កម្មវិធីផ្សព្វផ្សាយបច្ចេកទេសកសិកម្មថ្មី ដែលធន់នឹងការប្រែប្រួលអាកាសធាតុ ឬហៅកាត់ថា អាស្ប៉ាយ (ASPIRE) ជាខ្នងបង្អែកយ៉ាងសំខាន់ សម្រាប់កសិករ ក្នុងការជំរុញចលនាដាំដុះ និងចិញ្ចឹមសត្វ ឆ្លើយតបទៅនឹងក្នុងស្ថានភាពនៃវិបត្តិជំងឺកូវីត១៩ នេះបើតាមប្រសាសន៍របស់ ឯកឧត្តមបណ្ឌិត មាស ពិសិដ្ឋ អនុរដ្ឋលេខាធិការក្រសួងកសិកម្ម រុក្ខាប្រមាញ់និងនេសាទ និងជានាយកកម្មវិធី អាស្ប៉ាយ (ASPIRE) កាលពីថ្ងៃទី២២ ខែកក្កដា ឆ្នាំ២០២០ ក្នុងជំនួបពិភាក្សាជាមួយកសិករគំរូ នៅសហគមន៍ អភិវឌ្ឍន៍កសិកម្មសំរោងមានជ័យ ឃុំសំរោង ស្រុកសូទ្រនិគម ខេត្តសៀមរាប។
ឯកឧត្តមអនុរដ្ឋលេខាធិការ បន្ថែមថា ក្រសួងកសិកម្ម រុក្ខាប្រមាញ់និងនេសាទ បានខិតខំប្រឹងប្រែង ផ្ដល់បច្ចេកទេសថ្មីៗ តាមរយៈមន្ត្រីជំនាញកសិកម្មថ្នាក់ខេត្ត ដើម្បីជំរុញដល់ប្រជាកសិករគម្រូ ក៏ដូចជាសហគមន៍នានានៅទូទាំងប្រទេស ធ្វើការដាំដុះ ឬចិញ្ចឹមសត្វ ដែលធន់នឹងអាកាសធាតុពេញមួយឆ្នាំ ស្របតាមអនុសាសន៍ សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា។
ឯកឧត្តម បញ្ចាក់ថា កម្មវិធី អាស្ប៉ាយ (ASPIRE) នឹងជួយធ្វើឲ្យទិន្នផលកសិកម្មមានការកើនឡើង ប្រកបដោយគុណភាព សមស្របតាមតម្រូវការទីផ្សារ។ ចំណុចឆ្លើយតបដ៏សំខាន់មួយទៀតនោះគឺ កសិដ្ឋានធំៗមួយចំនួន បានក្លាយជាមជ្ឈមណ្ឌលផ្ដល់ការងារកសិកម្ម សម្រាប់ ប្រជាពលរដ្ឋធ្វើចំណូលស្រុកមកពីក្រៅប្រទេស ប្រជាពលរដ្ឋក្នុងស្រុកមួយចំនួន ដែលបានបាត់បង់ការងារដោយវិបត្តិជំងឺកូវីត១៩។
លោក ឈាវ ហុង អាយុ ៦២ឆ្នាំ ជាកសិករគម្រូនៅក្នុងសហគមន៍អភិវឌ្ឍន៍កសិកម្មសំរោងមានជ័យ ដែលបច្ចុប្បន្នមានកសិដ្ឋានលើផ្ទៃដីទំហំប្រមាណជាង៧ហិកតា បានឲ្យដឹងថា មកទល់នឹងពេលនេះ លោកបានប្រើជីវិតនៅក្នុងវិស័យកសិកម្មអស់រយៈពេល២០ឆ្នាំកន្លងមកហើយ។ លោកថា ឆ្នាំ២០១៩កន្លងទៅ គឺជាឆ្នាំមោទនភាព ដែលមុខរបបអាជីពជាកសិករ កំពុងបោះជំហានទៅមុខ។ ឆ្នាំ២០២០ ជំងឺកូវីត១៩ ពុំបង្កហានិភ័យខ្លាំង ដល់របរកសិកម្មរបស់លោកឡើយ បន្ថែមពីលើនេះ កម្មវិធី អាស្ប៉ាយ (ASPIRE) កាន់តែធ្វើឲ្យកសិដ្ឋានរបស់លោក មានភាពរីកចម្រើនបន្ថែមទៀត។
អត្ថបទ និងរូបភាព៖ លោក ងិន គឹមឡេង
កែសម្រួលអត្ថបទ៖ លោក សេង ផល្លី
