នៅព្រឹកថ្ងៃទី០៧ ខែសីហា ឆ្នាំ២០២០នេះ សាខាកាកបាទក្រហមកម្ពុជាខេត្តសៀមរាប បានបើកវគ្គផ្សព្វផ្សាយ ស្តីពីសុវត្ថិភាពចរាចរណ៍ និងពិការភាព គម្រោងដាក់បញ្ចូលពិការភាពក្នុងការងារសុវត្ថិភាពចរាចរណ៍ ក្នុងគោលបំណងចូលរួមកាត់បន្ថយអត្រាការស្លាប់ របួស នឹងពិការភាពដោយគ្រោះថ្នាក់ចរាចរណ៍ ដែលមន្ត្រីគម្រោងសុវត្ថិភាពចរាចរណ៍ និងយុវជនស្ម័គ្រចិត្តសាខាកាកបាទក្រហមកម្ពុជាខេត្តសៀមរាប ដឹកនាំដោយលោកស្រី សំ សាវ៉ាង មន្ត្រីគម្រោងសុវត្ថិភាពចរាចរណ៍ សាខាកាកបាទក្រហមកម្ពុជាខេត្តសៀមរាប និងមានការចូលរួមពីយុវជនស្ម័គ្រចិត្តកាកបាទក្រហម សិក្សានុសិស្សជាច្រើននាក់ នៅក្នុងបរិវេណវិទ្យាល័យ ហ៊ុន សែន ស្វាយធំ ខេត្តសៀមរាប ។
បើតាមលោកស្រី សំ សាវ៉ាង បង្ហាញ់ថា បច្ចុប្បន្ននេះគ្រោះថ្នាក់ចរាចរណ៍ គឺជាបញ្ហាប្រឈមដ៏ធំរបស់ប្រទេសកម្ពុជា វាបានសម្លាប់មនុស្សជារៀងរាល់ថ្ងៃ បានធ្វើឱ្យបាត់បង់ធនធានមនុស្ស បន្សល់ទុកនូវកុមារកំព្រា ស្រ្តី មេម៉ាយ ជនពិការ ប៉ះពាល់ដល់សេដ្ឋកិច្ចប្រទេសជាតិ និងខូចខាតសណ្តាប់ធ្នាប់សង្គម គឺបណ្តាលមកពីអ្នកប្រើប្រាស់ផ្លូវ មិនគោរពច្បាប់ចរាចរណ៍ បើកបរក្រោមឥទ្ធិពលគ្រឿងស្រវឹង បើកបរហួសល្បឿនកំណត់ និងមិនពាក់មួកសុវត្ថិភាព នៅពេលធ្វើដំណើរផងដែរ ។
ក្នុងនោះដែរ លោកស្រី សំ សាវ៉ាង ក៏បានជំរុញដល់ប្អូនៗសិស្សានុសិស្សទាំងអស់ដែលបានចូលរួម សូមជួយណែនាំបងប្អូនយើងនៅក្នុងសមាជិគ្រួសារ និងអ្នកជិតខាង ឱ្យពួកគាត់ពេលបើកបរត្រូវពាក់មួក និងពាក់ខ្សែក្រវ៉ាត់សុវត្ថិភាពឱ្យបានជាប់ជាប្រចាំ បើកបរទៅតាមល្បឿនកំណត់ គោរពស្លាកសញ្ញាតាមដងផ្លូវ ជាដើម ដើម្បីជៀសវាងនៅការគ្រោះថ្នាក់ដោយយថាហេតុណាមួយបានកើតឡើង ។ ជាពិសេសនៅពេលដែលសិស្សានុសិស្ស ដែលបានមកចូលរួមនៅក្នុងកម្មវិធីនេះ យើងបានណែនាំរៀបចំឲ្យពួកគាត់រក្សានៅគម្លាតពីគ្នា នឹងការប្រើប្រាស់អនាម័យជាប្រចាំដោយទឹកសាប៊ូ ឬទឹកអាកុល ចែលជាដើម ។
គួរបញ្ជាក់ផងដែរថា ចំពោះវគ្គបណ្តុះបណ្ដាលនេះ ក្រុមការងារក៏ណែនាំដល់សិស្សានុសិស្ស ពីរបៀបនៃការមួកពាក់មួកសុវត្ថិភាព ឲ្យបានត្រឹមត្រូវ ផលប៉ះពាល់នៃការបើកបរក្រោមឥទ្ធិពលគ្រឿងស្រវឹង អប់រំផ្សព្វផ្សាយតាមថ្នាក់រៀន បានបង្រៀនអំពីរបៀបឆ្លងផ្លូវដោយសុវត្ថិភាព ហើយមានចែកខិតប័ណ្ណសុវត្ថិភាពចរាចរណ៍ ផ្សព្វផ្សាយព័ត៌មានពីស្ថានភាពគ្រោះថ្នាក់ចរាចរណ៍ វិធីពាក់មួកសុវត្ថិភាព ឱ្យបានត្រឹមត្រូវ និងសារសំខាន់ៗ នៃសុវត្ថិភាព “ថ្ងៃនេះថ្ងៃស្អែកកុំឱ្យមានគ្រោះថ្នាក់ចរាចរណ៍’’ និងស្ទិកខ័រចំណាំងផ្លាតជនពិការផងដែរ >
អត្ថបទ និង រូបភាព៖ លោក ស៊ាន សុផាត
កែសម្រួល៖ អ៊ុន ណារាជ្យ
