នៅព្រឹកថ្ងៃទី០៧ ខែសីហា ឆ្នាំ២០២០នេះ លោក ពិនប្រាកដ អភិបាលរងខេត្ត តំណាងដ៏ខ្ពង់ខ្ពស់ ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប អមដំណើរដោយលោក លោកស្រី ជាថ្នាក់ដឹកនាំមន្ទីរ អង្គភាពនានាក្នុងខេត្ត និងអាជ្ញាធរស្រុកប្រាសាទបាគង បាននាំយកអំណោយរបស់រាជរដ្ឋាភិបាលកម្ពុជា ចែកជូនដល់ប្រជាពលរដ្ឋរងគ្រោះដោយគ្រោះធម្មជាតិ និងជនចាស់ជរាក្រីក្រចំនួន ១១៥គ្រួសារ នៅក្នុងឃុំទាំង០២ គឺឃុំបាគង និងឃុំកន្រ្ទាំង នៃស្រុកប្រាសាទបាគង ដែលផ្ដល់តាមរយៈមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ត ដោយក្នុងមួយគ្រួសារទទួលបានអង្ករ ២០គីឡូក្រាម ,មី១កេស , ត្រីខ១យួរ , ទឹកត្រី១យួរ និងប៊ីចេង១កញ្ចប់ផងដែរ ។
បើតាមលោក អោ ម៉ៅ ប្រធានមន្ទីរសង្គមកិច្ចអតីតយុទ្ឋជន និងយុវនិតិសម្បទាខេត្ត បានបង្ហាញថា គិតត្រឹមខែសីហាឆ្នាំ២០២០កន្លងទៅ បានចែកជូនដល់ចាស់ជរាក្រីក្រនៅតាមសហគមន៍ ក្នុងស្រុកចំនួន៤ មានស្រុកស្រីស្នំ ស្វាយលើ ពួក និងស្រុកសូទ្រនិគមន៍ និងគ្រួសាររងគ្រោះដោយគ្រោះធម្មជាតិ ចំនួន ១៥៩១គ្រួសារបូកទាំងស្រុកប្រាសាទបាគងចំនួន ១១៥គ្រួសារទៀតទាំងអស់ចំនួន១៧០៦គ្រួសារ ។ នៅពេលខាងមុខ មន្ទីរនឹងបន្តរៀបចំផែនការជាជំហ៊ានបន្តបន្ទាប់ដើម្បីជួយស្រោចស្រង់ ក្រោមរូបភាពនាំយកអំណោយរបស់រាជរដ្ឋាភិបាល ទៅចែកជូនប្រជាពលរដ្ឋរងគ្រោះដទៃៗទៀត តាមស្ថានភាពចាំបាច់របស់គ្រួសាររងគ្រោះ ។
ថ្លែងក្នុងឱកាសនោះ លោក ពិន ប្រាកដ ក្នុងនាមអាជ្ញាធរខេត្ត សូមសម្ដែងនូវអំណរគុណ យ៉ាងជ្រាលជ្រៅ ចំពោះប្រមុខរាជរដ្ឋាភិបាលកម្ពុជា ដឹកនាំដោយសម្តេចតេជោ ហ៊ុន សែន នាយករដ្ឋមន្ត្រី ដែលជានិច្ចកាល តែងយកចិត្តទុកដាក់ខ្ពស់នូវសុខទុក្ខរបស់ប្រជាពលរដ្ឋគ្រប់មូលដ្ឋាន ដែលជួបប្រទះនូវភាពក្រីក្រ និង គ្រោះធម្មជាតិផ្សេងៗ ខណៈដែលសម្ដេចតេជោ ធ្លាប់បានមានប្រសាសន៍ថា មិនទុកឲ្យពលរដ្ឋណាម្នាក់ស្លាប់ដោយសាររង គ្រោះ ដោយអត់អាហារនោះឡើយ ។ ក្នុងនោះប្រមុខរាជរដ្ឋាភិបាលកម្ពុជា តែងតែយកចិត្តទុកដាក់ខ្ពស់ ក្នុងការផ្តល់គោលរបបគោលនយោបាយ ជូនដល់គ្រួសារក្រីក្រ និង បងប្អូនជាស្ត្រី និង កម្មការីនី ដោយទទួលបាននូវបេឡាជាតិរបបសន្តិសុខសង្គម ព្រមទាំងទៅពិនិត្យ និង ព្យាបាលជំងឺនៅតាមមន្ទីរពេទ្យរដ្ឋ និង មណ្ឌលសុខភាព ដោយមិនគិតពីតម្លៃសេវា ។
ជាមួយគ្នានោះដែរ លោកអភិបាលរងខេត្ត ក៏បានធ្វើក្រើនរំលឹកទៅដល់បងប្អូនប្រជាពលរដ្ឋ ពីបញ្ហានៃជំងឺកូវីត១៩ ដោយសូមបងប្អូនប្រជាពលរដ្ឋទាំងអស់ ត្រូវបង្កើនការយកចិត្តទុកដាក់ខ្ពស់ ក្នុងធ្វើអនាម័យសុខភាពឲ្យបានជាប្រចាំ ដើមី្បការពារអាយុជីវិតសម្រាប់ខ្លួនឯងផ្ទាល់ផង ក្រុមគ្រួសារយើងផង និង សហគមន៍យើងផង ពីសេសត្រូវចូលរួមទាំងអស់គ្នាប្រយុទ្ធប្រឆាំងបង្ការ និងទប់ស្កាត់ការឆ្លងរាលដាលនៃជំងឺកូវីដ១៩ ជាមួយរាជរដ្ឋាភិបាល និង អនុវត្តឲ្យបានតាមការណែនាំនិងវិធានការរបស់ក្រសួងសុខាភិបាល គឺត្រូវដុសលាងសម្អាតដៃជាប្រចាំជាមួយទឹកសាប៊ូ អាល់កុល ឬជែល និង ពាក់ម៉ាស់ឲ្យបានត្រឹមត្រូវ ៕
អត្ថបទ និង រូបភាពព៖ យូ វង្ស
កែសម្រួល៖ អ៊ុន ណារាជ្យ
