កាលពីនៅថ្ងៃទី ២៧ ខែកក្កដា ឆ្នាំ២០២០ លោកជំទាវ សុខ ណារ៉ូ ពៅ ហេង អនុប្រធានគណៈកម្មាធិការសាខាកាកបាទក្រហមកម្ពុជា ខេត្តសៀមរាប បាននាំយកអំណោយមួយចំនួន ប្រគល់ជូន កុមារីរងគ្រោះដោយសារ គ្រាប់មិនទាន់ផ្ទុះចំនួន២នាក់ ដែលកំពុងសម្រាកព្យាបាល នៅមន្ទីរពេទ្យគន្ធបុប្ផាខេត្តសៀមរាប។
ករណីផ្ទុះគ្រាប់សំណល់នេះ បានកើតឡើង កាលពីថ្ងៃទី ២៦ ខែកក្កដា ឆ្នាំ២០២០ នៅចំណុចដូនម៉ុក ភូមិស្រអែមត្បូង ឃុំកន្ទួត ស្រុកជាំក្សាន្ត ខេត្តព្រះវិហារ បណ្ដាលឲ្យមនុស្ស ៤នាក់រងគ្រោះ ក្នុងនោះ កុមារាម្នាក់បានស្លាប់ កុមារី២នាក់ រងរបួសធ្ងន់ សម្រាកនៅមន្ទីរពេទ្យគន្ធបុប្ផាខេត្តសៀមរាប និងបុរសជាឪពុកកុមារដែលបានបាត់បង់ជីវិត រងរបួសស្រាល។
មានប្រសាសន៍សួរសុខទុក្ខក្នុងឱកាសនោះ លោកជំទាវ អនុប្រធានគណៈកម្មាធិការសាខា បានសម្ដែងនូវការសោកស្ដាយដល់ជនរងគ្រោះ ដែលបានបាត់អាយុជីវិតមនុស្ស និងគ្រោះថ្នាក់មកលើប្រជាពលរដ្ឋកម្ពុជា ជាពិសេសកុមារតូចៗ ដោយសារគ្រាប់សំណល់មិនទាន់ផ្ទុះនេះ។
លោកជំទាវ ក៏បានផ្ដាំផ្ញើដល់អាណាព្យាបាលរបស់កុមារីទាំង២នាក់ ត្រូវយកចិត្តទុកដាក់អនុវត្តន៍តាមការណែនាំរបស់លោកវេជ្ជបណ្ឌិត និងសំណូមពរដល់អាណាព្យាបាលទាំងអស់ ត្រូវមានការយកចិត្តទុកដាក់ខ្ពស់ចំពោះកុមារតូចៗ ព្រោះពួកគាត់ពុំទាន់ដឹងថារបស់អ្វីដែលបង្កគ្រោះថ្នាក់ ឬ មិនគ្រោះថ្នាក់នោះទេ។
អំណោយមនុស្សធម៌ដែលបានផ្ដល់ជូនជនរងគ្រោះទាំង២នាក់នោះ ក្នុងម្នាក់ៗទទួលបាន មុង១ ភួយ១ សារុង១ ក្រមា១ កន្ទេល១ អាវយឺត២ មី១កេស ត្រីខ១យួរ អង្ករ៣០គីឡូក្រាម និងថវិកា២សែនរៀល ។
អត្ថបទ និង រូបថត ៖ លោក ម៉ី សុខារិទ្ធ
កែសម្រួលអត្ថបទ ៖ លោក សេង ផល្លី
