ការប្រកួតបាលទាត់ពាន់រង្វាន់ Siem Reap Baby League លើកដំបូងនៅកម្ពុជា ក៏ដូចជាខេត្តសៀមរាប ដែលរៀបចំឡើងដោយ ក្លឹបបាលទាត់សៀមរាបយូណាយធីត នឹងចាប់ផ្ដើមដំណើរការហើយនៅថ្ងៃទី២០ ខែកញ្ញា ឆ្នាំ២០២០ខាងមុខនេះ ។ ដោយការប្រកួត គឺមានរយៈពេល ១២សប្ដាហ៍ ក្នុង១សប្ដាហ៍មានការប្រកួត១ថ្ងៃ ចាប់ពីម៉ោង៤ល្ងាច នៅកីឡាដ្ឋានសៀមរាបយូណាធីតផ្ទាល់តែម្ដង ។
បើតាមលោក ស៊ឹម ម៉េងហៃ អ្នកចាត់ការទូទៅក្លឹបបាលទាត់សៀមរាបយូណាធីត បានបញ្ជាក់ថា ការបង្កើតពាន់រង្វាន់នេះឡើង គឺក្នុងគោលបំណងជំរុញឲ្យកុមារមានចិត្តស្រឡាញ់កីឡាតាំងពីតូច ចេះទំនាក់ទំនង សហការគ្នាទៅវិញទៅមក និងមានសុខភាពល្អ ហើយការប្រកួតនេះដែរ គឺផ្ដោតសំខាន់ទៅលើប្អូនៗដែលមានអាយុក្រោម ០៩ឆ្នាំ ដោយក្នុងនោះយើងបែងចែកជា ៣កម្រិតរួមមាន៖ កម្រិតអាយុក្រោម ០៥ឆ្នាំ, កម្រិតអាយុក្រោ ០៧ឆ្នាំ និងកម្រិតក្រោម ០៩ឆ្នាំ ហើយពួកគាត់ត្រូវធ្វើការប្រកួតផ្លាស់ប្តូរគ្នាទៅវិញទៅមកដើម្បីសន្សំពិន្ទុ ។
អ្នកចាត់ការទូទៅក្លឹបរូបនេះបន្ថែមថា ក្រោយការប្រកួត កុមារទាំងអស់នឹងទទួលបាននូវបទពិសោធន៍ល្អៗ ការសហការ ទំនាក់ទំនងគ្នាល្អ ជាពិសេសពួកគាត់នឹងទទួលបានបច្ចេកទេសនៃការលេងបាលទាត់មួយចំនួនពីគ្រូជំនាញ សម្រាប់ធ្វើជាដើមទុនក្នុងការប្រកួតប្រជែងនៅថ្ងៃក្រោយរបស់ពួកគាត់ ។ ក្នុងនោះដែរលោកក៏បានសំណូមពរ ដល់អាណាព្យាបាលទាំងអស់ សូមជមរុញឲ្យកូនៗរបស់ពួកគាត់ចូលរួមលេងកីឡាឲ្យបានច្រើន ជាពិសេសចូលរួមជាមួយការប្រកួតនេះទាំងអស់គ្នា ព្រោះការលេងកីឡាអាចធ្វើឲ្យពួកគាត់មានសុខភាពល្អ ទំនាក់ទំនង និងសហការល្អផងដែរ ៕
