងឺកូវីដ១៩ក៏ពិតមែន ប៉ុន្តែប្រជាពលរដ្ឋក្នុងខេត្ត គួរងាកមកបង្កើនការដាំដុះ និងចិញ្ចឹមសត្វ ដើម្បីបំពេញតម្រូវការក្រុមគ្រួសារ និងទីផ្សារក្នុងស្រុក។
ឯកឧត្តមអភិបាលខេត្ត បានក្រើនរំលឹកដល់ប្រជាកសិករផងដែរថា ដើម្បីឲ្យកសិផល ទទួលបានទិន្នផលខ្ពស់ ចាំបាច់ត្រូវគោរពទៅតាមបច្ចេកទេស របស់មន្ត្រីជំនាញបច្ចេកទេសកសិកម្មបានណែនាំ គួរចៀសវាងការប្រើប្រាស់ជីគីមី តាមទម្លាប់ ដែលបង្កឲ្យដីឆាប់រិចរឹល។
ព័ត៌មានជាតិ ថ្មីៗ
ទន្ទឹមនោះ ឯកឧត្តម ក៏បានណែនាំ ដល់លោកប្រធានមន្ទីរពាណិជ្ជកម្មខេត្ត ឲ្យត្រូវយកចិត្តទុកដាក់ខ្ពស់ ក្នុងការរកទីផ្សារជូនដល់ប្រជាកសិករ នៅពេលពួកគាត់ប្រមូលផល។
ដោយឡែក នៅថ្ងៃដដែលនោះ ឯកឧត្តមអភិបាលខេត្ត ក៏បានអញ្ជើញទៅ ពិនិត្យមើលសកម្មភាពរបស់ប្រជាសហគមធ្វើនំបញ្ចុកប្រកបដោយភាពអនាម័យ ស្ថិតក្នុងឃុំព្រះដាក់ ក្នុងស្រុកបន្ទាយស្រី ដែលជារបរក្រៅពីការធ្វើស្រែចម្ការ។ ឯកឧត្តម បានបង្ហាញពីការគាំទ្រដល់ ប្រជាពលរដ្ឋក្នុងមូលដ្ឋាន ខិតខំកែប្រែជីវភាព តាមរយៈចំណេះជំនាញ ដែលបុព្វបុរសបានបន្សល់ទុក និងខិតខំកែច្នៃបន្ថែមទៀត ដើម្បីឲ្យចំណេះទាំងនោះរឹតមានការពេញនិយមនាពេលអនាគត។
អត្ថបទ និង រូបថត ៖ លោក បូ សាវី
កែសម្រួលអត្ថបទ ៖ លោក សេង ផល្លី
