សៀមរាប៖ ភ្ញៀវទេសចរជាតិមួយចំនួនបានកោតសរសើរនិងសម្ដែងការពេញចិត្ដចំពោះការរៀបចំកន្លែងកំសាន្ដរបស់អាជ្ញាធរខេត្ដសៀមរាប ដែលពួគគាត់លើកឡើងថា ក្នុងរយៈពេល៥ថ្ងៃនេះ បានធ្វើអោយពួកគាត់មានភាពសប្បាយរីករាយ ព្រោះការរៀបចំនោះ មានការបង្កើតព្រឹត្ដិការណ៍ទេសចរណ៍ មានកម្មវិធីល្អៗច្រើន និង មានសណ្ដាប់ធ្នាប់ បរិស្ថានល្អ ជាពិសេសការទប់ស្កាត់ជំងឺកូវីដ១៩បានល្អប្រសើរ ។
ភ្ញៀវទេសចរណ៍មកពីរាជធានីភ្នំពេញ និងមកពីតាមបណ្ដាខេត្ដផ្សេងៗទៀត ពួកគាត់បានលើកឡើងដូចៗគ្នាកាលពីល្ងាចថ្ងៃទី២០ខែសីហានេះថា ការរៀបចំកន្លែងកំសាន្ដផ្សេងៗនៅខេត្ដសៀមរាប មានប្រជាពលរដ្ឋក៍ដូចភ្ញៀវទេសចរទៅកំសាន្ដយ៉ាងច្រើកុះករ ជាពិសេសការរៀបចំការទប់ស្កាត់ការពារនិងទប់ជំងឺកូវីដ១៩នៅកន្លែងកំសាន្ដនោះ បានល្អប្រសើរ។ពួកគាត់បានបន្ដថា នៅតាមផ្លូវចូលក្នុងពិធីមានការរៀបចំអោយមានកន្លែងលាងដៃនិងសាប៊ូ កន្លែងវាស់កំដៅ បាញ់ទឹកអាកុល និងពាក់ម៉ាសជាដើម។ជាមួយគ្នានោះ នៅតាមដងផ្លូវនានាក្នុងក្រុងសៀមរាប លំអរដោយការតុបតែងភ្លើងចំរុះពណ៌ ការតាំងពិព័រណ៌ផលិតផល និងការរៀបចំទួកកំសាន្ដនៅតាមដឹងស្ទឹងសៀមរាបផងដែរ។ជាងនោះទៅទៀត នៅតាមដងផ្លូវនានាមានសណ្ដាប់ធ្នាប់ល្អ បរិស្ថានស្អាតនិងមានអនាម័យល្អ ។ពួកគាត់លើកឡើងថា ការៀបចំកញ្ចប់ទេសចរណ៍នេះ ផ្ដល់សារៈសំខាន់យ៉ាងច្រើនដល់ប្រជាពលរដ្ឋដូចជាតាមរយៈការលក់ចំណីអាហារ និងទំនិញជាដើម។
សូមជម្រាបថា អាជ្ញាធរខេត្ដសៀមរាប បានជាមួយសភាពសហព័ន្ធយុវជនកម្ពុជា បង្កើតកម្មវិធីសម្រាកសៀមរាប ដើម្បីផ្ដល់ចំណូលសេដ្ឋកិច្ចជូនពលរដ្ឋនៅមូលដ្ឋាន តាមរយៈសក្ដានុពលទេសចរណ៍រួមមាន កម្មវិធីសាសនា បួងសួងសុំសេចក្តីសុខ កម្មវិធីពិព័រណ៍ បន្លែផ្លែឈើ កសិផល ផលិតផល ក្រុង-ស្រុកទាំង១២ កម្មវិធីប្រកួតម្ហូបអាហារ ពានរង្វាន់មាន់អាំង ឆ្ងាញ់ជាងគេនៅខេត្តសៀមរាប ផ្សារទឹក ផាប់ស្ទ្រីត កម្មវិធីជិះកង់ កម្មវិធីជិះទូកកំសាន្ត កម្មវិធីកីឡាវាយកូនហ្គោល កម្មវិធីដើរព្រៃ ចង្ក្រានរយ ភ្នំគូលែន ផ្ទាំងទស្សនីយភាពសិល្បៈជាដើម។
បើតាមរបាយកាណ៍របស់មន្ទីរទេសចរណ៍ខេត្ដសៀមរាប បានបង្ហាញថា ចាប់ពីថ្ងៃទី១៦ដល់ថ្ងៃទី២០ខែសីហាឆ្នាំ២០២០នេះ មានភ្ញៀវទេសចរណ៍ជាតិនិងអន្ដរជាតិ ទៅកំសាន្ដនៅខេត្ដនោះ ក្នុងរយៈពេល ០៥ ថ្ងៃមានប្រមាណជិត២០ម៉ឺននាក់(សរុប១៨១.៨៦៨នាក់)ក្នុងនោះភ្ញៀវទេសចរបរទេស ១៨៦៨នាក់ថយចុះ ៩២,៨៥% (ឆ្នាំ២០១៩ មានភ្ញៀវ ២៦.១៤៤ នាក់)ខណៈដែលភ្ញៀវជាតិ មានចំនួនប្រមាណ១៨ម៉ឺននាក់ ៕
អត្ថបទ និង រូបភាព ៖ ឈិត សាវី
