កាលពីរសៀលថ្ងៃទី២៨ ខែកក្កដា ឆ្នាំ២០២០នេះ ប្រជាកសិករងាយរងគ្រោះដែលរងផលប៉ះពាល់ពីជំងឺកូវីដ១៩ ចំនួន ៨.៣៩២ គ្រួសារ មកពី៤៩ភូមិ នៅឃុំទាំង៦ ក្នុងស្រុកស្រីស្នំ ខេត្តសៀមរាប បានទទួលគ្រាប់ពូជបន្លែដោយឥតគិតថ្លៃ រួមមាន ៖ ពូជបន្លែ , ត្រកួន , ត្រប់ , ប៉េងប៉ោះ និង ស្ពៃចង្កើះ ពីប្រព័ន្ឋស្បៀងបំរុងកម្ពុជា ដើម្បីជំរុញការដាំដុះបន្លែសុវត្ថិភាព ក្រោមអធិបតីភាពឯកឧត្តម បណ្ឌិត វង់ សណ្តាប់ រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានលេខាធិការដ្ឋានគណៈកម្មាធិការគ្រប់គ្រងប្រព័ន្ធស្បៀងបម្រុងកម្ពុជា និង លោក ង៉ាន់ ភិរុណ អភិបាលរង នៃគណៈអភិបាលខេត្តសៀមរាប ។
លោក ង៉ាន់ ភិរុណ អភិបាលរងខេត្តសៀមរាប បានមានប្រសាសន៍ថា ការផ្តល់គ្រាប់ពូជបន្លែដោយឥតគិតថ្លៃពីប្រព័ន្ធស្បៀងបម្រុងកម្ពុជា គឺដើម្បីជំរុញការដាំដុះ បន្លែសុវត្ថិភាព”ជាលក្ខណៈគ្រួសារ ជាការជួយបង្កើតការងារ និងបង្កើនជីវភាពប្រចាំថ្ងៃដល់បងប្អូនប្រជាពលរដ្ឋដែលមានជីវភាពខ្វះខាត ងាយរងគ្រោះ ជាពិសេសគ្រួសារបងប្អូនមួយចំនួនដែលត្រូវផ្អាកពីការងារ បងប្អូនចំណូលស្រុកមកពីប្រទេសជិតខាងដោយសារតែវិបត្តិជំងឺកូវី១៩ជាដើម ហើយដែលការដាំដុះនេះ វានឹងផ្តល់អត្ថប្រយោជន៍ និងផ្តល់ផលចំណេញដល់ពួកគាត់ដោយកាត់បន្ថយចំណាយថវិកាទៅទិញនៅទីផ្សារ ចំណេញដល់សុខភាព ព្រោះយើងដាំ និងថែទាំដោយខ្លួនឯងមិនបារម្ភពីបន្លែមានប្រើជីគីមីឬបន្លែនាំចូលពីឡើយ ដូច្នេះក្នុងនាមអភិបាលនៃគណៈអភិបាលខេត្ត និង ក្រុមប្រឹក្សាខេត្ត សូមថ្លែងអំណរគុណយ៉ាងជ្រៀលជ្រៅបំផុតចំពោះសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ដែលសម្តេចតែងតែយកចិត្តទុកដាក់គិតគូរពីសុខទុក្ខបងប្អូនប្រជាពលរដ្ឋគ្រប់ទីកន្លែង និងគ្រប់ពេលវេលា ទោះជាកាលៈទេសៈណាក៍ដោយ ។
មានប្រសាសន៍ក្នុងឱកាសនោះដែរ ឯកឧត្តម បណ្ឌិត វង់ សណ្តាប់ រដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុ ប្រធានលេខាធិការដ្ឋានប្រព័ន្ធស្បៀងបំរុងកម្ពុជា លើកឡើងថា ការអនុវត្តប្រព័ន្ឋនេះ គឺជាទស្សនវិស័យដ៏វែងឆ្ងាយរបស់រាជរដ្ឋាភិបាល ដល់ការលើកទឹកចិត្តនិងជំរុញចលនាបង្កើនការដាំដុះក្នុងស្រុក កាត់បន្ថយការនាំចូលបន្លែពីប្រទេសជិតខាង ដែលជាពិសេសនោះ គឺផ្តោតទៅលើការយកចិត្តទុកដាក់ជាសំខាន់ជួយដល់ប្រជាកសិករគោលដៅជាអាទិភាព ដែលកំពុងប្រឈមនិងជីវភាពខ្វះខាត ឲ្យមានលទ្ធភាពរកប្រាក់ចំណូលគ្រួសារ តាមរយៈនៃការដាំដុះផលដំណាំ បន្ថែមពីលើការងារបង្កបង្កើនផលស្រូវស្រែនោះ ហើយការចែកជូននេះ មិនបានកំណត់ចំនួនគ្រួសារនោះទេ តែត្រូវបានចែកជូនដល់ប្រជាពលរដ្ឋតាមតម្រូវការជាក់ស្តែង ។
ឯកឧត្តម បណ្ឌិត វង់ សណ្តាប់ មានប្រសាសន៍បន្ថែមថា ការអនុវត្តកម្មប្រព័ន្ធស្បៀងបំរុងនេះ គឺឆ្ពោះទៅរកការបង្កបង្កើនផលដំណាំសុវត្ថិភាព ដែលជាគោលការណ៍ដើម្បីសុខភាព តាមរយៈនៃការបរិភោគចំណីអាហារដែលគ្មានជាតិគីមី ហើយក្រសួងសេដ្ឋកិច្ចនិងហិរញ្ញវត្ថុ ពុំមែនជាស្ថាប័នជំនាញកសិកម្មនោះទេ ប៉ុន្តែជាស្ថាប័នដែលមានទំនួលខុសត្រូវ លើការចាត់ចែងនិងផ្តល់លទ្ធភាព ដើម្បីឲ្យកិច្ចការទាំងនេះ មានដំណើរការល្អនៅថ្នាក់ក្រោមជាតិ ក្រោមកិច្ចសហការជាមួយអាជ្ញាធរមូលដ្ឋាន និងស្ថាប័នជំនាញកសិកម្ម។
សូមបញ្ជាក់ថា កម្មវិធីប្រព័ន្ឋស្បៀងបម្រុងកម្ពុជា ចាប់អនុវត្តពីឆ្នាំ២០១៦ ហើយបើគិតត្រឹមត្រីមាសទី៣ ឆ្នាំ២០២០នេះ បានចែកពូជបន្លែដោយឥយគិតថ្លៃដល់ប្រជាកសិករដែលមានបំណងដាំដុះបន្ថែម និងកសិករ កម្មករដែររងផលប៉ះពាល់ដោយជំងឺកូវីដ១៩ បានចំនួន ៣៥៧.៥១៤ គ្រួសារ នៅក្នុងខេត្តចំនួន១៥ខេត្ត ស្មើនឹង៩៩ស្រុក ហើយ
សម្រាប់ខេត្តសៀមរាប ការផ្តល់គ្រាប់ពូជបន្លែដោយឥតគិតថ្លៃនេះ នឹងប្រព្រឹត្តិទៅចាប់ពីថ្ងៃទី២៨ ដល់ថ្ងៃទី៣០ ខែកក្កដា ឆ្នាំ២០២០ នៅស្រុកចំនួន៣គឺ ស្រុកស្រីស្នំ , ស្រុកវ៉ារិន និងស្រុកអង្គរជុំ ដែលមានបងប្អូនប្រជាកសិករ នឹងទទួលបានចំនួន ២១.១៧៨ គ្រួសារ ៕
អត្ថបទ និង រូបភាព ៖ លោក យូ វង្ស និង លោក ងិន គឹមឡេង
កែសម្រួលអត្ថបទ : លោក លីវ សាន្ត
