ក្នុងឱកាសចុះសួរសុខទុក្ខនិងស្វែងយល់អំពីកត្តារីកចម្រើន និងបញ្ហាប្រឈមនានា នៅនៅកសិដ្ឋានដាំដំណាំនិងចិញ្ចឹមសត្វមួយកន្លែង របស់សហគមន៍សំរោងមានជ័យ ស្ថិតក្នុងឃុំសំរោង ស្រុកសូទ្រនិគម ខេត្តសៀមរាប កាលពីរសៀលថ្ងៃទី២៩ ខែកក្កដា ឆ្នាំ២០២០នេះ ឯកឧត្តម ឡូយ សុផាត ប្រធានគណៈកម្មការទី៣នៃរដ្ឋសភា បានមានប្រសាសន៍ថា ខេត្តសៀមរាប គឺជាខេត្តគោលដៅទេសចរណ៍ដ៏ធំនិងសំខាន់ដែលមានសក្តានុពលទាក់ទាញភ្ញៀវបរទេសចូលមកទស្សនារាប់លាននាក់ក្នុង១ឆ្នាំៗ ហើយការហូបចុកវាជាតម្រូវការចាំបាច់បំផុត ដែលបញ្ហានេះ គឺជាភ្លើងសញ្ញាបង្ហាញថា វិស័យទេសចរណ៍គឺទីផ្សារដ៏ធំបស់កសិករ ក៏ប៉ុន្តែវិស័យទេសចរណ៍ត្រូវបិទទ្វារក្នុងអំឡុងពេលដែលជំងឺកូវីដ១៩កំពុងរាតត្បាតក្នុងពិភពលោក ដូច្នេះហើយអំឡុងពេលនេះ ប្រមុខរាជរដ្ឋាភិបាលបានដាក់ចេញនូវផែនការយុទ្ធសាស្រ្តអភិវឌ្ឍន៍វិស័យកសិកម្ម ធានាសុវត្ថិភាពស្បៀងក្នុងស្រុក ពង្រីកវិសាលភាពផលិតផលប្រកបដោយគុណភាព ត្រៀមលក្ខណៈសម្បត្តិចូលក្នុងទីផ្សារទេសចរណ៍ ក្រោយពីវិបត្តិកូវីដ១៩ ត្រូវបានធូរស្រាលឡើងវិញ ។
ឯកឧត្តម ឡូយ សុផាត មានប្រសាសន៍បន្ថែមថា នៅក្នុងការអភិវឌ្ឍវិស័យកសិកម្មនេះ ខេត្តសៀមរាបបានចងក្រងជាសហគមន៍ចំនួន៥៨សហគមន៍ ដែលបញ្ហានេះ គឺជាជម្រើសដ៏ល្អបំផុត ដើម្បីប្រមូលផ្តុំកម្លាំងសាមគ្គី រួមគិត រួមធ្វើ ទាញយកផលប្រយោជន៍ទាំងអស់គ្នា ព្រោះសហគមន៍និមួយៗសុទ្ឋតែមានគោលដៅ និងកម្មវិធីរយៈពេលខ្លីឬវែង មិនថាតែសហគមន៍ផ្នែកបន្លែ សហគមន៍ចិញ្ចឹមសត្វទេ គឺយើងចង់បានការបង្កើតសហគមន៍ឱ្យបានកាន់តែច្រើន ព្រោះថាបើគ្មានសហគមន៍ទេ យើងមិនមានកម្លាំងរួមក្នុងការជួយយឹតយោងសាមគ្គីគ្នា ជួយទុក្ខធុរៈគ្នាទៅវិញទៅមកនោះទេ ដូច្នេះក្នុងកាលៈទេសៈនេះ យើងគ្មានជម្រើសណាក្រៅពីសហគមន៍ឡើយ ហេតុនេះ សូមឲ្យអាជ្ញាធរខេត្ត ត្រូវយកចិត្តទុកដាក់ពង្រឹងសហគមន៍ ជាពិសេសមន្ត្រីជំនាញកសិកម្ម ត្រូវស្រាវជ្រាវចងក្រងពីទីតាំងដីថាតើគួរដាំដុះអ្វីបានខ្លះដើម្បីផ្គត់ផ្គង់ទីផ្សារ រួមទាំងការជួយបណ្ដុះបណ្ដាលអំពីបច្ចេកទេសនៃការដាំដុះ និង ការចិញ្ចឹមសត្វដល់កសិករបន្ថែមទៀត ។
ឯកឧត្តមប្រធានគណៈកម្មការទី៣នៃរដ្ឋសភា មានប្រសាសន៍បន្ថែមទៀតថា ផ្អែកតាមសំណូមពររបស់កសិករដែលជួបប្រទះនូវការលំបាកលើបញ្ហាទឹក សម្រាប់ការដាំបន្លែសុវត្ថិភាពដែលជាមុខរបរអាជីពរបស់ខ្លួននោះ សំណូមពរដល់មន្ទីរពាក់ព័ន្ធ សូមចុះមកសិក្សា និង ជួយដោះស្រាយបញ្ហាទឹកជូនសហគមន៍សំរោងមានជ័យ ដើម្បីកាត់បន្ថយការចំណាយ បង្កើនចំណូលជូនកសិករ ជាពិសេសចំពោះសហគមន៍វិញ ក៏ត្រូវមានការចែករំលែកនូវបទពិសោធន៍ពីគ្នាទៅវិញទៅមក ពីសហគមន៍មួយទៅសហគមន៍មួយទៀត ព្រោះវាជាផ្នែកមួយសម្រាប់ការរីកចម្រើន ដូច្នេះ សង្ឃឹមថា តាមរយៈនៃការប្រើប្រាស់គម្រោងកម្មវិធីនានា និងការចូលរួមពីដៃគូអភិវឌ្ឍផងដែរនោះ ជោគជ័យនឹងកំណត់បាននៅពេលអនាគត ៕
អត្ថបទ និង រូបថត ៖ លោក ងិន គឹមឡេង និង លោក យូ វង្ស
កែសម្រួលអត្ថបទ ៖ លោក លីវ សាន្ត
