នៅថ្ងៃទី៣០ ខែកក្កដា ឆ្នាំ២០២០នេះ មន្ទីរពេទ្យកុមារអង្គរ បានទទួលអង្ករ១០តោនកន្លះ និងផលិតផលទឹកពិសា វីតាល់ជាច្រើនកេស ដើម្បីជាការឧបត្ថម្ភជូនដល់មន្ទីរពេទ្យកុមារអង្គរ ដែលជាមន្ទីរពេទ្យព្យាបាលកុមារ មិនគិតថ្លៃដ៏ល្បីល្បាញមួយ នៅខេត្តសៀមរាប ។
បើតាមលោក ជុនហៀង ថាវសិទ្ធិ ប្រធានផ្នែកពាណិជ្ជកម្ម ក្រុមហ៊ុនវីតាល់ មានប្រសាសន៍ថា បន្ទាប់បានរួមចំណែក ជាមួយរដ្ឋាភិបាលកម្ពុជា ក្នុងការជួយសង្រ្គោះកុមារកម្ពុជា ពេលនេះវីតាល់បានបន្តរសកម្មភាព មនុស្សធម៌ ទៅកន្លែងដែលត្រូវការជំនួយបំផុត។ ក្នុងនោះមន្ទីរពេទ្យកុមារអង្គរ គឺជាកន្លែងស័ក្កសម ព្រោះមន្ទីរពេទ្យ បានធ្វើការយ៉ាងល្អលើការស្រោចស្រង់ជីវិត និងសុខភាពកុមារកម្ពុជារាប់លាននាក់ជារៀងរាល់ឆ្នាំ ។
បើតាមលោក ជុនហៀង ថាវសិទ្ធិ បន្ថែមថា នេះជាឆ្នាំទី២ដែលវីតាល់ ឧបត្ថម្ភអង្ករ១០តោនជូនមន្ទីរពេទ្យ បន្ទាប់ពីក្រុមហ៊ុនបានចុះកិច្ចព្រមព្រៀងឧបត្ថម្ភអង្ករ ១០តោនក្នុង១ឆ្នាំ រយៈពេល ៣ឆ្នាំ កាលពីឆ្នាំ២០១៩ ។ ក្នុងនោះក្រុមហ៊ុនវីតាល់ តែងយកចិត្តទុកដាក់លើសកម្មភាពភាពមនុស្សធម៌ ហើយក្រុមការងារយើង បានយល់ដឹងច្បាស់ពីគុណតម្លៃនៃមន្ទីរពេទ្យកុមារអង្គរ ដែលបានធ្វើការយ៉ាងសកម្មជួយសង្គ្រោះជីវិតកុមារកម្ពុជា រាប់រយនាក់ជារៀងរាល់ថ្ងៃ ។ ចំពោះការចូលរួមរបស់យើងក្នុងថ្ងៃនេះជាមួយមន្ទីរពេទ្យកុមារអង្គរ បានមកពីមូលនិធិ២៥រៀល របស់វីតាល់ដែលយើងតែងដកថវិកា២៥រៀល ពីការលក់វីតាល់ក្នុងមួយដប សម្រាប់ចូលរួមក្នុងការងារសង្គមនានា។ ជាមួយនឹងមូលនិធិ២៥រៀលនេះ យើងនឹងបន្តពង្រឹងវិសាលភាពនៃសកម្មភាពមនុស្សធម៌ជាច្រើនរូបភាពបន្ថែមទៀត ដើម្បីអតិថិជន សង្គម និងការអភិវឌ្ឍដោយមាននិរន្តរភាពទៅថ្ងៃអនាគត»។
ព័ត៌មានជាតិ ថ្មីៗ
បើតាមលោក ទេព ណាវី នាយកប្រត្តិបត្តិការនៃមន្ទីពេទ្យកុមារអង្គរ បានបញ្ជាក់ថា ក្នុងមួយថ្ងៃៗ មន្ទីពេទ្យកុមារអង្គរ ទទួលព្យាបាលកុមារក្រីក្រកម្ពុជាប្រមាណ៥០០ ទៅ៦០០នាក់ ដែលធ្វើដំណើរពីបណ្តារខេត្តនានា ដោយត្រូវចំណាយថវិកាប្រមាណជា៦លានដុល្លាក្នុងមួយឆ្នាំ។ ក៏ព្រោះតែប្រជាពលរដ្ឋដែលនាំកូនចៅ ទៅទទួលសេវាកម្មនៅមន្ទីរ ពេទ្យកុមារអង្គរភាគ ច្រើនមានជីវភាពខ្សត់ខ្សោយ អ្នកខ្លះខ្វះស្បៀងខ្លាំង បានធ្វើឲ្យកុមារឈឺ ដោយជម្ងឺកង្វះជីវជាតិ។ ដូច្នេះក្រៅការផ្តល់សេវាកម្មព្យាបាលដ៏យកចិត្តទុកដាក់ មន្ទីពេទ្យកុមារអង្គរក៏មានបន្ថែមនូវ ការផ្តល់ ចំនីអាហារបំប៉នសម្រាប់កុមារ និងអាណាព្យាបាលរបស់ពួកគេ ។
ក្នុងឱកាសនោះដែរ លោក ទេព ណាវី ក៏បានស្ញើចសរសើរដល់ក្រុមហ៊ុនវីតាល់ ដែលជាក្រុមហ៊ុនជាតិគំរូ ដោយតែងយកចិត្តទុកដាក់ដល់កម្មវិធីមនុស្សធម៌ ។ លោកក៏បានបានថ្លែងអំណរគុណដល់ក្រុមហ៊ុន ដែលបានជួយគាំទ្រមន្ទីរពេទ្យកុមារអង្គរ តាមរយៈការឧបត្ថម្ភអង្ករ១០តោនក្នុង១ឆ្នាំ។ ការចូលរួមនេះ បានជួយលើកទឹកចិត្តដល់មន្ទីរពេទ្យ និងក្រុមការងារឲ្យកាន់តែមានកម្លាំងចិត្តបម្រើសេវាកម្ម ពិនិត្យព្យាបាលកុមារកម្ពុជាឲ្យកាន់តែល្អប្រសើរឡើងទៀត ខណៈមន្ទីរពេទ្យកំពុងត្រូវការជំនួយនេះ។
គួរបញ្ជាក់ផងដែរថា វីតាល់ ជាក្រុមហ៊ុនរបស់ខ្មែរ ដែលបានដំណើរកាលអស់រយៈពេល ១០ឆ្នាំមកហើយ និងបានទទួលការគាំទ្រយ៉ាងខ្លាំងពីសំណាក់ប្រជាជនកម្ពុជា ។ តាមរយៈមូលនិធិ២៥រៀល កន្លងមក វីតាល់ តែងចូលរួមយ៉ាងសកម្មក្នុងកិច្ចការសង្គម នានាដោយផ្តោតលើវិស័យ៤ធំៗ រួមមាន ១. វប្បធម៌ និងសាសនា ២. កីឡា និងសុខភាព ៣.បរិស្ថាន និង ៤.អប់រំ ៕
អត្ថបទ និង រូបភាព៖ ខេង ឧត្តម
កែសម្រួល៖ អ៊ុន ណារាជ្យ
