លោក ពិន ប្រាកដ អភិបាលរងខេត្តសៀមរាប មានប្រសាសន៍ថា សព្វថ្ងៃនេះនៅក្នុងទូទាំងខេត្តសៀមរាបមានស្ថានីយប្រេងឥន្ធនៈ និងឧស្ម័ន សរុបចំនួន ៣៦២ ស្ថានីយ ក្នុងនោះមានស្ថានីយប្រេងឥន្ធនៈចំនួន៣១៣ស្ថានីយ , ស្ថានីយឧស្ម័នឥន្ធនៈចំនួន១១ ស្ថានីយ និងស្ថានីយរួមប្រេងនិងឧស្ម័នឥន្ធនៈមានចំនួន៣៨ស្ថានីយ ហើយក្នុងចំណោមស្ថានីយទាំងអស់ មានស្ថានីយខ្លះសាងសង់ខុសបច្ចេកទេស មានហានិភ័យខ្ពស់គួរឲ្យព្រួយបារម្ភ ដែលចាំបាច់ត្រូវធ្វើការកែសម្រួល និងផ្លាស់ប្តូរទីតាំង ខណៈដែលស្ថានីយខ្លះទៀត មានលក្ខណៈសមស្រប អាចទទួលយកបានការអនុញ្ញាតច្បាប់ ដូច្នេះតាមរយៈនេះ សូមអំពាវនាវដល់ម្ចាស់ស្ថានីយប្រេងឥន្ធនៈដែលមិនទាន់មានច្បាប់អនុញ្ញាត សូមរួសរាន់រៀបចំសំណុំឯកសារ ស្នើសុំច្បាប់ពីក្រសួងរ៉ែ និងថាមពល តាមរយៈ មន្ទីររ៉ែ និងថាមពលខេត្ត ដើម្បីឲ្យស្របទៅតាមច្បាប់ដែលមានជាធរមាន ។
លោក ពិន ប្រាកដ មានប្រសាសន៍យ៉ាងដូច្នេះ ក្នុងឱកាសបើកវគ្គបណ្តុះបណ្តាលស្តីពីហានីភ័យស្ថានីយ និងសារាចរ សុវត្ថិភាពស្ថានីយប្រេង និងឧស្ម័នឥន្ធនៈ នៅខេត្តសៀមរាប នាព្រឹកថ្ងៃទី២៥ ខែសីហា ឆ្នាំ២០២០នេះ ដែលរៀបចំឡើងដោយក្រសួងរ៉ែ និងថាមពល ដោយមានអ្នកចូលរួមចំនួន៧៣នាក់ ។
ក្នុងឱកាសនោះដែរ លោក ពិន ប្រាកដ បានស្នើសុំដល់ក្រុមការងារបច្ចេកទេស នៃក្រសួងរ៉ែ និងថាមពល បន្តចុះវាយតម្លៃ និងកំណត់ហានិភ័យស្ថានីយប្រេង និងឧស្ម័នឥន្ធនៈបន្ថែមទៀត ដើម្បីរក្សាសុខសុវត្ថិភាព និងសណ្ដាប់ធ្នាប់ ជូនប្រជាពលរដ្ឋនៅក្នុងខេត្តទាំងមូល ពិសេសសូមឲ្យមន្រ្តីរាជការ មន្ទីរអង្គភាពពាក់ព័ន្ធជុំវិញខេត្ត និង លោក លោកស្រីអភិបាលក្រុង/ស្រុកទាំងអស់ក្នុងខេត្ត ត្រូវបង្កើនការស្វែងយល់បន្ថែមទៀត អំពីតួនាទី ភារកិច្ច និងនីតិវិធីនានា ដើម្បីមានភាពងាយស្រួលក្នុងការបម្រើសេវាសាធារណៈ ជូនប្រជាពលរដ្ឋក៏ដូចជាការចុះត្រួតពិនិត្យ និង ធ្វើអធិការកិច្ចប្រកបដោយប្រសិទ្ធភាព ប្រសិទ្ធផល និងតម្លាភាព ស្របតាមច្បាប់និង លិខិតបទដ្ឋានគតិយុត្តពាក់ព័ន្ធនានា ជុំវិញហានីភ័យស្ថានីយ និងសារាចរសុវត្ថិភាពស្ថានីយប្រេង និងឧស្ម័នឥន្ធនៈ នៃវិស័យប្រេងកាតនៅកម្ពុជា ៕
អត្ថបទ និង រូបថត ៖ លោក ខេង ឧត្ដម
កែសម្រួលអត្ថបទ ៖ លោក លីវ សាន្ត
