នៅព្រឹកថ្ងៃទី៣១ ខែកក្ដដា ឆ្នាំ២០២០ ឯកឧត្តម ងី ច័ន្ទ្រផល រដ្ឋលេខាធិការ និងជាប្រធានសម្របសម្រួលគម្រោងលាភ បានដឹកនាំកិច្ចប្រជុំគណៈកម្មាធិការតម្រង់ទិសលើកទី៣ ស្តីពី វឌ្ឍភាព និងសមទ្ធិផល នៃការអនុវត្តគម្រោងលើកកម្ពស់ជីវភាពប្រជាជនក្រីក្រ ក្នុងគោលបំណងកែសម្រួលសកម្មភាពអនុវត្តគម្រោងនាពេលកន្លងមក ដែលមានភាពរអាក់រអួល ក៏ដូចជាបញ្ហាប្រឈម ក្នុងស្ថានភាពនៃវិបត្តិជំងឺកូវីដ១៩។
គម្រោងលើកកម្ពស់ជីវភាពប្រជាជនក្រីក្រ ហៅកាត់ថា លាភ(LEAP) បង្កើតឡើងក្នុងគោលបំណង ជួយលើកកម្ពស់ជនក្រីក្រ និងក្រុមជនងាយរងគ្រោះ ក្នុងសហគមន៍ទាំងនៅទីក្រុង និងជនបទ ដើម្បីទទួលបានសេវាហិរញ្ញវត្ថុ មានឱកាសរកប្រាក់ចំណូល និងការអភិវឌ្ឍន៍ហេដ្ឋារចនាសម័្ពន្ឋខ្នាតតូច និងដើម្បីត្រៀមផ្តល់ការគាំទ្រក្នុងករណីជួបហានិភ័យ ឬគ្រោះអាសន្នណាមួយកើតឡើង ជាយថាហេតុក្នុងជម្រើសឃុំ សង្កាត់គោលដៅរបស់គម្រោង។
ថ្លែង ក្នុងកិច្ចប្រជុំនោះ ឯកឧត្តម ងី ច័ន្ទ្រផល រដ្ឋលេខាធិការ ក្រសួងមហាផ្ទៃ និងជាប្រធានសម្របសម្រួលគម្រោងលាភ មានប្រសាសន៍ថា ដោយសារវិបត្តិនៃជំងឺកូវីដ១៩ ការអនុវត្តសកម្មភាពគម្រោងមានការថយចុះ ដែលជាហេតុធ្វើឲ្យការប្រើប្រាស់ថវិកា ពុំទាន់សមស្របទៅតាមផែនការ។ បើយោងតាមកាលៈទេសៈនៃវិបត្តិជំងឺកូវីដ១៩បច្ចុប្បន្ន ថវិកាគម្រោងដែលនៅសល់គិតត្រឹមថ្ងៃ៣០ ខែមិថុនា ឆ្នាំ២០២០ ក្រុមការងារគម្រោង ពុំអាចប្រើប្រាស់អស់តាមផែនការនោះទេ ដែលទាមទារ ឲ្យមានការកែសម្រួលសកម្មភាពមួយចំនួន និងស្នើម្ចាស់ជំនួយ បន្តរយៈពេលគម្រោងដដែលនេះ។
ឯកឧត្តម រដ្ឋលេខាធិការ បានក្រើនរំលឹកដល់ អាជ្ញាធរថ្នាក់ជាតិ និងថ្នាក់ក្រោមជាតិថា ប្រទេសមួយមានការរីកចម្រើនទៅបាន គឺត្រូវមានការអភិវឌ្ឍសេដ្ឋកិច្ចជាគោល ប៉ុន្តែបើមានតែសេដ្ឋកិច្ច មួយមុខ នោះពុំអាចធានាបាននូវចីរភាពនៃកាអភិវឌ្ឍនោះទេ គឺត្រូវមានការរៀបចំនូវរដ្ឋបាលសាធារណច្បាស់លាស់ ចាប់ពីថ្នាក់ជាតិ ខេត្ត រហូតដល់មូលដ្ឋាន វាប្រៀបបាននឹងប្ដីប្រពន្ធ ប្រសិនបើមានអ្នករកលុយ ប៉ុន្តែអ្នកចាយលុយខ្ជះខ្ជាយ វាជាហេតុបង្កឲ្យបាត់បង់ប្រសិទ្ធភាពនៃការដឹកនាំប្រទេសជាតិ។
ក្នុងឱកាសនោះ លោក លី សំរិទ្ធ អភិបាលរងខេត្តសៀមរាប ទទួលបន្ទុកគម្រោង លើកឡើងថា ដើម្បីឲ្យការអនុវត្តគម្រោងនេះ កាន់តែទទួលបានប្រសិទ្ធភាព លោក លោកស្រីអភិបាលស្រុក ឬលោក លោកស្រីអភិបាលរងស្រុក ទទួលបន្ទុក មានតួនាទីយ៉ាងសំខាន់ ក្នុងការត្រួតពិនិត្យ និងវាយតម្លៃ ទៅលើកការទទួលបានប្រសិទ្ធនៃគម្រោង ដល់ក្រុមប្រជាពលរដ្ឋក្រីក្រ នៅតាមសហគមន៍។ ក្នុងនោះ អាជ្ញាធរមូលដ្ឋាន ត្រូវលើកនូវរបាយការណ៍អំពីគម្រោងលាភ នៅក្នុងកិច្ចប្រជុំក្រុមប្រឹក្សាស្រុក ដើម្បីឲ្យថ្នាក់ដឹកនាំស្រុក ទទួលបានព័ត៌មានអំពីលទ្ធផលបានអនុវត្តន៍។
គួរជម្រាបថា ការសាកល្បងគម្រោងលាភបានចាប់ផ្តើម និងដំណើរការយ៉ាងរលូនតាំងពីខែកក្កដា ឆ្នាំ២០១០ ហើយត្រូវបានបញ្ចប់គម្រោងសាកល្បងនៅឆ្នាំ២០១២។ នៅឆ្នាំ២០១៧ គម្រោងនេះ ត្រូវបានធនាគារពិភពលោក និងក្រសួងសេដ្ឋកិច្ច និងហិរញ្ញវត្ថុ បានឯកភាពដាក់បញ្ចូលឡើងវិញក្នុងបញ្ជីមុខសញ្ញាគម្រោងហិរញ្ញប្បទាន។ គម្រោង នេះដែរ បានកំណត់យកគោលដៅ នៅឃុំជនបទចំនួន៤៧ របស់ខេត្តសៀមរាប និងសហគមន៍ក្រីក្រនៃសង្កាត់ចំនួន១៣ នៅរាជធានីភ្នំពេញ។
អត្ថបទ និង រូបថត ៖ លោក សេង ផល្លី
