អំឡុងថ្ងៃឈប់សម្រាកសង ៥ថ្ងៃ ចាប់ពីថ្ងៃទី១៧ ដល់ទី២១ ខែសីហា ឆ្នាំ២០២០ រដ្ឋបាលខេត្តសៀមរាប សហការជាមួយសហភាពសហព័ន្ធកម្ពុជា ខេត្តសៀមរាប និងអាជ្ញាធរជាតិអប្សរា នឹងរៀបចំព្រឹត្តិការណ៍នានាជាច្រើន សម្រាប់ភ្ញៀវទេសចរមកកម្សាន្តក្នុងខេត្តសៀមរាប ក្នុងនោះកម្មវិធីជិះកង់ និងជិះទូកកម្សាន្ត ជាកម្មវិធីដែលរំពឹងថា នឹងមានអ្នកចូលរួមច្រើនកុះករ នេះបើតាម កិច្ចប្រជុំពិភាក្សា ស្ដីពីការរៀបចំព្រឹត្តិការណ៍ថ្ងៃឈប់សម្រាកចំនួន៥ថ្ងៃ នាសាលាខេត្តសៀមរាប នៅថ្ងៃទី០៧ ខែសីហា ឆ្នាំ២០២០។
តាមរយៈបទបង្ហាញរបស់ក្រុមការងារសហភាពសហព័ន្ធកម្ពុជា ខេត្តសៀមរាប ការជិះកង់កម្សាន្តនឹងរៀបចំជិះក្នុងតំបន់រមណីយដ្ឋានអង្គរ ដែលមានប្រភេទជិះកម្សាន្ត និងប្រភេទជិះចម្ងាយឆ្ងាយ ដែលតម្រូវឲ្យអ្នកចូលរួមត្រូវចុះឈ្មោះ និងបង់ថវិកាមួយចំនួន ដើម្បីយកថវិការមួយផ្នែកបរិច្ខាគជូនកាកបាទក្រហមកម្ពុជា និងមួយផ្នែកទៀតចំណាយលើសម្លៀកបំពាក់ ថ្លៃជួលកង់ របស់អ្នកចូលរួម និងសេវាផ្សេងជាច្រើនៗទៀត ជំនួយដល់អ្នកជិះកង់ នៅពេលធ្វើដំណើរ។
ជាមួយនោះ កម្មវិធីជិះទូកកម្សាន្ត នឹងរៀបចំនៅតាមបណ្ដោយស្ទឹង នៅកណ្ដាលក្រុងសៀមរាប ដោយអ្នកទេសចរ អាចជួលទូកជិះកម្សាន្ត ទិញម្ហូបអាហារតាមផ្សារបណ្ដែតទឹក និងទស្សនាសិល្បៈរហូតដល់ពេលរាត្រី។
ក្នុងឱកាសនោះ ឯកឧត្តម ទៀ សីហា អភិបាលខេត្តសៀមរាប បញ្ជាក់ថា នៅថ្ងៃចាប់ផ្ដើម គឺថ្ងៃទី១៧ ខែសីហា នឹងមានរៀបចំពិធីសាសនា បួងសួងនៅប្រាសាទអង្គរវត្ត និងការបើកពិធីតាំងពិព័រណ៌ ដែលតំណាងឲ្យការបើកកម្មវិធីនានា នៃថ្ងៃឈប់សម្រាកសងនេះផងដែរ។
ទន្ទឹមនោះ ឯកឧត្តម អភិបាលខេត្ត ក៏បានមានប្រសាសន៍ សង្កត់ធ្ងន់ទៅវិធានសុវត្តិភាព ក្នុងការការពារ ទប់ស្កាត់ជំងឺកូវីដ១៩ ដោយបានចាត់ចែងអនុគណៈកម្មការទទួលបន្ទុក ត្រូវយកចិត្តទុកដាក់ខ្ពស់ ដោយត្រួតពិនិត្យ ការពាក់ម៉ាស របាំងមុខសុវត្ថិភាព គម្លាតសុវត្ថិភាព និងការដាក់ពង្រាយជែល ឬអាកុលលាងសម្អាតដៃ នៅតាមស្តង់ ទីកន្លែងសំខាន់ៗនានា រួមនិងកងកម្លាំងរក្សាសណ្ដាប់ធ្នាប់ផងដែរ។
អត្ថបទ និង រូបថត ៖ លោក សេង ផល្លី និងលោក ងិន គឹមឡេង
