នៅមន្ទីរព័ត៌មានខេត្តសៀមរាប នារសៀលថ្ងៃទី ០៧ ខែ សីហា ឆ្នាំ២០២០ មន្ត្រីជាន់ខ្ពស់ស្ថានទូតអូស្រ្តាលីប្រចាំនៅកម្ពុជា បានវាយតម្លៃខ្ពស់ ចំពោះកិច្ចខិតខំរបស់ថ្នាក់ដឹកនាំ និងមន្ត្រីនៃមន្ទីរព័ត៌មានខេត្តសៀមរាប ក្នុងការបន្តផលិតកម្មវិធីអប់រំនានា ដល់ប្រជាពលរដ្ឋ ទោះបីគម្រោង ជំនួយឧបត្ថម្ភពីសារជីវកម្មសោតទស្សន៍ របស់ប្រទេសអូស្រ្តាលី (ABC) បានបញ្ចប់តាំងពីឆ្នាំ២០១៨ក៏ដោយ។
តាមការឲ្យដឹងពី លោក លីវ សុខុន ប្រធានមន្ទីរព័ត៌មានខេត្តសៀមរាប មន្ទីរព័ត៌មានខេត្តសៀមរាប ទទួលបានគម្រោងជំនួយប្រព័ន្ធផ្សព្វផ្សាយនៅកម្ពុជា នៅឆ្នាំ២០១១ និងបញ្ចប់នៅចុងខែកញ្ញា ឆ្នាំ២០១៨ ដែលជាជំនួយរបស់សារជីវកម្មសោតទស្សន៍ ABC នៃប្រទេសអូស្រ្តាលី ដើម្បីបណ្ដុះបណ្ដាលមន្ត្រីព័ត៌មាន និងផ្សព្វផ្សាយកម្មវិធីចំនួន ៣ គឺ កម្មវិធី យើងធ្វើបាន ផ្ដោតលើការលើកកម្ពស់សិទ្ធ និងការបញ្ឈប់អំពើហឹង្សាលើស្ត្រី និងកុមារ កម្មវិធីសំឡេងយុវវ័យ ផ្ដោតលើការកកម្ពស់សកម្មភាព និងការអប់រំដល់យុវវ័យ និងកម្មវិធីសន្ទនាមតិ ផ្ដោតលើកការកម្ពស់អភិបាលកិច្ចល្អ របស់អាជ្ញាធរគ្រប់លំដាប់ថ្នាក់ក្នុងខេត្ត និងសិទ្ធបញ្ចេញមតិរបស់ប្រជាពលរដ្ឋទាំងនៅទីក្រុង និងជនបទ តាមរយៈវិទ្យុជាតិនគរភ្នំ FM ១០៣MHz ។
លោកប្រធានមន្ទីរ បញ្ជាក់ថា ទោះបីគម្រោងត្រូវបានបញ្ចប់ តែការគាំទ្ររបស់ប្រជាពលរដ្ឋ តាមរយៈការហៅទូរស័ព្ទ ចូលក្នុងកម្មវិធី នៅតែបន្តជាប្រចាំ ដូច្នេះមន្ទីរព័ត៌មានខេត្តសៀមរាប នៅតែបន្តខិតខំផលិតកម្មវិធីទាំង៣នេះ ទៅតាមការវិភាគដូចធម្មតា និងមានការយកចិត្តទុកដាក់ខ្ពស់ ទោះបីពុំមានថវិកាគាំទ្រការផ្សាយក៏ដោយ។ លើសពីនោះ លោកក៏បានបន្ថែមសមត្ថភាពផលិត លើកម្មវិធីទាំង៣នេះ ដោយផ្សាយផ្ទាល់លើទូរទស្សន៍អនឡាញ របស់មន្ទីរព័ត៌មានខេត្តសៀមរាប រួមមានហ្វេសប៊ុក និងទូរទស្សន៍ខ្សែកាបក្នុងខេត្តផងដែរ។
បន្ទាប់ពីស្ដាប់ការលើកឡើង របស់លោកប្រធានមន្ទីរព័ត៌មានខេត្ត និងមន្ត្រីកាន់កម្មវិធី ព្រមជាមួយការពិនិត្យការផលិតកម្មវិធីផ្ទាល់ អ្នកស្រី សារ៉ា លារី លេខាទី១ ស្ថានទូតអូស្រ្តាលីប្រចាំនៅកម្ពុជា និងលោក រ៉ុង រតនា ប្រធានកម្មវិធីជាន់ខ្ពស់ នៃស្ថានទូតអូស្រ្តាលីប្រចាំនៅកម្ពុជា បានសម្តែងនូវការកោតសសើរចំពោះ ថ្នាក់ដឹកនាំមន្ទីរព័ត៌មានខេត្តសៀមរាប និងមន្ត្រីគ្រប់ជាន់ថ្នាក់ ដែលបានបន្តផលិតកម្មវិធី ទោះបីគម្រោងជំនួយស៊ីខេប (CCAP) បានបញ្ចប់។
អ្នកស្រី សារ៉ា លារី បានសន្យាថា នឹងជម្រាបជូនឯកឧត្តម ឯកអគ្គរដ្ឋទូត ពីកិច្ចខិតខំប្រឹងប្រែង របស់មន្ទីរព័ត៌មានខេត្តសៀមរាប នាពេលកន្លងមក និងសមទ្ធិផល របស់គម្រោង មុនពេលបញ្ចប់ និងក្រោយពេលបញ្ចប់។ ជាមួយនោះ អ្នកស្រី ក៏នឹងធ្វើការផ្សព្វផ្សាយអំពីដំណើរធ្វើទស្សនកិច្ចនៅពេលនេះ នៅលើគេហទំព័ររបស់ស្ថានទូតអូស្ត្រាលីផងដែរ។
គួររំលឹកថា គម្រោងជំនួយប្រព័ន្ធផ្សព្វផ្សាយនៅកម្ពុជា គាំទ្រថវិកាពីសារជីវកម្មសោតទស្សន៍របស់ប្រទេសអូស្រ្តាលី បានផ្តោតទៅលើមន្ទីរព័ត៌មានខេត្តគោលដៅចំនួន៤ រួមមាន សៀមរាប បាត់ដំបង កំពង់ចាម និងកំពត ដោយអនុវត្តន៍ ចាប់ពីឆ្នាំ២០១១ និងបញ្ចប់ទៅវិញនៅថ្ងៃទី ៣០ ខែ កញ្ញា ឆ្នាំ២០១៨ ៕
