កូនឈើចម្រុះចំនួនជាង២.០០០ដើម ត្រូវបានដាំលើផ្ទៃដីចំនួនជាង២ហិកតា នៅឧទ្យានជាតិព្រះជ័យវរ្ម័នភ្នំគូលែន ស្ថិតនៅភូមិតាពេញ ឃុំខ្នងភ្នំ ស្រុកស្វាយលើ ខេត្តសៀមរាប កាលពីព្រឹកថ្ងៃទី១០ ខែកក្កដា ឆ្នាំ២០២០នេះ ដែលរៀបចំឡើងដោយមន្ទីរបរិស្ថានខេត្តសៀមរាប ដើម្បីស្តារគម្របបៃតង និងគម្របព្រៃឈើឡើងវិញឲ្យមានភាពបៃតង និងរក្សាបាននូវប្រភពទឹកក្រោមដី សម្រាប់ទ្រងទ្រង់គ្រឹះប្រាសាទនានានៅក្នុងខេត្តសៀមរាប ក្រោមអធិបតីភាពឯកឧត្តម សៅ សុភាព រដ្ឋលេខាធិការក្រសួងបរិស្ថាន , ឯកឧត្តម អ៊ឹង ហឿន ប្រធានក្រុមប្រឹក្សាខេត្ត និងលោកពិន ប្រាកដ អភិបាលរងខេត្ត តំណាងឯកឧត្ដម ទៀ សីហា អភិបាលខេត្តសៀមរាប ដោយមានការចូលរួមពីសំណាក់ឯកឧត្ដម លោកជំទាវ លោក លោកស្រី ជាសមាជិកសមាជិកាក្រុមប្រឹក្សាខេត្ត ថ្នាក់ដឹកនាំ មន្ទីរអង្គភាព ស្ថាប័ន អង្គការដៃគូ កងកម្លាំងប្រដាប់អាវុធ អាជ្ញាធរមូលដ្ឋាន ក្រុមយុវជនស្ម័គ្រចិត្ត លោកគ្រូអ្នកគ្រូ សិស្សានុសិស្ស និង ប្រជាពលរដ្ឋជាច្រើនរូបទៀត ។
លោក ស៊ុន គង់ ប្រធានមន្ទីរបរិស្ថានខេត្តសៀមរាបមានប្រសាន៍ថា ឧទ្យានជាតិ ព្រះជ័យវរ្ម័នភ្នំគូលេន ត្រូវបានបង្កើតឡើងដោយ ព្រះរាជក្រិត្យចុះថ្ងៃទី០១ ខែវិច្ចិកា ឆ្នាំ២៩៩៨ ដែលមានផ្ទៃក្រឡា ៣៧៥០០ហិតា ដែលស្ថិតនៅក្នុងស្រុកចំនួន០៤ គឺស្រុកស្វាយលើ ស្រុកបន្ទាយស្រី ស្រុកវ៉ារិន និងស្រុកសូទ្រនិគម ហើយបច្ចុបន្ននេះ មន្ទីរបាននិងកំពុង អនុវត្តន៍ការងារចំបងៗ ដែលបានកំណត់ដោយក្រសួងបរិស្ថានផងដែរ។
លោក ពិន ប្រាកដ អភិបាលរងខេត្តសៀមរាប បានមានប្រសាសន៍ថា ការដាំដើមឈើឡើងវិញនេះ ពិតជាមានសារៈប្រយោជន៍ សម្រាប់បំផុសស្មារតីប្រជាពលរដ្ឋយើងឲ្យចេះស្រឡាញ់ព្រៃឈើ និងចូលរួមដាំដើមឈើឡើងវិញ និងចូលរួមទប់ស្កាត់ការប្រែប្រួលអាកាសធាតុ ដូច្នេះតាមរយៈនៃការដាំកូនឈើនៅថ្ងៃនេះ និងការចូលរួមយ៉ាងច្រើនកុះករ បានឆ្លុះបញ្ចាំងនូវការភ្ញាក់រលឹករបស់សហគមន៍យើងទាំងមូល ក្នុងការប្រឈមមុខដោះស្រាយចំពោះការបាត់បង់ព្រៃឈើ និងជាស្មារតីម្ចាស់ការក្នុងការទទួលខុសត្រូវលើការគ្រប់គ្រងធនធានធម្មជាតិ អនាគតភូមិ ឃុំ និងជាជោគវាសនានៃមាតុភូមិយើង ជាពិសេសសម្រាប់កូនចៅជំនាន់ក្រោយ ដើម្បីឱ្យខេត្តសៀមរាបរបស់យើងរក្សាបាននូវគម្របបៃតងស្រស់ ព្រោះព្រៃឈើវាមានតួនាទីយ៉ាងសំខាន់ក្នុងការជួយថែរក្សាលំនឹងនៃការប្រែប្រួលអាកាសធាតុ និងបរិស្ថានធម្មជាតិ តាមរយៈការជួយធ្វើនិយ័តកម្មអាកាសធាតុ ជួយកាត់បន្ថយឥទ្ធិពលអវិជ្ជមាននៃការប្រែប្រួលអាកាសធាតុ និងទប់ទល់នឹងគ្រោះរាំងស្ងួត ទឹកជំនន់ ខ្យល់ព្យុះ ។ល។
ឯកឧត្តម សៅ សុភាព រដ្ឋលេខាធិការក្រសួងបរិស្ថាន បានលើកឡើងថា ការដាំកូនឈើឡើងវិញនៅក្នុង ឧទ្យានជាតិ ព្រះជ័យវរ្ម័ននេះ គឺជាការគិតគូរបស់ក្រសួងអំពីនិរន្តភាពបរិស្ថាននិងសេវាកម្ម អេកូឡូស៊ីជាពិសេសគឺស្ថានភាពទឹក ខណៈបច្ចុប្បន្ននេះ ស្ថានភាពទឹកក្រោមដីមានការប្រែប្រួលច្រើន ដោយបរិមាណទឹក មានការថយចុះ ឬរីងហួតមុនកាលកំណត់ ធ្វើឲ្យប៉ះពាល់ដល់វិស័យកសិកម្ម និងកង្វះខាតទឹកប្រើប្រាស់ប្រចាំថ្ងៃ ដែលប្រជាពលរដ្ឋបានលើកឡើងពីបញ្ហាប្រឈមទាំងនោះ ជាពិសេសព្រៃឈើ ក៏ផ្តល់នូវសេវាកម្មគាំពារបរិស្ថានជាច្រើនទៀត ដូចជាការការពារទីជម្រាល ការទប់ស្កាត់ការហូរច្រោះដី ការធ្វើឱ្យប្រសើរឡើងនៃគុណភាពដី និងផ្តល់នូវ ផល-អនុផលព្រៃឈើជាច្រើនអនេកដល់ប្រជាពលរដ្ឋ ជាពិសេសរួមចំណែកដល់ការកាត់បន្ថយភាពក្រីក្ររបស់សហគមន៍នៅជនបទផងដែរ ៕
អត្ថបទ និង រូបថត ៖ លោក ស៊ាន សុផាត
កែសម្រួលអត្ថបទ ៖ លោក លីវ សាន្ត
