ក្រោមកិច្ចសហការរវាងរដ្ឋបាលខេត្ត និង អង្គការ DCA បានរៀបចំបើកសិក្ខាសាលាផ្សព្វផ្សាយ ស្តីពីយន្តការតាមដាន និងឆ្លើយតបនូវភាពរាំងស្ងួតសម្រាប់ខេត្តសៀមរាប នៅសាលប្រជុំសាលាខេត្ត កាលពីព្រឹកថ្ងៃទី០៦ ខែសីហា ឆ្នាំ២០២០នេះ ក្រោមអធិបតីភាព លោក ចឹក គឹមជុន ជាអនុប្រធានអចិន្រៃ្តយ៍នៃគណៈកម្មាធិការគ្រប់គ្រងគ្រោះមហន្តរាយខេត្ត តំណាងដ៏ខ្ពង់ខ្ពស់ឯកឧត្ដម ទៀ សីហា អភិបាលខេត្តសៀមរាប ដោយមានការចូលរួមពីសំណាក់លោក លោកស្រី ជាសមាជិកនៃគណៈកម្មាធិការគ្រប់គ្រងគ្រោះមហន្តរាយខេត្តសៀមរាប ។
លោក ណុប ប៉ូលីន តំណាងអង្គការ DCA បានបញ្ជាក់ថា គោលបំណងនៃអង្គសិក្ខាសាលានេះ គឺដើម្បីផ្សព្វផ្សាយអំពីតួនាទី ភារកិច្ច ការទទួលខុសត្រូវ ការធ្វើផែនការ និង ការធ្វើសូចនាករសម្រាប់តាមដាននូវភាពរាំងស្ងួត ឆ្លើយតបភាពរាំងស្ងួតសម្រាប់ខេត្តសៀមរាប ឲ្យកាន់តែមានប្រសិទ្ធភាព ព្រោះថា បើយើងមិនបានគិតគូរឲ្យបានល្អិតល្អន់ជាមុនទេនេះ យើងនឹងមានបញ្ហាប្រឈមសម្រាប់ជួយដល់ជនរងគ្រោះនៅតាមមូលដ្ឋាននានាក្នុងខេត្ត ដូច្នេះសូមឲ្យសិក្ខាកាមទាំងអស់ យកចិត្តទុកដាក់ក្នុងកិច្ចពិភាក្សាគ្នាឲ្យបានផុលផុស និង ស៊ីជម្រៅ ។
លោក ចឹង គឹមជុន អនុប្រធានអចិន្រៃ្តយ៍នៃគណៈកម្មាធិការគ្រប់គ្រងគ្រោះមហន្តរាយខេត្ត មានប្រសាសន៍ថា ថ្វីត្បិតតែកិច្ចសហការរវាងរដ្ឋបាលខេត្តជាមួយអង្គការDCA និងអង្គការនានា មានរយៈពេលខ្លីពិតមែន តែវាបានជួយការងារយ៉ាងច្រើនក្នុងការជៀសផុតពីគ្រោះធម្មជាតិក្នុងខេត្ត ដែលធ្វើឲ្យយើងបានដឹងមុន ហើយចាត់វិធានការ និង ទប់ស្កាត់នូវគ្រោះថ្នាក់ធម្មជាតិនានាបានទាន់ពេលវេលា ក្នុងការឆ្លើយតបភាពរាំងស្ងួតសម្រាប់ខេត្តសៀមរាបយើងនេះជាពិសេសការរៀបចំបានជាសៀវភៅគោលសម្រាប់គ្រោះរាំងស្ងួត ។
លោក ចឹង គឹមជុន មានប្រសាសន៍ទៀតថា ក្រៅពីគ្រោះរាំងស្ងួតនេះ គ្រោះទឹកជំនន់ បញ្ហាខ្យល់កន្ត្រាក់ និង បញ្ហារន្ទះ វាជាបញ្ហាប្រឈមមួយសំខាន់ខ្លាំងណាស់ដែរ ដែលបញ្ហាទាំងអស់នេះតែងតែកើតមានឡើងជារៀងរាល់ឆ្នាំទោះបីតិចក្ដី ច្រើនក្ដី តែវាបានធ្វើឲ្យប៉ះពាល់ដល់លំនៅដ្ឋាន ផលដំណាំ អាយុជីវិត ទាំងមនុស្ស និង សត្វទៀតផង ដូច្នេះសិក្ខាសាលាយើងថ្ងៃនេះ ពិតជាមានសារៈសំខាន់ខ្លាំងណាស់ ដែលយើងត្រូវពិភាក្សាគ្នាឲ្យបានគ្រប់ជ្រុងជ្រាយ ដើម្បីទប់ស្កាត់ និង ដោះស្រាយបានទាន់ពេលវេលា ក្នុងករណីកើតមានឡើងនូវគ្រោះមហន្តរាយដោយធម្មជាតិនេះ ។
សូមបញ្ជាក់ថា ក្នុងឱកាសនោះដែរ អង្គការ DCA បានផ្ដល់ជូននូវឧបករណ៍សម្រាប់វាស់សំណើមដី ចំនួន៥គ្រឿង ជូនដល់មន្ទីរកសិកម្ម រុក្ខាប្រមាញ់ និងនេសាទខេត្តសៀមរាប ដើម្បីមានភាពងាយស្រួលក្នុងការតាមដានព័ត៌មានគ្រោះរាំងស្ងួត ដើម្បីចែករំលែកព័ត៌មានបានទាន់ពេលវេលាដល់អ្នកពាក់ព័ន្ធ និង ផ្ដល់ជូនកុំព្យូទ័រ១គ្រឿងទៀត ដល់មន្ទីរធនធានទឹក និងឧតុនិយមខេត្តសៀមរាប ៕
អត្ថបទ និង រូបថត ៖ លោក ហាំ ម៉េងហួត
កែសម្រួលអត្ថបទ ៖ លោក លីវ សាន្ត
