បើតាមអ្នកស្រី ព្រឿន ពេជ្រ ជាកសិករនៅភូមិគោកស្រុក ឃុំរលួស ស្រុកប្រាសាទបាគង បានឲ្យដឹងនៅព្រឹកថ្ងៃ០៧ ខែសីហា ឆ្នាំ២០២០នេះថា កាលពីឆ្នាំ២០១៩ ដំាណាំស្លឹកគូរឆាយ ពួកគាត់អាចលក់អោយអ្នកកម្ម៉ង់ទិញចាប់ពី ៦០គីឡូក្រាម ទៅ១០០គីឡូក្រាមក្នុងមួយថ្ងៃ ដែលអាចផ្គត់ផ្គង់ជីវភាពប្រចាំថ្ងៃបានល្អប្រសើរ ។ ចំពោះស្លឹកគូរឆាយក្នុងមួយគីឡូក្រាម អាចលក់បានពី ២៥០០រៀល ទៅ៤០០០រៀល ហើយមានស្លឹគីរឆាយប៉ុន្មាន គឺអ្នកកំម៉ង់ទិញយកទាំងអស់ ។ ក្នុងនោះដែរ ស្លឹកគូរឆាយនេះងាយស្រួលដាំ ដោយប្រើរយៈពេល១៥ថ្ងៃអាចទទួលផល ប៉ុន្ដែក្រោយពេលមានបញ្ហាជំងឺកូវីដ១៩នេះ ពួកគាត់បានបាត់បង់ទីផ្សារគួរអោយព្រួយបារម្ភ ខណៈដែលក្នុងអំឡុងពេលកូវីដ១៩នេះ គ្មានមុខរបរផ្សេងទៀតក្រៅពីដំណាំស្លឹកគូរឆាយនេះ ។
ជាកសិករមួយរូបទៀត អ្នកស្រី ព្រឿន ស្រី បានអោយដឹងដែរថា កាលពីស្លឺកគូរឆាយមានទីផ្សារគ្រប់គ្រាន់ គឺគ្មានប្រជាកសិករធ្វើចំណាកស្រុកពោលកសិករមានការងារធ្វើគ្រប់គ្រាន់ ក្រៅពីធ្វើស្រែដែលធ្វើអោយប្រជាកសិករ មានជីវភាពគ្រួសារល្អប្រសើរ ប៉ុន្តែនៅពេលបច្ចុប្បន្នេះ ពោលចាប់ពីជំងឺកូវីដ១៩នេះផ្ទុះឡើង ភ្ញៀវទេសចរណ៍ក៍អស់ទីផ្សារស្លឹគូរឆាយក៍គ្មាន ព្រោះស្លឹគូរឆាយជាប្រភេទដាំណាំម្ស៉ាង ដែលភាគច្រើនភ្ញៀវទេសចរបរទេសចូលចិត្ដទទួលទាន ។
អ្នកស្រីបានបន្ដថា ការធ្លាក់ចុះទីផ្សារស្លឹកគូរឆាយនេះ បានធ្វើអោយប៉ះពាល់ដល់ការរស់នៅរបស់ប្រជាកសិករផងដែរ ដោយពួកគាត់អំពាវនាវដល់អាជ្ញាធរជួយធ្វើយ៉ាងបង្កើតទីផ្សារនេះឡើងវិញដើម្បីជួយសម្រួលជីវភាពគ្រួសារកសិករ ។
គួរជម្រាបជូនថា កាលពីពេលថ្មីៗកន្លងទៅ លោក សូរ ប្លាតុង អភិបាលស្រុកប្រាសាទបាគង បានបញ្ជាក់ថា ភូមិគោកស្រុក ជាភូមិមួយ ស្ថិតក្នុង ឃុំរលួសមានផ្ទៃដីសរុបចំនួន២៦៥ហិកតា មានប្រជាពលរដ្ឋ សរុបចំនួន៣០១ គ្រួសារ នឹងមានពលរដ្ឋសរុបចំនួន ១២៥៩នាក់ ស្រី៦៨៨នាក់ ។ពលរដ្ឋនៅក្នុងភូមិនេះ ភាគច្រើនមានមុខរបរ កសិកម្ម ដាំដុះជាលក្ខណៈគ្រួសារ ក្នុងនោះក៏មាន ដាំស្លឹកគូឆាយ និងធ្វើនំគូឆាយ ដើម្បីផ្គត់ផ្គង់លើទីផ្សារ ក្នុងក្រុងសៀមរាប និងបណ្តារស្រុកមួយចំនួនទៀតផងដែរ ៕
អត្ថបទ និង រូបភាព៖ បូ សាវី
កែសម្រួល៖ អ៊ុន ណារាជ្យ
