នៅព្រឹកថ្ងៃទី០២ ខែកក្កដា ឆ្នាំ២០២០នេះ ក្រសួងសាធារណការ និងដឹកជញ្ជូន បានណែនាំដល់អង្គភាពក្រោមឱវាទត្រូវបន្តអនុវត្តន៍ ការផ្ទេរកម្មសិទ្ធិយានយន្ត ដែលរកម្ចាស់ដើមមិនឃើញជូនប្រជាពលរដ្ឋ ចាប់ពីថ្ងៃទី០១ ខែកក្កដា រហូតដល់ថ្ងៃទី៣០ខែកញ្ញា ឆ្នាំ២០២០
លោក ប៉ែន សូនី ប្រធានការិយាល័យដឹកជញ្ជូនផ្លូវគោក នៃមន្ទីរសាធារណការ និងដឹកជញ្ជូនខេត្តសៀមរាប បង្ហាញថា ដោយមើលឃើញពីឆន្ទៈប្រជាពលរដ្ឋក្នុងខេត្តសៀមរាប ចូលរួមជាមួយរាជរដ្ឋាភិបាល ក្នុងការគ្រប់គ្រង់យានយន្តគ្រប់ប្រភេទនៅកម្ពុជា ក្រសួងសាធារណការ និងដឹកជញ្ជូន បានណែនាំដល់មន្ទីរសាធារណការ និងដឹកជញ្ជូន រាជធានីខេត្តទាំងអស់ត្រូវ ផ្ទេរកម្មសិទ្ធិដោយរកម្ចាស់ដើមមិនឃើញរហូតដល់ខែកញ្ញា តាំងពីថ្ងៃទី០១ ខែកក្កដាម្សិលមិញមកម្ល៉េះ។ ជាមួយនោះ មន្ទីរសាធារណការ និងដឹកជញ្ជូនខេត្តសៀមរាប ក៏បានណែនាំដល់មន្ត្រីផ្ដល់សេវាក្រោមឱវាទ ត្រូវបន្តផ្ដល់សេវា ទោះបីពុំទាន់មានលិខិតមកជាផ្លូវការក៏ដោយ។
តាមការឲ្យដឹងពី លោក អាង រ៉ាស៊ី ប្រធានការិយាល័យសេវាអ្នកជាប់ពន្ធ នៃសាខាពន្ធដារខេត្តសៀមរាប បង្ហាញថាការបង់ពន្ធប្រថាប់ត្រា លើការផ្ទេរកម្មសិទ្ធិយានយន្តដោយរកម្ចាស់ដើមមិនឃើញ នៅតែបន្ត ស្របតាមសេចក្ដីជូនដំណឹងរបស់ក្រសួងសាធារណការ និងដឹកជញ្ជូន។
តាមការបញ្ជាក់របស់លោក គិតត្រឹមរយៈពេលពេញមួយខែមិថុនា សាខាពន្ធដារខេត្តសៀមរាប ទទួលបានថវិកាពន្ធប្រមាណ២៦០លានរៀល នៃការបង់ពន្ធប្រថាប់ត្រា ការផ្ទេរកម្មសិទ្ធិយានយន្ត។
អត្ថបទ និងរូបភាព៖ សេង ផល្លី
