កាលពីថ្ងៃទី០៩ ខែកក្កដា ឆ្នាំ២០២០ បុណ្យរុក្ខទិវាថ្នាក់ខេត្ត ក្រោមប្រធានបទ “ស្តារគម្របបៃតងឡើងវិញ” រៀបចំនៅក្នុងស្ថានីយស្តារ និងអភិវឌ្ឍន៍ព្រៃឈើ ស្ថិតក្នុងភូមិត្រពាំងថ្ម ឃុំឃុនរាម ស្រុកបន្ទាយស្រី ខេត្តសៀមរាប ក្រោមអធិបតីភាព ឯកឧត្តម ណៅ ធួក រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ ឯកឧត្តម កុយ សង សមាជិកក្រុមប្រឹក្សាខេត្ត លោក ង៉ាន់ ភិរុណ អភិបាលរងខេត្ត និងមានការចូលរួមពី សមាជិកសមាជិកាក្រុមប្រឹក្សាខេត្ត ថ្នាក់ដឹកនាំ មន្ទីរអង្គភាព ស្ថាប័ន អង្គការដៃគូ កងកម្លាំងប្រដាប់អាវុធ អាជ្ញាធរមូលដ្ឋាន យុវជន សិស្សានុសិស្ស លោកគ្រូអ្នកគ្រូ ព្រមទាំងប្រជាពលរដ្ឋជាច្រើនរូប។
តាមរបាយការណ៍ របស់លោក ទា គឹម សុទ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប ក្នុងពិធីនោះ បង្ហាញថា នៅឆ្នាំ២០១៩ស្ថានីយស្តារ និងអភិវឌ្ឍព្រៃឈើនេះ ត្រូវភ្លើងឆេះទាំងស្រុង ដោយសារជនខិលខូច ដូច្នេះនៅឆ្នាំ២០២០នេះ មន្ទីរបាន រៀបចំផ្ទៃដីចំនួន២៥ហិកតា ចែកចេញជាឡូតិ៍នីមួយៗ មានផ្ទៃដីមួយហិកតា សម្រាប់ដាំឈើចំនួន៦២៥ដើម ក្នុងនោះមានកូនឈើចម្រុះ៨ប្រភេទ ដូចកកោះ បេង ធ្នុង ក្រញូង ឈើទាល គគីរ ផ្តៀក និងរំដួល ដែលសុទ្ឋតែជាប្រភេទឈើប្រណីត និងមានតម្លៃ ដើម្បីបម្រើឱ្យសេចក្តីត្រូវការខាងសេដ្ឋកិច្ច បរិស្ថាន ការស្រាវជ្រាវវិទ្យាសាស្ត្រ និងទេសចរលម្ហែកម្សាន្ត។
ថ្លែងក្នុងឱកាសនោះ ឯកឧត្តម រដ្ឋលេខាធិការក្រសួង កសិកម្ម រុក្ខាប្រមាញ់ និងនេសាទ បង្ហាញថា៖ការដាំកូនឈើ ក្រោម ប្រធានបទ “ស្តារគម្របបៃតងឡើងវិញ”នាពេលនេះ នឹងរួមចំណែកក្នុងការបង្កើនគម្របបៃតងឡើងវិញ ក្នុងទិសស្លោក “ដំណើរការ – ព្រៃឈើ គឺជាជីវិត” ក្នុងន័យជួយថែ ប្រព័ន្ធអេកូឡូស៊ីតាមរយៈការថែរក្សាលំនឹងបរិស្ថានធម្មជាតិ ធ្វើឱ្យអាកាសធាតុ មានភាពល្អបរិសុទ្ធ និយ័តភាពប្រភពទឹក ការពារទីជម្រាល និងការពារជីវចម្រុះជាដើម។ លើសពីនេះ ទិវានេះ ក៏ជាចលនាអប់រំ និងបំផុសស្មារតីប្រជាពលរដ្ឋគ្រប់ស្រទាប់វណ្ណៈ បានយល់ដឹងពីសារប្រយោជន៍នៃព្រៃឈើផងដែរ។
ឯកឧត្តម បញ្ជាក់ផងដែរថា៖ បុណ្យរុក្ខទិវានេះ គឺជាការដង្ហែតាមព្រះរាជតម្រិះដ៏ខ្ពង់ខ្ពស់របស់ ព្រះករុណា ព្រះបាទសម្តេច ព្រះនរោត្តម សីហនុ ព្រះបរមរតនកោដ្ឋ ជាទីគោរពសក្ការៈដ៏ខ្ពង់ខ្ពស់ ដែលព្រះអង្គតែងតែយកព្រះទ័យទុកដាក់ដល់បញ្ហា ព្រៃឈើ និងការដាំដើមឈើជាអាទិភាពចំបង ។ លើសពីនេះទៀត បុណ្យរុក្ខទិវា គឺបានឆ្លុះបញ្ចាំងឱ្យឃើញ ពីការខិតខំប្រឹងប្រែងយ៉ាងសកម្មរបស់រាជរដ្ឋាភិបាល ក្នុងការគ្រប់គ្រង ការអភិរក្សធនធានព្រៃឈើ គឺជាគោលដៅអាទិភាពខ្ពស់ និងចក្ខុវិស័យវែងឆ្ងាយ ប្រកបដោយនិរន្តរភាពដើម្បី អភិរក្ស និងគ្រប់គ្រងធនធានធម្មជាតិ ជីវចំរុះ និងប្រព័ន្ធអេកូឡូស៊ីប្រកបដោយប្រសិទ្ធភាព ដែលទាំងអស់នេះ ពិតជាបានរួមចំណែកក្នុងការកាត់បន្ថយភាពក្រីក្ររបស់ប្រជាជន និងការអភិវឌ្ឍសេដ្ឋកិច្ចសង្គមឱ្យបានប្រសើរឡើងជាបន្តបន្ទាប់។
ក្នុងឱកាសនោះ លោក ង៉ាន់ ភិរុណ អភិបាលរងខេត្តសៀមរាប ក៏បានអំពាវនាវ ដល់ប្រជាពលរដ្ឋគ្រប់រូប សូមបញ្ឈប់ជាបន្ទាន់ ការកាប់ និងដុតបំផ្លាញដីព្រៃ ដើម្បីទន្រ្ទានយកដីធ្វើជាកម្មសិទ្ធខុសច្បាប់ ព្រោះទង្វើទាំងនេះ ជាបទល្មើសដ៏ធ្ងន់ធ្ងរបំផុត ដែលមិនអាចអត់ឱនឱ្យបាន ជាពិសេសវាបង្កគ្រោះមហន្តរាយដល់បរិស្ថានធម្មជាតិ ជីវិត មនុស្ស សត្វនាពេលអនាគតដ៏ខ្លីខាងមុខ ប្រសិនបើគ្មានការទប់ស្កាត់ ការពារទេនោះ។
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក សេង ផល្លី
