អតីតមគ្គុទេសក៍ទេសចរណ៍មានបទពិសោធន៍១០ឆ្នាំម្នាក់ ក្នុងក្រុងសៀមរាប សម្រេចចិត្តជ្រើសរើស ប្រកបរបរចិញ្ចឹមបង្កងអូស្ដ្រាលី ដោយសារពូជបង្កងអូស្ដ្រាលីងាយស្រួលចិញ្ចឹម ឆាប់ទទួលផល ចន្លោះពី ៦ខែទៅ៩ខែ និងទទួលបានប្រាក់ចំណូលខ្ពស់។
នៅថ្ងៃទី២៨ ខែកក្កដា ឆ្នាំ២០២០នេះ លោក សុខ សំណាង អតីតអ្នកមគ្គុទេសក៍ទេសចរមួយរូប រស់នៅភូមិបុស្សក្រឡាញ់ សង្កាត់ជ្រាវ ក្រុងសៀមរាប បានបង្ហាញថា លោកបានចាប់ផ្ដើមចិញ្ចឹមបង្កងអូស្ដ្រាលីអំឡុងខែវិច្ឋិកា ឆ្នាំ២០១៩ ដោយមានការណែនាំពីមិត្តភក្តិ និងសាកល្បងអនុវត្តន៍តាមវីដេអូការណែនាំ នៅលបណ្ដាញសង្គមយូធូប។ បច្ចុប្បន្ន លោកមានបង្កងពូជរាប់ពាន់ក្បាល និងចិញ្ចឹមលើផ្ទៃដី ប្រហែល៨០ម៉ែត្រការ៉េ។
អតីតអ្នកមគ្គុទេសក៍ទេសចររូបនេះ បញ្ជាក់ថា ក្នុងស្ថានភាពនៃជំងឺកូវីដ១៩ មានតែការធ្វើកសិកម្មទេ ទើបអាចជួយអោយសេដ្ឋកិច្ចគ្រួសារមានភាពល្អប្រសើរឡើង។ ចំពោះទីផ្សារបង្កងអូស្ដ្រាលី ក្នុងមួយគីឡូក្រាមមានតម្លៃ ២៥ដុល្លារ ឬប្រហែលនឹង ១០ម៉ឺនរៀល។
លោក បញ្ជាក់បន្ថែមថា លោកបង្កើតចិញ្ចឹមបង្កងអូស្ដ្រាលីនេះ បានសម្រេចគោលដៅស្ទើរមួយភាគរយហើយ បើទោះបីមានជំងឺកូវីដ១៩បានរីករាលដាលនៅក្នុងប្រទេសកម្ពុជាក៏ដោយ។
លោក បន្ថែមថា បង្កងអូស្ដ្រាលីងាយស្រួលចិញ្ចឹម អាចចិញ្ចឹមក្នុងអាងស៊ីម៉ងត៍ ក្នុងស្រះ ក្នុងស្រែ ក្នុងលូស៊ីម៉ង់ត៍ អាងធ្វើពីតង់ ជាពិសេសកន្លែងណាដែលមានប្រភពទឹកស្អាត។ ចំពោះបង្កង ដែលមានអាយុពី ៤ ទៅ៥ខែ ឈ្មោល មានទម្ងន់ប្រហែល ៦០០ក្រាម ហើយបង្កងញីមានទម្ងន់ ៤០០ក្រាម។ ដើម្បីរកចំណូលបន្ថែម ក្រៅពីចិញ្ចឹមបង្កងអូស្ដ្រាលី លោកក៏បានចិញ្ចឹសត្វមាន់ស្រែ ទាកាប៉ា និងសត្វកង្កែបពូជផងដែរ។
ប្រសិនបើប្រជាពលរដ្ឋ មានការចាប់អារម្មណ៍ លោកក៏មានបណ្ដុះបណ្ដាលជំនាញចិញ្ចឹមបង្កងនេះ ដល់កសិករក្នុងថ្ងៃសៅរនិងថ្ងៃអាទិត្យ។
អត្ថបទ និង រូបថត ៖ លោក បូ សាវី
កែសម្រួលអត្ថបទ ៖ លោក សេង ផល្លី
