នៅសាលាខេត្តសៀមរាប នាព្រឹកថ្ងៃទី០៦ ខែសីហា ឆ្នាំ២០២០នេះ ឯកឧត្តម ទៀ សីហា អភិបាលខេត្តសៀមរាប បានអញ្ជើញបើក សិក្ខាសាលាបណ្តុះបណ្តាលជនបង្គោល ដើម្បីជំរុញអនុវត្តន៍វិធានសុវត្ថិភាពទេសចរណ៍ សម្រាប់មូលដ្ឋានអាជីវកម្មទេសចរណ៍ ក្នុងដំណាក់កាលវិបត្តិជំងឺឆ្លងកូវីដ-១៩ ក្នុងគោលបំណង ត្រៀមរៀបចំទទួលភ្ញៀវទេសចរពីបណ្តាខេត្តផ្សេងៗ មកកម្សាន្តនៅក្នុងខេត្តសៀមរាប និងបណ្ដុះបណ្ដាលដល់ប្រតិបត្តិករទេសចរណ៍ យល់ច្បាស់ពីវិធានសុវត្តិភាព ក្នុងការការពារ ទប់ស្កាត់ការឆ្លង នៃជំងឺកូវីដ១៩ នៅតាមទីតាំងអាជីវកម្មរបស់ខ្លួន។
ថ្លែងក្នុងឱកាសនោះ ឯកឧត្តមអភិបាលខេត្ត លើកឡើងថា ស្ថិតក្នុងស្ថានភាពបច្ចុប្បន្ន វិបត្តិជំងឺឆ្លងកូវីដ-១៩ បានធ្វើឱ្យមានផលប៉ះពាល់យ៉ាងខ្លាំងដល់សេដ្ឋកិច្ចសកល ក៏ដូចជាសេដ្ឋកិច្ចជាតិ ក្នុងនោះវិស័យទេសចរណ៍រងផលប៉ះពាល់ធ្ងន់ធ្ងរជាងគេ។ នៅខេត្តសៀមរាប ប្រតិបត្តិករបម្រើសេវាកម្មក្នុងវិស័យនេះ រួមទាំងប្រជាពលរដ្ឋ ដែលអាស្រ័យផលដោយប្រយោលពីវិស័យនេះ កំពុងបន្តជួបបញ្ហាជាច្រើនក្នុងជីវភាពរស់នៅប្រចាំថ្ងៃ។
យោងតាមស្ថានភាពធូរស្រាលនាពេលបច្ចុប្បន្ន ដើម្បីចលនាទេសចរណ៍ក្នុងស្រុក គឺជាគោលដៅ របស់រាជរដ្ឋាភិបាល ក្នុងនោះរដ្ឋបាលខេត្ត បានសហការជាមួយសហភាពសហព័ន្ធយុវជនកម្ពុជាខេត្តសៀមរាប ដើម្បីរៀបចំទទួលភ្ញៀវទេសចរពីបណ្តាខេត្តផ្សេងៗ មកកម្សាន្តនៅក្នុងខេត្តសៀមរាប ក្នុងឱកាសថ្ងៃឈប់សម្រាកសងខាងមុខ ចាប់ពីថ្ងៃទី១៧ ដល់ថ្ងៃទី២១ ខែសីហា ឆ្នាំ២០២០។
ទោះបីជាស្ថានភាពជំងឺកូវីដ១៩ មានភាពធូរស្រាលយ៉ាងណាក៏ដោយ ឯកឧត្តម គឹម សេរីរ័ត្ន អគ្គលេខាធិការរង នៃគណ:កម្មាធិការជាតិវាយតម្លៃទីក្រុងស្អាត និងជាប្រធាននាយកដ្ឋានគ្រប់គ្រងសេវាកម្មស្នាក់នៅទេសចរណ៍ និងម្ហូបអាហារ នៃក្រសួងទេសចរណ៍ បញ្ជាក់ថា ក្រសួងពាក់ព័ន្ធ រួមនិងអាជ្ញាធរខេត្តសៀមរាប នឹងនៅតែបន្តយកចិត្តទុកដាក់ខ្ពស់ លើការប្រយុទ្ធប្រឆាំងការរីករាលដាលនៃជំងឺកូវីដ១៩ ក្នុងនោះ វិធានសុវត្ថិភាពទេសចរណ៍ បានបង្ហាញនូវតម្លៃខ្ពស់លើការងារប្រយុទ្ធប្រឆាំងជម្ងឺកូវីត១៩។ វិធានសុវត្ថិភាពនេះ គឺជាដំណើររួមគ្នារវាងវិស័យទេសចរណ៍ និងវិស័យសុខាភិបាល៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក សេង ផល្លី
