នៅរសៀលថ្ងៃទី០៧ ខែសីហា ឆ្នាំ២០២០នេះ មន្ត្រីជាន់ខ្ពស់ស្ថានទូតអូស្រ្តាលីប្រចាំនៅកម្ពុជា ដឹកនាំដោយលោកស្រី សារ៉ា លារី លេខាទី១ របស់ស្ថានទូតអូស្រ្តាលីប្រចាំនៅកម្ពុជា បានអញ្ជើញជួបពិភាក្សាការងារជាមួយឯកឧត្តម លីវ សុខុន ទីប្រឹក្សាក្រសួងព័ត៌មាន និងជាប្រធានមន្ទីរព័ត៌មានខេត្តសៀមរាប ក្រោយបញ្ចប់គម្រោងជំនួយប្រព័ន្ធផ្សព្វផ្សាយនៅកម្ពុជា ក្រោមជំនួយឧបត្ថមពីសារជីវកម្មសោតទស្សន៍ABC អូស្រ្តាលី រយៈពេល៨ឆ្នាំ ក្នុងខេត្តចំនួន៤ រួមមាន សៀមរាប បាត់ដំបង កំពង់ចាម និងកំពត ។
មានប្រសាសន៍ក្នុងឱកាសនោះ ឯកឧត្តម លីវ សុខុន បានសម្តែងការការីករាយ និងថ្លែងអំណរគុណចំពោះ រដ្ឋាភិបាលអូស្រ្តាលីតាមរយៈទីភ្នាក់ងារអូស្រ្តាលី ដើម្បីអភិវឌ្ឍន៍អន្តរជាតិ បានគាំទ្រ និងឧបត្ថម្ភគម្រោងប្រព័ន្ធផ្សព្វផ្សាយនៅកម្ពុជា ដើម្បីជំរុញប្រជាពលរដ្ឋឲ្យកាន់តែមានលទ្ធភាពខ្ពស់ ក្នុងការសម្តែងមតិរបស់ពួកគេតាមរយៈប្រព័ន្ធផ្សព្វផ្សាយនានានៅកម្ពុជា។ គម្រោងជំនួយប្រព័ន្ធផ្សព្វផ្សាយនៅកម្ពុជា ឬ CCAP បានបង្កើនសមត្ថភាពប្រព័ន្ធផ្សព្វផ្សាយ របស់មន្ទីរព័ត៌មានខេត្ត តាមរយៈការចូលរួមរបស់វិទ្យុខេត្ត ដែលអនុញ្ញាតឱ្យប្រជាពលរដ្ឋទាក់ទងជាមួយរាជរដ្ឋាភិបាល អាជ្ញាធរ និងអង្គការសង្គមស៊ីវិលនានា ដែលអាចធ្វើឱ្យប្រជាពលរដ្ឋទទួលបានព័ត៌មានប្រកបដោយគុណភាព ដើម្បីឱ្យប្រជាពលរដ្ឋបានស្វែងរកគណនេយ្យភាព និងតម្លាភាពកាន់តែប្រសើរ ។
ឯកឧត្តមបន្តថា មន្ទីរព័ត៌មានខេត្តសៀមរាប ទោះបីក្រោយបញ្ចប់គម្រោង ដែលធ្លាប់គាំទ្រដោយCCAP នៅអំឡុងខែ កញ្ញាឆ្នាំ២០១៨ ក៏ដោយ ប៉ុន្តែក្នុងនោះមន្ទីរនៅតែជំរុញ និងបន្តអនុវត្តផលិតកម្មវិធី ប្រកបដោយនិរន្តភាព ដើម្បីផ្តល់ព័ត៌មាន និងភ្ជាប់ទំនាក់ទំនងរវាងអាជ្ញាធរទៅកាន់ប្រជាពលរដ្ឋ តាមរយៈការផលិតកម្មសន្ទនាមតិ កម្មវិធីយើងបាន និងកម្មវិធីសំឡេងយុវវ័យ ដោយមានការចូលរួមពីវាគ្មិនជំនាញគ្រប់មជ្ឈដ្ឋាន ដោយមិនប្រកាន់និនាការនយោបាយឡើយ ។ ជាមួយគ្នានេះ មន្ទីរថែមទាំងពង្រីកការផ្សាយពីវិទ្យុ ទៅទូរទស្សន៍បន្ថែមទៀតផង បើទោះជាជួបឧបស័គ្គ និងបញ្ហាប្រឈមមួយចំនួនក្តី ។
មានប្រសាសន៍ក្នុងឱកាសនោះដែរ លោកស្រី សារ៉ា លារី ក៏បានសម្តែងការកោតសសើរចំពោះមន្ត្រី និងថ្នាក់ដកមន្ទីរព័ត៌មានខេត្តសៀមរាប ដែលបានអនុវត្តគម្រោង CCAPកន្លងមក បើទោះបីជាបានបញ្ចប់គម្រោងដែលទទួលបានការគាំទ្រដោយរដ្ឋាភិបាលអូស្រ្តាលីហើយក្តី ប៉ុន្តែមន្ទីរនៅតែបន្តអនុវត្ត និងរក្សាអត្តសញ្ញាណដើម នៃកម្មវិធីទាំងអស់ ។ ជំនួយប្រព័ន្ធផ្សព្វផ្សាយនៅកម្ពុជា ក្រោមការឧបត្ថមពីសារជីវកម្មសោតទស្សន៍អូស្រ្តាលី បានផ្តោតទៅលើមន្ទីរព័ត៌មានខេត្តគោលដៅចំនួន៤រួមមាន សៀមរាប បាត់ដំបង កំពង់ចាម កំពត ដោយអនុវត្តជា៣ដំណាកកាល ចាប់តាំងពីឆ្នាំ២០១១ និងបញ្ចប់ទៅវិញនៅថ្ងៃទី ៣០ ខែ កញ្ញា ឆ្នាំ២០១៨ ៕
អត្ថបទ៖បុង ឆវន្ត ,រូបភាព៖ ធន់ ពុថេ
កែសម្រួល៖ អ៊ុន ណារាជ្យ
