បើតាមការចេញសេចក្ដីជូនដំណឹងរបស់ក្រសួងធនធានទឹក និងឧតុនិយម នៅថ្ងៃទី០៩ ខែកក្កដា ឆ្នាំ២០២០នេះ បានឲ្យដឹងថា នៅពាក់កណ្ដាលខែកក្កដាខាងមុខនេះ កូនរដូវប្រាំងនឹងមានកើតឡើងធ្វើឲ្យបរិមាណទឹកភ្លៀង នៅតាមបណ្ដាប្រទេសមួយចំនួន និងក្នុងប្រទេសកម្ពុជាយើងមានការធ្លាក់ចុះ។ ក្នុងនោះបន្ទាប់ពីក្រសួងបានធ្វើការតាមដាន ការវិវត្តស្ថានភាពអាកាសធាតុជាបន្តបន្ទាប់ ជាលក្ខណៈសកល និងតំបន់បានបង្ហាញថា ចាប់ពីពាក់កណ្ដាលខែរហូតដល់ចុងខែកក្កដានេះ សម្ពាធខ្ពស់បាននឹងកំពុងបង្កើនឥទ្ធិពល មកលើផ្ទៃមហាសមុទ្រប៉ាស៊ីហ្វិកខាងលិច ។ ហើយចំពោះលក្ខណៈបែបនេះ ធ្វើឱ្យបណ្ដាប្រទេសក្នុងតំបន់ដូចជា ថៃ កម្ពុជា វៀតណាម ឡាវ មីយ៉ាន់ម៉ា និងប្រទេស ហ្វីលីពីន កម្រិតបរិមាណទឹកភ្លៀងធ្លាក់មកមានការថមថយចុះ ។
ក្នុងលិខិតជូនដំណឹងក៏បានបញ្ជាក់ដែរថា សម្រាប់កម្ពុជាកន្លងមកស្ថានភាពនេះ ក្រសួងក៏បានជម្រាបជូន ដំណឹងម្ដងរួចមកហើយ តាមរយៈការព្យាករអាកាសធាតុលើកទី២ សម្រាប់ឆ្នាំ ២០២០ នឹងមានកូនរដូវប្រាំង កើតឡើងចាប់ពីពាក់កណ្ដាលខែកក្កដា រហូតដល់ដំណាច់ខែកក្កដា ឆ្នាំ ២០២០។ បន្ទាប់ពីនោះ ស្ថានភាពអាកាសធាតុនឹងត្រឡប់មកប្រក្រតីឡើងវិញ ដោយភ្លៀងក៏នឹងអាចធ្លាក់ រាយប៉ាយបានល្អលើផ្ទៃប្រទេស ជាមួយនឹងបរិមាណទឹកភ្លៀងពីមធ្យមទៅច្រើន ក្នុងនោះក៏នឹង អាចបណ្ដាលឱ្យខេត្តមួយចំនួន ដែលមានភូមិសាស្ត្រនៅទីទំនាបជាប់ក្បែរតំបន់ជួរភ្នំ តំបន់ខ្ពង់រាប តំបន់ជាប់ផ្លូវទឹក និងតំបន់មាត់សមុទ្រ ប្រឈមខ្ពស់នឹងជំនន់ទឹកភ្លៀង ដែលបណ្ដាលមកពីការ ធ្លាក់ភ្លៀងច្រើនលើសលប់ផងដែរ ។
ក្នុងនោះដែរ ក្រសួងធនធានទឹក និងឧតុនិយម គ៏សូមអំពាវនាវដល់បងប្អូនប្រជាពលរដ្ឋ សាធារណជនទូទៅទាំងអស់ ជាពិសេសបងប្អូនប្រជាកសិករដែលកំពុង និងបម្រុងចាប់ផ្ដើមដាំដុះនូវកសិផលផ្សេងៗ បានជ្រាបជាព័ត៌មាន និងមានការយកចិត្តទុកដាក់ឲ្យបានខ្ពស់ក្នុងការថែរក្សា និងប្រើប្រាស់ទឹកឱ្យបានល្អ សម្រាប់ជីវភាពប្រចាំថ្ងៃ ក៏ដូចជាការងារបង្កបង្កើនផល ៕
អត្ថបទ ៖ អ៊ុន ណារាជ្យ
