នៅព្រឹកថ្ងៃទី១០ ខែកក្កដា ឆ្នាំ២០២០ នាសាលាខេត្តសៀមរាប ឯកឧត្តម ទៀ សីហា អភិបាលខេត្តសៀមរាប បានជួបពិភាក្សាជាមួយ លោកជំទាវ អ៊ីវ៉ា ង្វៀន ប៊ិញ (Eva Nguyen Binh) ឯកអគ្គរដ្ឋទូតបារាំង ប្រចាំនៅកម្ពុជា លើគម្រោងចំនួន ២ គឺគម្រោងស្ដារវិស័យទេសចរណ៍ និងប្រព័ន្ធធារាសាស្ត្រ ក្នុងខេត្តសៀមរាប ដើម្បីលើកកម្ពស់ជីវភាពនិងសុខុមាលភាពប្រជាពលរដ្ឋក្នុងខេត្ត។
លោកជំទាវឯកអគ្គរដ្ឋទូត បង្ហាញថា គម្រោងពុយទីហ្វូ គឺជាការស្ដារវិស័យទេសចរណ៍ក្នុងខេត្តសៀមរាប ឲ្យកាន់តែមានទាក់ទាញលើឆាកអន្តរជាតិ ដែលគម្រោងនេះ ជួបពិភាក្សាម្ដងរួចមក កាលពីថ្ងៃទី២០ ខែឧសភាថ្មីៗនេះ រវាងលោក ង៉ាន់ ភិរុណ អភិបាលរងខេត្ត និងម្ចាស់គម្រោង ដើម្បីសិក្សាពីលទ្ធភាព និងធ្វើការសន្និដ្ឋាននាពេលឆាប់នេះ។
ដោយឡែកគម្រោងមួយទៀត ជាគម្រោងលើប្រព័ន្ធធារាសាស្រ្ត មានឈ្មោះថា “សៀមរាបទឹកសម្រាប់ទាំងអស់គ្នា” ដែលមានទីតាំងក្នុងស្រុកពួក និងគាំទ្រដោយ ទីភា្នក់ងារបារាំង សម្រាប់ការអភិវឌ្ឍ (AFD)។ គម្រោងនេះ នឹងគ្រប់គ្រងលើធនធានទឹកចម្រុះ សម្រាប់ប្រជាពលរដ្ឋក្នុងខេត្តសៀមរាប មានទឹកប្រើប្រាស់ទាំងអស់គ្នា ដែលមានគុណប្រយោជន៍ដល់ អាជ្ញាធរជាតិអប្សរា ក្រសួងធនធានទឹក ក្រសួងវប្បធម៌ និងវិចិត្រសិល្បៈ និងអង្គភាពពាក់ព័ន្ធដទៃទៀត។
លោកជំទាវឯកអគ្គរដ្ឋទូត បញ្ជាក់ថា ទោះបីប្រទេសកម្ពុជា ក៏ដូចពិភពលោក កំពុងរងផលប៉ះពាល់ដោយសារ វិបត្តិជំងឺកូវីដ១៩ ប្រទេសបារាំងនៅតែបន្តគាំទ្រ និងសហការ ជាមួយប្រទេសកម្ពុជា ក៏ដូចរដ្ឋបាលខេត្តសៀមរាប លើគម្រោងនានា នាពេលអនាគត។
ថ្លែងក្នុងឱកាសនោះ ឯកឧត្តមអភិបាលខេត្ត បានថ្លែងអំណរគុណចំពោះការគាំទ្រ និងកិច្ចសហប្រតិបត្តិការល្អរបស់ប្រទេសបារាំង ជាមួយរាជរដ្ឋាភិបាលកម្ពុជា ឯកឧត្តមក៏បានលើកឡើងផងដែរថា ដោយសារវិបត្តិនៃជំងឺកូវីដ១៩ បុគ្គលិកបម្រើការក្នុងវិស័យទេសចរណ៍ក្នុងខេត្ត រងផលប៉ះពាល់ប្រមាណ៨០ភាគរយ ដែលពួកគេភាគច្រើនរស់នៅក្នុងក្រុងសៀមរាប។ ប៉ុន្តែប្រជជាពលរដ្ឋនៅតាមទីជនបទ ក៏ទទួលរងផលប៉ះពាល់ខ្លាំងផងដែរ ដោយសារសមាជិកគ្រួសាររបស់គេ បានត្រឡប់មករស់នៅជាមួយក្រុមគ្រួសារនៅជនបទ បន្ទាប់ពីកន្លែងធ្វើការបានផ្អាក ឬបិទ លើសពីនោះ ប្រជាពលរដ្ឋដែលទៅធ្វើការនៅក្រៅប្រទេស គ្មានការងារធ្វើ និងបានត្រឡប់មកលំនៅដ្ឋានវិញនៅកម្ពុជា ដែលនេះជាបន្ទុករបស់គ្រួសារនៅជនបទ។
ឯកឧត្តមអភិបាលខេត្ត ក្នុងកាលៈទេសៈនៃវិបត្តិជំងឺកូវីដ១៩ រាជរដ្ឋាភិបាលកម្ពុជា ដែលមានសម្ដេចតេជោ ហ៊ុន សែន ជា នាយករដ្ឋមន្ត្រី បានណែនាំដល់បណ្ដារដ្ឋបាលរាជធានីខេត្តទាំងអស់ ត្រូវយកចិត្តទុកដាក់ ធ្វើអត្តសញ្ញាណកម្មជនក្រីក្រពិតប្រាកដ ដែលកំពុងរងផលប៉ះពាល់ដោយសារវិបត្តិជំងឺកូវីដ១៩។ ជាមួយនោះ រដ្ឋបាលខេត្ត ក៏បានខិតខំប្រឹងប្រែង ប្រែក្លាយពេលវេលាដ៏លំបាកនេះ ទៅជាការអភិវឌ្ឍ ជាពិសេសហេដ្ឋារចនាសម្ព័ន្ធក្នុងក្រុង សម្រាប់ទទួលភ្ញៀវទេសចរ បន្ទាប់ជំងឺកូវីដ១៩នេះ។
អត្ថបទ និង រូបថត ៖ លោក សេង ផល្លី
