នៅព្រឹកថ្ងៃទី០៦ ខែសីហា ឆ្នាំ២០២០នេះ ប្រតិភូក្រសួងព័ត៌មាន តំណាងឯកឧត្តម ជា ច័ន្ទបរិបូណ៌ រដ្ឋលេខាធិការក្រសួងព័ត៌មាន និងជាប្រធានក្រុមការងាររាជរដ្ឋាភិបាល ចុះជួយស្រុកក្រឡាញ់ បានចុះពិនិត្យមើលស្ថានភាព កម្មវិធីឧបត្ថម្ភធន ក្នុងគម្រោងសាកល្បងចំនួន ២ រួមមានគម្រោងចិញ្ចឹមកង្កែប និងគម្រោងដាំឫស្សីទំពាំងផ្អែម ដែលជាគំនិតផ្តួចផ្តើម របស់ឯកឧត្តម ជា ច័ន្ទបរិបូណ៌ ស្ថិតក្នុង ឃុំតាអាន និងឃុំក្រឡាញ់ ស្រុកក្រឡាញ់ ខេត្តសៀមរាប។
តាមប្រសាសន៍ ឯកឧត្តមបណ្ឌិត ហុង សុខជា ទីប្រឹក្សាក្រសួងព័ត៍មាន ចំពោះគ្រួសារ ប្រភេទ ក្រ១ និងក្រ២ ដែលបានជ្រើសរើស សម្រាប់សាកល្បងនេះ បានកើនឡើង១គ្រួសារបន្ថែមទៀត សរុបចំនួន ១១គ្រួសារ ដែលបានចាប់ផ្តើមដំណើរការអស់រយ:ពេលជាងកន្លះខែមកហើយ។ ទន្ទឹមនោះ ក្រុមការងាររាជរដ្ឋាភិបាល ចុះជួយស្រុកក្រឡាញ់ រួមនិងអាជ្ញាធរស្រុកក្រឡាញ់ នឹងស្វែងរកទីផ្សារសម្រាប់លក់កសិផល ជូនប្រជាពលរដ្ឋផងដែរ។
លោក សុខ ណារ៉េត អភិបាលរងស្រុកក្រឡាញ់ លើកឡើងថា ចំពោះកង្កែប កសិករចាំបាច់ត្រូវការដើមទុនដើម្បីធ្វើអាងទឹកចិញ្ចឹម ទិញកូន និងចំណី និងអាចប្រមូលផលបានយ៉ាងយូរ ៥០ថ្ងៃ។ ដោយឡែក ការដាំឫស្សី គឺចែកជូនក្នុងចំនួនសមរម្យ ដោយកសិករចំណាយតែកម្លាំងមើលថែតែប៉ុណ្ណោះ។ ជាមួយនោះ គ្រូបង្គោលចំនួន២រូប នឹងជួយណែនាំ ដល់ប្រជាពលរដ្ឋទាំង១១គ្រួសារ អំពីបច្ចេកទេសផ្សេងៗ។
គួររំលឹកថា កម្មវិធីឧបត្ថម្ភធន ក្នុងគម្រោងសាកល្បង ជំហានទី១នេះ គ្រួសារក្រីក្រ ប្រភេទក្រ១ និងក្រ២ ទទួលបានពូជកូនឫស្សីទំពាំងផ្អែមមួយចំនួន និង ថវិកាក្នុងមួយគ្រួសារ ចំនួន ៣៥៣,០០០រៀល ដើម្បីចំណាយថ្លៃទិញកូនកង្កែ ចំនួន ៥០០ក្បាល ការធ្វើទ្រុង និងថ្លៃចំណី ដែលជាថវិកាផ្ទាល់របស់ឯកឧត្តម ជា ច័ន្ទបរិបូណ៌ និងសប្បុរសជន។
អត្ថបទ និង រូបថត ៖ លោក ស៊ាន សុផាត
កែសម្រួលអត្ថបទ ៖ លោក សេង ផល្លី
