សម្រាប់ឆ្នាំសិក្សា២០២០-២០២១នេះ វិទ្យាស្ថានពហុបច្ចេកទេសភូមិភាគតេជោសែនសៀមរាប ស្ថិតនៅក្នុងភូមិបន្ទាយចាស់ សង្កាត់ស្លាក្រាម ក្រុងសៀមរាប បានប្រកាស ផ្ដល់អាហារូបករណ៍ ឬការសិក្សាមិនគិតថ្លៃ លើជំនាញវគ្គខ្លី និងវគ្គវែង សម្រាប់យុវជនប្រឡងជាប់ ឬធ្លាក់ថ្នាក់ទី១២ និងបោះបង់ការសិក្សា ជាង៨០០នាក់ នេះបើតាមប្រសាសន៍លោក សួង នូរ័ត្ន នាយករង វិទ្យាស្ថានពហុបច្ចេកទេសភូមិភាគតេជោសែនសៀមរាប នៅថ្ងៃទី៣០ ខែកក្កដា ឆ្នាំ២០២០។
តាមការបញ្ជាក់របស់ លោកនាយករងវិទ្យាស្ថាន យុវជនដែលមានបំណងចង់រៀនជំនាញ ឬ រកការងារធ្វើ ពួកគេអាចទាក់ទងដោយផ្ទាល់នៅវិទ្យាស្ថាន ឬអាចសាកសួរមេភូមិ ឬមេឃុំ ចៅសង្កាត់ ក្នុងមូលដ្ឋានសម្រាប់ព័ត៌មានអំពីវិទ្យាស្ថាន ។ ជាមួយនោះ សម្រាប់ការផ្ដល់អាហារូបករណ៍ លើការសិក្សាជំនាញវគ្គវែង ចាំបាច់យុវជនត្រូវប្រឡងជាប់ថ្នាក់ទី១២ ឬមានបរិញ្ញាបត្ររង។ ដោយឡែក សម្រាប់ការផ្ដល់អាហារូបករណ៍ លើការសិក្សាជំនាញវគ្គខ្លី ពុំចាំបាច់មានសញ្ញាបត្រប្រឡងជាប់ថ្នាក់ទី៩ ឬថ្នាក់ទី១២ឡើយ។
ចំពោះជំនាញសិក្សា មានច្រើនជម្រើស ដែលសាកសមទៅនឹងកាយសម្បទា របស់យុវជន រួមមាន គណនេយ្យ វិទ្យាសាស្រ្តកុំព្យូទ័រ សំណង់ស៊ីវិល វិស្វកម្មអគ្គិសនី វិស្វកម្មបរិក្ខារត្រជាក់ តម្លើងបណ្ដាញបំពង់ទឹក សណ្ឋាគារ ។ល។ ជាពិសេស វិទ្យាស្ថាន ផ្ដល់អាទិភាពចំពោះ ស្ត្រី ជនពិការ ជនក្រីក្រ និងជនជាតិដើមភាគតិច។
លោកនាយករងវិទ្យាស្ថាន ក៏បានលើកទឹកចិត្តដល់ យុវជន ដែលបានបោះបង់ការសិក្សារយៈពេលយូរ និងចង់មានជំនាញច្បាស់លាស់ អាចជ្រើសកម្មវិធីសិក្សាចំនួន២ ដើម្បីអាចទៅសិក្សាជំនាញវគ្គវែងបន្តទៀតបាន គឺ ១. កម្មវិធីសិក្សាស្ពានចម្លង បន្តជំនាញ និង កម្មវិធី សមមូលអប់រំមូលដ្ឋាន តាមអ៊ីនធើណិត ដោយពុំចាំបាច់រៀននៅក្នុងថ្នាក់ឡើយ។
លោក សួង នូរ័ត្ន នាយករង វិទ្យាស្ថានពហុបច្ចេកទេសភូមិភាគតេជោសែនសៀមរាប ក៏បានអំពាវនាវ ដល់ប្រជាពលរដ្ឋទាំងអស់ ជាពិសេសយុវជន ត្រូវស្វែងរកព័ត៌មានបន្ថែមដោយខ្លួនឯងផ្ទាល់ ដើម្បីទទួលបានការសិក្សាជំនាញសម្រាប់អនាគត ក៏ដូចជាឱកាសការងារល្អៗ ចៀសវាងការរង់ចាំទទួលព័ត៌មាន ឬការផ្សព្វផ្សាយដល់មូលដ្ឋាន។
អត្ថបទ និង រូបភាព៖ មន្ទីរព័ត៌មានខេត្តសៀមរាប
