គិតត្រឹមឆមាសទី១ ដើមឆ្នាំ២០២០នេះ ការផ្គត់ផ្គង់ទឹកស្អាតក្នុងខេត្តសៀមរាប មានចំនួនជិត៧៤ភាគរយ និងការលើកកម្ពស់អនាម័យជនបទមានជិត៧៥ភាតរយ នេះបើតាមរបាយការណ៍ផ្ដល់ដោយមន្ទីរអភិវឌ្ឍន៍ជនបទខេត្តសៀមរាប ក្នុងកិច្ចប្រជុំពិនិត្យលើវឌ្ឍនភាពនានា ក្នុងការអនុវត្តផែនការសកម្មភាពស្ដីពីការផ្គត់ផ្គង់ទឹក ការសម្អាត និងអនាម័យជនបទ ឆ្នាំ២០១៩ ដល់២០២៣ នៅមន្ទីរអភិវឌ្ឍន៍ជនបទខេត្តសៀមរាប ថ្ងៃទី១៥ ខែកក្កដា ឆ្នាំ២០២០។
នៅក្នុងរបាយការណ៍ដដែលនេះ បានបញ្ជាក់ថា ក្រសួងអភិវឌ្ឍន៍ជនបទ បានដាក់ចេញនូវគោលដៅ ផ្គត់ផ្គង់ទឹកស្អាត និងអនាម័យ ជូនសហគមន៍ជនបទ ឲ្យបាន៩០ភាគរយ និងនិងសម្រេចទស្សនវិស័យ ឆ្នាំ២០២៥ ដោយប្រជាពលរដ្ឋទាំងអស់នៅតាមសហគមន៍ជនបទ ទទួលបានការផ្គត់ផ្គង់ទឹកស្អាត និងអនាម័យគ្រប់គ្រាន់ ព្រមទាំងរស់នៅក្នុងបរិស្ថានដែលមានអនាម័យប្រកបដោយនិរន្តភាព។
តាមលើកឡើង របស់លោក ខេង ញ៉ុល ប្រធានមន្ទីរអភិវឌ្ឍន៍ជនបទខេត្ត សម្រាប់៦ខែដើមឆ្នាំ២០២០នេះ ដំណើរការការចុះអនុវត្តការផ្គត់ផ្គង់ទឹកស្អាត និងអនាម័យនៅតាមសហគមន៍ជនបទ ជួបនឹងបញ្ហាប្រឈមមួយចំនួន ដោយសារវិបត្តិនៃជំងឺកូវីដ១៩ ជាមួយនោះអង្គការចំនួន២៣ ដែលបាននឹងកំពុងធ្វើការលើការផ្គត់ផ្គង់ទឹកស្អាត និងអនាម័យ ជាមួយមន្ទីរអភិវឌ្ឍន៍ជនបទខេត្ត មួយចំនួនត្រូវបានម្ចាស់ជំនួយកាត់បន្ថយជំនួយលើការងារការផ្គត់ផ្គង់ទឹកស្អាត និងអនាម័យ ដោយបែងចែកទៅលើការងារប្រយុទ្ធប្រឆាំងនឹងជំងឺកូវីដ១៩។
ថ្លែងក្នុងឱកាសនោះ លោក ង៉ាន់ ភិរុណ អភិបាលរងខេត្តសៀមរាប លើកឡើងថា ការផ្គត់ផ្គង់ទឹកស្អាត និងអនាម័យ គឺជាបញ្ហាសំខាន់ សម្រាប់ប្រជាពលរដ្ឋនៅតាមសហគមន៍ជនបទ ជាពិសេសប្រជាពលរដ្ឋក្រីក្រ។ ការផ្គត់ផ្គង់ទឹកស្អាត និងអនាម័យនៅតាមសហគមន៍ជនបទនេះដែរ អង្គការក្រៅរដ្ឋាភិបាលនានា ពិតជាដៃគូយ៉ាងសំខាន់ ក្នុងការចូលរួមសម្រេចគោលដៅ ២០២៣ និងទស្សនវិស័យ ឆ្នាំ២០២៥ ជាមួយរាជរដ្ឋាភិបាលម្ពុជា។
ទន្ទឹមនោះ លោកអភិបាលរងខេត្ត ក៏បានសំណូមពរដល់ អាជ្ញាធរជាតិអប្សរា មន្ទីរជំនាញ អាជ្ញាធរមូលដ្ឋាន រួមនិងអង្គការដៃគូ ត្រូវមានការសម្របសម្រួល និងចូលរួមសិក្សាជាមួយគ្នាប្រកបដោយឆន្ទៈខ្ពស់ ក្នុងការជ្រើសរើស និងផ្ដល់ទីតាំងអនុវត្តន៍គម្រោង ដែលស្ថិតនៅក្នុងតំបន់គ្រប់គ្រងដោយអាជ្ញាធរជាតិអប្សរា ដើម្បីលើកកម្ពស់ជីវភាពរស់នៅ ក៏ដូចជាសុខុមាលភាពជូនប្រជាពលរដ្ឋនៅតាមសហគមន៍ជនបទ។
សូមជម្រាបថា ក្នុងកិច្ចប្រជុំពិនិត្យលើវឌ្ឍនភាពនានា ក្នុងការអនុវត្តផែនការសកម្មភាពស្ដីពីការផ្គត់ផ្គង់ទឹក ការសម្អាត និងអនាម័យជនបទ ឆ្នាំ២០១៩ ដល់២០២៣ មានការចូលរួមពីតំណាងមន្ទីរអង្គភាពជុំវិញខេត្តចំនួន២០ តំណាងរដ្ឋបាលក្រុងឥស្រុកចំនួន១២ និងអង្គការក្រៅរដ្ឋាភិបាល ធ្វើការលើការផ្គត់ផ្គង់ទឹកស្អាត និងអនាម័យជនបទ ហៅកាត់ថា WASH ចំនួន១៨ផងដែរ។
អត្ថបទ និង រូបថត ៖ លោក សេង ផល្លី
