រថយន្តសម្អាតផ្លូវចំនួន២គ្រឿង និង ម៉ាស់ចំនួន២ម៉ឺន២ពាន់ម៉ាស់ ដែលជាជំនួយរបស់ប្រជាជនខេត្តយូណាន នៃសាធារណរដ្ឋប្រជាមានិតចិន ត្រូវបានប្រគល់ជូនដល់រដ្ឋបាលខេត្តសៀមរាប នៅសាលាខេត្តកាលពីរសៀលថ្ងៃទី០៥ ខែ សីហា ឆ្នាំ២០២០ម្សិលមិញនេះ ក្រោមវត្តមានឯកឧត្តម LIU ZHI JIE ប្រធានការិយាល័យកុងស៊ុលចិនប្រចាំខេត្តសៀមរាប , លោក YANG ZHAO អនុប្រធានក្រុមប្រឹក្សាភិបាលអគ្គនាយក នៃក្រុមហ៊ុនវិនិយោគអាកាសយានដ្ឋានអន្តរជាតិអង្គរ និង ពិន ប្រាកដ អភិបាលរងខេត្ត តំណាងដ៏ខ្ពង់ខ្ពស់ឯកឧត្ដម ទៀ សីហា អភិបាល នៃគណៈអភិបាលខេត្តសៀមរាប ។
លោក YANG ZHAO អនុប្រធានក្រុមប្រឹក្សាភិបាលអគ្គនាយក នៃក្រុមហ៊ុនវិនិយោគអាកាសយានដ្ឋានអន្តរជាតិអង្គរ បានបញ្ជាក់ថា ការផ្តល់នូវរថយន្តសម្អាតបរិស្ថាននេះ គឺជាសមិទ្ធផលសង្គម ដែលប្រកបដោយប្រសិទ្ធភាព ដើមី្បគាំទ្រក្នុងកិច្ចអភិវឌ្ឍន៍ក្រុងទេសចរណ៍ប្រវត្តិសាស្ត្រសៀមរាប ឲ្យកាន់តែមានសោភ័ណភាពដ៏ស្រស់ត្រកាលឡើងថែមទៀត ខណៈដែលខេត្តយូណាន និង ខេត្តសៀមរាប បានចងសម្ព័ន្ធមេត្រីភាពនឹងគ្នាជាយូឆ្នាំមកហើយ ព្រមទាំងមានកិច្ចទំនាក់ទំនងសហប្រតិបត្តិការល្អនឹងគ្នា ជាពិសេសក្នុងរយៈពេលកន្លងមក អាជ្ញាធរខេត្តសៀមរាប តែងតែធ្វើការគាំទ្រ និង សម្របសម្រួលរាលសកម្មភាព របស់ក្រុមហ៊ុនក្នុងកិច្ចដំណើរការកសាងអាកាសយានដ្ឋានអន្តរជាតិ ហើយគម្រោងនេះ ក្រុមហ៊ុននឹងស្ថាបនាឲ្យបានរួចរាលនៅក្នុងឆ្នាំ២០២៣ ។
លោក ពិន ប្រាកដ អភិបាលរងខេត្តសៀមរាប មានប្រសាសន៍ថា ក្នុងនាមឯកឧត្តម ទៀ សីហា អភិបាលខេត្ត សូមសម្តែងនូវអំណរគុណចំពោះប្រជាជនខេត្តយូណាន ក៏ដូចក្រុមហ៊ុនវិនិយោគអាកាសយានដ្ឋានអន្តរជាតិអង្គរ ដែលបានផ្តល់នូវរថយន្តសម្អាតបរិស្ថានតាមដងផ្លូវក្នុង ក្រុងសៀមរាប ចំនួន០២គ្រឿង រួមទាំងម៉ាស់ចំនួន២ម៉ឺន២ពាន់ម៉ាស់ ជូនដល់រដ្ឋបាលខេត្តសៀមរាប ស្របពេលដែលខេត្តសៀមរាប កំពុងធ្វើការអភិវឌ្ឍន៍ ហើយជាការចាំបាច់បំផុតរបស់រដ្ឋបាលខេត្តសៀមរាប ដើមី្បធ្វើការសម្អាតអនាម័យ បរិស្ថានក្នុងក្រុងទេសចរណ៍មួយនេះ ឲ្យកាន់តែស្រស់ ស្អាត ប្រកបដោយបរិស្ថាន អនាម័យល្អ ក្នុងការទទួលស្វាគមន៍ភ្ញៀវទេសចរណ៍ជាតិ អន្តរជាតិ ចូលមកទស្សនាកម្សាន្ត ។
លោក ពិន ប្រាកដ មានប្រសាសន៍ទៀតថា ទោះបីនៅលើពិភពលោកជួបនូវបញ្ហាវបត្តិកូវីដ១៩ក៏ពិតមែន តែអាជ្ញាធរខេត្តសៀមរាប ក៏មិនប្រងើយកន្តើយលើកិច្ចអភិវឌ្ឍខេត្តដែរ ដោយបានធ្វើការជួសជុល និង ស្ថាបនាឡើងវិញនូវហេដ្ឋារចនាសម្ព័ន្ធក្នុងខេត្ត ដើមី្បធ្វើឲ្យខេត្តសៀមរាប កាន់តែមានភាពទាក់ទាញដល់ភ្ញៀវទេសចរណ៍ទៀតផង ៕
អត្ថបទ និង រូបថត ៖ លោក គឿន វេត
កែសម្រួលអត្ថបទ ៖ លោក លីវ សាន្ត
