នៅព្រឹកថ្ងៃទី២៣ ខែកក្កដា ឆ្នាំ២០២០ នៅមន្ទីរព័ត៌មានខេត្តសៀមរាប មានបើកវគ្គបណ្ដុះបណ្ដាលស្តីពី “របៀបប្រើប្រាស់ប្រព័ន្ធអ៊ីនធីណិត ក្នុងការពង្រីកអាជីវកម្ម” របស់គម្រោង អាស៊ានឆ្ពោះទៅកាន់ឌីជីថល (Go Digital ASEAN) ជូនដល់យុវជនស្ម័គ្រចិត្ត ជាជនបង្គោលចំនួន៣០រូប ក្នុងនោះស្រី១០រូប ដើម្បីជួយផ្សព្វផ្សាយបន្តដល់អាជីវករ ប្រកបអាជីវកម្មខ្នាតមីក្រូ តូច និងមធ្យម នៅកម្ពុជា ជាពិសេសខេត្តសៀមរាប ក្នុងការផ្សព្វផ្សាយផលិតផល លក់សេវាកម្ម និងផលិតផលនានាជាដើម នៅលើប្រព័ន្ធអ៊ិនធើណិត រួមមានFacebook YouTube Google Map ។ល។
តាមការឲ្យដឹងពីលោក ឃុត ស៊ននិមល មន្ត្រីជាន់ខ្ពស់ផ្នែកឌីជីថល របស់អង្គការមូនិធិអាស៊ី (The Asia Foundation) គម្រោង អាស៊ានឆ្ពោះទៅកាន់ឌីជីថល ទទួលបានថវិកាគាំទ្រពី ហ្គូហ្គលដតអក (Google.org) អនុវត្តន៍គម្រោងដោយ អង្គការមូនិធិអាស៊ី ចំពោះវគ្គបណ្ដុះបណ្ដាលក្នុងខេត្តសៀមរាប មានការសម្របសម្រួលរៀបចំដោយ អង្គការស្តារកម្ពុជា និងមន្ទីរព័ត៌មានខេត្តសៀមរាប ដែលមានរយៈពេល២ថ្ងៃ ចាប់ពីថ្ងៃទី២៣ ដល់ ២៤ ខែកក្កដា។
លោក បញ្ជាក់ថា ក្រុមការងារអង្គការមូនិធិអាស៊ី បានចាប់ផ្ដើមចុះសិក្សាផ្ទាល់ជាមួយប្រជាពលរដ្ឋនៅតាមបណ្ដាខេត្ត កាលពីឆ្នាំ២០១៩។ ដោយឡែកវគ្គបណ្ដុះបណ្ដាលនេះ បាននិងកំពុងអនុវត្តន៍លើរាជធានី-ខេត្តគោលដៅចំនួន៧ មាន រាជធានីភ្នំពេញ សៀមរាប បាត់ដំបង កំពង់ស្ពឺ កំពង់ចាម តាកែវ ស្វាយរៀង ដែលចាប់ផ្ដើមពីខែមិថុនា ឆ្នាំ២០២០ រហូងដល់ ខែមិថុនា ឆ្នាំ២០២១។
មន្ត្រីជាន់ខ្ពស់រូបនេះ បន្ថែមថា គម្រោងនេះ ពុំគ្រាន់តែជួយដល់អាជីវករខ្នាតមីក្រូ តូច និងមធ្យមប៉ុណ្ណោះទេ តែវាក៏ជួយដល់សិស្សនិស្សិត ជនពិការ ជនជាតិភាគតិច ជនរងគ្រោះ និងជនងាយរងគ្រោះ អភិវឌ្ឍសមត្ថភាព ក្នុងការប្រើប្រាស់ប្រព័ន្ធអ៊ិនធើណិត ដើម្បីរកចំណូល ព្រមទាំងការពារខ្លួន ពីជនខិលខូចលើប្រព័ន្ធអ៊ិនធើណិត ដូចជាការលួចយកគណនីបណ្ដាញសង្គមនានា ការចាប់ជម្រិតតាមអ៊ិនធើណិត ការផ្សព្វផ្សាយបោកប្រាស់។ល។
ថ្លែងក្នុងឱកាសនោះ លោក លីវ សុខុន ប្រធានមន្ទីរព័ត៌មានខេត្តសៀមរាប បានផ្ដល់អនុសាសន៍មួយចំនួនដល់សិក្ខាកាមជាជនបង្គោលក្នុងវគ្គបណ្ដុះបណ្ដាលនេះ ត្រូវខិតខំពង្រឹងសមត្ថភាពរបស់ខ្លួន ឲ្យក្លាយជាធនធានមនុស្ស សម្រាប់អភិវឌ្ឍសង្គមជាតិ និងលើកកម្ពស់ជីវភាពគ្រួសារ។ បន្ទាប់ពីវគ្គបណ្ដុះបណ្ដាលនេះដែរ សិក្ខាកាមទាំងអស់ ត្រូវចូលរួមគោរពច្បាប់ទាំងអស់គ្នា ពាក់ព័ន្ធទៅនឹងការផ្សព្វផ្សាយ ឬចែករំលែកបន្ត នូវព័ត៌មានមិនពិត ឬក្លែងក្លាយ ដែលវាអាចនឹងបង្កឲ្យប៉ះពាល់ដល់ស្ថេរភាពនយោបាយ សន្តិសុខ និងសេដ្ឋកិច្ចជាតិ ដែលឈានទៅដល់ការទទួលទោសតាមផ្លូវច្បាប់។
លោកប្រធានមន្ទីរព័ត៌មានខេត្ត ក៏បានថ្លែងអំណរគុណដល់ អង្គការមូនិធិអាស៊ី និងអង្គការពាក់ព័ន្ធដទៃទៀត ដែលបានយកចិត្តទុកដាក់ ធ្វើការសិក្សាស្រាវជ្រាវ និងចូលរួមលើកកម្ពស់ សមត្ថភាពចំណេះដឹងយុវជនកម្ពុជា ជាមួយរាជរដ្ឋាភិបាលកម្ពុជា និងសង្ឃឹមថា អង្គការមូនិធិអាស៊ី នឹងមានវគ្គបណ្ដុះបណ្ដាលបន្ថែមទៀត សម្រាប់ប្រជាពលរដ្ឋក្នុងខេត្តសៀមរាប។
អត្ថបទ និងរូបភាព៖ លោក សេង ផល្លី និង លោក ខេង ឧត្តម
