ក្នុងឱកាសជួបប្រជុំបូកសរុបលទ្ធផលការងារឆមាសទី១ និងលើកទិសដៅអនុវត្តបន្តសម្រាប់ឆមាសទី២ ឆ្នាំ២០២០ ក្រុមការងាររាជរដ្ឋាភិបាលចុះមូលដ្ឋានស្រុកក្រឡាញ់ កាលពីព្រឹកថ្ងៃទី១០ ខែកក្កដា ឆ្នាំ២០២០នេះ ឯកឧត្តម ជា ច័ន្ទបរិបូរណ៍ ប្រធានក្រុមការងាររបស់រាជរដ្ឋាភិបាលចុះមូលដ្ឋានស្រុកក្រឡាញ់ បានបញ្ជាក់ថា បញ្ហាជំងឺកូវីដ១៩ គឺជាវិញ្ញាសារដ៏ស្មុគស្មាញរបស់ពិភពលោក ដែលក្រៅតែពីការព្រួយបារម្ភចំពោះការរីករាលដាលនៃជំងឺនេះ វាបានប៉ះពាល់ទៅលើសុខភាពសាធារណៈ សង្គម និងសេដ្ឋកិច្ច ទោះតិចឬច្រើន គឺពុំមានប្រទេសណាមួយអាចចៀសផុតបាននោះឡើយ ហើយសម្រាប់កម្ពុជា បើទោះជាមានត្រឹមតែករណីចម្លងនាំចូល គ្មានមនុស្សស្លាប់ និងពុំមានរលកទី២ឆ្លងចូលក្នុងសហគមន៍យ៉ាងណាក៏ដោយ ប៉ុន្តែសម្រាប់ស្ថានភាពបច្ចុប្បន្ននេះ រាជរដ្ឋាភិបាលកំពុងយកចិត្តទុកដាក់បន្តការទប់ស្កាត់ ដោយការអប់រំប្រើប្រាស់វិធានការណែនាំរបស់ក្រសួងសុខាភិបាល និងកំពុងប្រើប្រាស់គោលនយោបាយជំនួយសង្គម ដោយការបញ្ចេញសាច់ប្រាក់ ឧបត្ថម្ភដល់ប្រជាពលរដ្ឋក្រីក្រ ផងដែរ។
ឯកឧត្តម មានប្រសាសន៍បន្ថែមថា ដើម្បីអនុវត្តគោលនយោបាយជំនួយសង្គមប្រកបដោយប្រសិទ្ធភាពជាវិជ្ជមាន និងរលូនតាមការចង់បានរបស់រាជរដ្ឋាភិបាល ការធ្វើអត្តសញ្ញាណកម្មជនក្រីក្រ គឺជាកត្តាចំបងចាំបាច់បំផុត ដែលត្រូវតែឈរលើគោលការណ៍តម្លាភាព ច្បាស់លាស់ និងត្រឹមត្រូវ គ្មានការឃុបឃិត ចៀសវាងឲ្យបានភាពមិនប្រក្រតី បើទោះជាស្ថិតក្នុងបំណងចេតនាក្តី ឬ អចេតនាក្តី ព្រោះថា រាជរដ្ឋាភិបាលបានប្រើប្រាស់គោលនយោបាយជំនួយសង្គមនេះ ដើម្បីសម្រាលការលំបាករបស់ប្រជាពលរដ្ឋក្នុងវិបត្តិកូវីដ១៩ ឲ្យបានចូលដល់គោលដៅពិតប្រាកដ ខណៈដែលសម្តេចតេជោ ហ៊ុន សែន ប្រមុខនៃរាជរដ្ឋាភិបាលកម្ពុជា បានចេញការព្រមានរួចហើយ ចំពោះមន្រ្តីជំនាញ និងអាជ្ញាធរដែនដីដែលពាក់ព័ន្ធថា ពិតជាមិនមានការអត់ឱននោះទេ បើសិនជាមានមន្រ្តីណាមួយ បានប្រព្រឹត្តិអំពើពុករលួយនៅក្នុងកិច្ចការសំខាន់នេះ ។
ជាមួយគ្នានេះដែរឯកឧត្តម ជា ច័ន្ទបរិបូរណ៍ បានណែនាំដល់សមាជិកនៃក្រុមការងារទាំងអស់ ក្រៅពីការងារធ្វើអត្តសញ្ញាណកម្មក្រីក្រ ឲ្យមានតម្លាភាពនោះ ត្រូវបង្កើតគំនិត និង ប្រមូលមូលនិធិ ផ្តល់លទ្ធភាពឲ្យជនក្រីក្រទាំងនោះ កែប្រែជីវភាពរបស់ខ្លួន តាមរយៈនៃការចិញ្ចឹមសត្វ ជាពិសេសសត្វកង្កែប ដែលកំពុងមានតម្រូវការលើទីផ្សារ ហើយជាមុខរបរមិនប្រើដើមទុនច្រើន និងប្រើប្រាស់ពេលវេលាខ្លី សម្រាប់ការប្រមូលផល ដូច្នេះជាសក្ខីភាព ឯកឧត្តម និងលោកជំទាវ សូមឧបត្ថម្ភថវិកាចំនួន ១លានរៀល សម្រាប់ដំណើរការពិសោធន៍ការងារនេះជាជំហានដំបូង ចំនួន៥គ្រួសារ តាមរយៈនៃគ្រួសារបង្គោល ដែលមានបទពិសោធន៍លើការងារចិញ្ចឹមកង្កែបនេះ ៕
អត្ថបទ និង រូបថត ៖ លោក ងិន គឹមឡេង និង លោក យូ វង្ស
កែសម្រួលអត្ថបទ ៖ លោក លីវ សាន្ត
