ឯកឧត្ដម ទៀ សីហា អភិបាលខេត្ដសៀមរាប បានមានប្រសាសន៍ថា បើទោះស្ថិតក្នុងដំណាក់កាលផលប៉ះពាល់នៃជំងឺកូវីដ-១៩ ក៏ដោយ ក៏រដ្ឋបាលខេត្តសៀមរាប បាននឹងកំពុងជំរុញ និងយកចិត្តទុកដាក់លើការកែលំអសោភ័ណភាពក្រុង ឱ្យបានកាន់តែល្អប្រសើរថែមទៀត ដើម្បីត្រៀមអ្នកទេសចរណ៍ទៅកំសាន្ដនៅតំបន់ទេសចរណ៍អង្គរ ក្រោយបញ្ចប់កូវីដ១៩ រួមទាំងការកសាងផ្លូវថ្នល់ក្នុងក្រុងសៀមរាប សម្រាប់ឆ្នាំ២០១៩-២០២០នេះ ដែលរដ្ឋបាលខេត្តសម្រេចធ្វើជួសជុល និង កែលម្អ បានសរុបចំនួន២៧ខ្សែ ស្មើនឹង ១៦.៤៥០គីឡូម៉ែត្រ ព្រមទាំងបានដាក់លូ និងលូប្រអប់តាមបណ្តោយផ្លូវនានាផងដែរ ជាមួយនេះ ជាពិសេសរដ្ឋបាលខេត្តនឹងធ្វើការកែលម្អផ្លូវជាតិលេខ៦ ចាប់ពីស្តុបសណ្ឋាគារសុខាអង្គរ រហូតដល់រង្វង់មូលព្រះបាទជ័យវរ្ម័នទី៧ (វិទ្យាល័យសម្តេចឪ) ក្រោមការគាំទ្រថវិកាពីធនាគារអភិវឌ្ឍន៍អាស៊ី (ADB) ដែលគម្រោងនេះនឹងចាប់ដំណើរការក្នុងខែកញ្ញា ឆ្នាំ២០២០ខាងមុខ ។
ឯកឧត្ដម ទៀ សីហា មានប្រសាសន៍បន្ថែមថា ពាក់ព័ន្ធនឹងការងារស្ថាបនាផ្លូវក្នុងក្រុងសៀមរាប ក្រសួងសាធារណការ និងដឹកជញ្ជូន បានសហការជាមួយរដ្ឋបាលខេត្ត សិក្សាប្លង់មេសម្រាប់សាងសង់ផ្លូវថ្មីចំនួន៣៨ខ្សែ ក្នុងក្រុង ហើយផ្លូវក្នុងក្រុងសៀមរាបនឹងត្រូវដាក់លេខផ្លូវ និងឈ្មោះផ្លូវសរុបចំនួន ១.៨១៦ខ្សែ ប្រើប្រាស់ជាផ្លូវការនាពេលឆាប់ៗនេះ។
ឯកឧត្ដម ទៀ សីហា មានប្រសាសន៍បែបនេះ នៅក្នុងពិធីប្រកាសចូលកាន់ដំណែងប្រធានមន្ទីរអប់រំ យុវជន និង កីឡាខេត្ដសៀមរាប កាលពីរសៀលថ្ងៃទី០៩ ខែកក្កដា ឆ្នាំ២០២០ម្សិលមិញនេះ ។
ព័ត៌មានជាតិ ថ្មីៗ
ឯកឧត្ដមអភិបាលខេត្តសៀមរាប មានប្រសាសន៍បន្ថែមទៀតថា រដ្ឋបាលខេត្ត នឹងធ្វើការរៀបចំកែលម្អសោភ័ណភាពសួនច្បារតាមមាត់ស្ទឹង ខាងជើងស្ពានថ្មព្រះរាជដំណាក់ ដោយបានបំពាក់នូវឧបករណ៍ហាត់ប្រាណ រួមជាមួយនឹងការផ្គត់ផ្គង់អគ្គិសនី ប្រព័ន្ធទឹកស្អាត ភ្លើងបំភ្លឺសាធារណៈ ការងារពង្រឹកសន្តិសុខសុវត្ថិភាពជូនភ្ញៀវទេសចរ សណ្តាប់ធ្នាប់សាធារណៈ និងការកែលម្អនៅតាមតំបន់រមណីយដ្ឋាននានាក្នុងខេត្ត ដើម្បីធ្វើយ៉ាងណាប្រែក្លាយជាគោលដៅទេសចរណ៍ ដ៏ទាក់ទាញសម្រាប់ភ្ញៀវទេសចរពីគ្រប់ទិសទី ខណៈដែលក្រសួងព្រះបរមរាជវាំង បាននឹងកំពុងដំណើរការរៀបចំសោភ័ណភាពសួនច្បារមុខព្រះរាជដំណាក់ ៕
អត្ថបទ ៖ លោក ឈិត សាវី
រូបថត៖facebook(រដ្ឋបាលខេត្តសៀមរាប/Siem Reap Provincial Hall)
កែសម្រួលអត្ថបទ ៖ លោក លីវ សាន្ត
