នៅព្រឹកថ្ងៃទី០៩ ខែកក្កដា ឆ្នាំ២០២០ លោកជំទាវ ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាលកម្ពុជា និងលោកជំទាវ លី អាយឡេន (Li Ailan) ប្រធានអង្គការសុខភាពពិភពលោក ហៅកាត់ថា WHO ប្រចាំនៅកម្ពុជា បានកោតសរសើរដល់រដ្ឋបាលខេត្តសៀមរាប ក្នុងការប្រយុទ្ធប្រឆាំងការរីករាលដាលជំងឺកូវីដ១៩ ប្រកបដោយប្រសិទ្ធភាពនាពេលកន្លងមក រហូតមកដល់បច្ចុប្បន្ន។
លោកជំទាវ ឱ វណ្ណឌីន លើកឡើងថា នាពេលកន្លងមក បន្ទាប់ពីរកឃើញអ្នកមានផ្ទុកមេរោគកូវីដ១៩ ក្នុងខេត្តសៀមរាប ជាបន្តបន្ទាប់ អាជ្ញាធរខេត្ត ក៏ដូចជាលោកប្រធានមន្ទីរសុខាភិបាលខេត្ត បានធ្វើការយ៉ាងជិតស្និតជាមួយក្រសួងសុខាភិបាល មិនគិតឈប់សម្រាក ឬយប់ថ្ងៃឡើយ ព្រមទាំងបានរៀបចំធ្វើការផ្សព្វផ្សាយអំពីគ្រោះថ្នាក់ និងវិធីការពារបានយ៉ាងទូលំទូលាយ។ ការខិតខំប្រឹងប្រែងទាំងនេះ បានធ្វើឲ្យខេត្តសៀមរាបទទួលបានលទ្ធផលល្អប្រសើរក្នុងការទប់ស្កាត់ការឆ្លងរីករាលដាលនៃមេរោគកូវីដ១៩ នៅទូទាំងខេត្ត។
តែទោះជាយ៉ាងណាក៏ដោយ លោកជំទាវ ក៏បានណែនាំដល់រដ្ឋបាល ត្រូវតែបន្តពង្រឹងវិធានការការពារការចម្លងមេរោគកូវីដ១៩ ឲ្យបានមធ្យ័ត ក្នុងនោះគោលការណ៍ ហ្វាយអ៊ី (5E) ដែលមានន័យជាភាសាខ្មែរថា៖
១. ស្រាវជ្រាវរកអ្នកផ្ទុកមេរោគកូវីដ១៩ ឲ្យបានលឿនបំផុត ២. បើរកឃើញអ្នកមានផ្ទុកហើយ ត្រូវប្រញាប់បន្តស្រាវជ្រាវរកអ្នកប៉ះពាល់ផ្ទាល់ និងប្រយោល ៣. បើសិនរកឃើញហើយ ត្រូវប្រញាប់យកពួកគាត់មកដាក់ដោយឡែក ៤. នៅពេលយកមកដាក់ដោយឡែក ត្រូវប្រញាប់ធ្វើការព្យាបាល និង៥. ត្រូវធ្វើការបង្ការ និងការពារ ឲ្យមានប្រសិទ្ធភាព និងឆាប់រហ័ស។
ព័ត៌មានជាតិ ថ្មីៗ
លោកជំទាវ ប្រធានអង្គការWHO ប្រចាំនៅកម្ពុជា បង្ហាញថា លោកជំទាវ នឹងនៅតែបន្តគាំទ្រ និងធ្វើការជាមួយក្រសួងជំនាញនានា និងឯកឧត្តម លោកជំទាវអភិបាលខេត្តនៅទូទាំងប្រទេស ដើម្បីសម្រេចការងារប្រយុទ្ធប្រឆាំងការរីករាលដាលនៃជំងឺកូវីដ១៩នេះ។ ក្នុងនោះ មូនិធិ Trust Fund របស់អង្គការសហប្រជាជាតិ នឹងផ្ដល់ថវិកា១លានដុល្លារអាមេរិច ជួយដល់ខេត្តចំនួន៣ របស់កម្ពុជា ក្នុងនោះមានខេត្តសៀមរាបមួយផងដែរ ដើម្បីកាត់បន្ថយផលប៉ះពាល់ទាក់ទងទៅនឹងសុខភាព និងសេដ្ឋកិច្ច បណ្ដាលមកពីជំងឺកូវីដ១៩។
ថ្លែងនៅក្នុងជំនួបពិភាក្សានោះ ឯកឧត្តម ទៀ សីហា អភិបាលខេត្តសៀមរាប បានបង្ហាញ ពីស្មារតីប្រុងប្រយ័ត្នរបស់អាជ្ញាធរខេត្ត ស្របតាមសេចក្ដីណែនាំរបស់រាជរដ្ឋាភិបាល ជាពិសេសការត្រួតពិនិត្យអ្នកដំណើរនៅតាមព្រលានយន្តហោះ ចាប់ពីយន្តហោះបានចុះចត និងធ្វើការដាក់ដោយឡែក សម្រាប់ប្រជាពលរដ្ឋ ដែលទើបត្រឡប់មកពីបរទេស ដោយមានការទៅទទួល និងដឹកជញ្ជូនពីច្រកព្រំដែនអន្តរជាតិកម្ពុជា-ថៃ។
ឯកឧត្តមអភិបាលខេត្ត ក៏បានថ្លែងអំណរគុណដល់ក្រសួងសុខាភិបាល និងប្រធានអង្គការWHO ប្រចាំនៅកម្ពុជា ដែលបានផ្ដល់នូវអនុសាសន៍ល្អៗ និងការគាំទ្រ ចំពោះរដ្ឋបាលខេត្ត ដើម្បីធ្វើឲ្យខេត្តទេសចរណ៍មួយនេះ វិលត្រឡប់ទៅរកភាពល្អប្រសើរ បន្ទាប់ពីជំងឺកូវីដ១៩ មានភាពធូរស្រាល ឬបញ្ចប់នាពេលអនាគត។
អត្ថបទ និង រូបថត ៖ លោក សេង ផល្លី
