នៅថ្ងៃទី២៦ ខែសីហា ឆ្នាំ២០២០ យុវសិស្សស័្មគ្រចិត្ត នៃវិទ្យាល័យ ២៨មករា ស្រុកស្រីស្នំ រួមនិងលោកគ្រូ អ្នកគ្រូ អាជ្ញាធរស្រុក បានបើកយុទ្ធនាការបន្តផ្សព្វផ្សាយ និងបង្ការទប់ស្កាត់ ការឆ្លងរីករាលដាលជំងឺកូវីត១៩ ក្នុងសហគមន៍ តាមបណ្តាភូមិ នៃឃុំទាំង៦ របស់ស្រុកស្រីស្នំ ខេត្តសៀមរាប ក្នុងគោលបំណង ក្រើនរំលឹកដល់ប្រជាពលរដ្ឋនៅទូទាំងស្រុក បន្តប្រុងប្រយ័ត្ន និងរក្សាអនាម័យ ការពារខ្លួនពីជំងឺកូវីដ១៩។
យុទ្ធនានេះ បានអនុវត្តន៍រយៈពេលពេញ១ថ្ងៃ ដោយមានអ្នកចូលរួមប្រមាណជិត៧០០នាក់ ដែលបានបែងចែកជា៤០ក្រុម។ សកម្មភាពនៃយុទ្ធនាការនេះ ត្រូវបានធ្វើឡើងតាមរយៈអនុសាសន៍របស់ ឯកឧត្តម ស៊ាន បូរ៉ាត់ រដ្ឋលេខាធិការក្រួងអប់រំ យុវជននិងកីឡា និងជាប្រធានក្រុមការងារថ្នាក់ជាតិ របស់រាជរដ្ឋាភិបាលចុះមូលដ្ឋានស្រុកស្រីស្នំ កាលពីពេលកន្លងមកថ្មីៗនេះ។
លោកគ្រូ ជាប្រធានក្រុមយុទ្ធនាការគោលដៅឃុំស្លែងស្ពាន បញ្ជាក់ថា យុវសិស្សស្ម័គ្រចិត្តទាំងអស់នេះ បានបង្ហាញជាគម្រូដល់ប្រជាពលរដ្ឋក្នុងសង្គម និងប្រកបដោយសុឆន្ទៈ ដើម្បីរួមចំណែកជួយដល់ការងារសង្គម។ សម្រាប់កាលៈទេសៈនៃវិបត្តិកូវីត១៩ យុវជនមានភារកិច្ច រួមគិត រួមធ្វើ និងចូលរួមទទួលខុសត្រូវ ក្នុងការទប់ស្កាត់រលកទី២ ចូលក្នុងសហគមន៍របស់ខ្លួន។
យុវតី ហុន ខាំកែវ សិស្សថ្នាក់ទី១២ (A) នៃវិទ្យាល័យ ២៨មករា បានបង្ហាញការចាប់អារម្មណ៍របស់ខ្លួនថា ការចូលរួមសកម្មភាពសង្គមនេះ បង្ហាញពីឆន្ទៈ និងភាពក្លាហាន នៃយុវវ័យសម័យតេជោ។ ការផ្សព្វផ្សាយសេចក្ដីណែនាំ របស់ក្រសួងសុខាភិបាល វាគឺជាវិធីសាស្រ្តមួយ ដើម្បីប្រែក្លាយពីការភ័យខ្លាចពីជំងឺកូវីដ១៩ ទៅជាការប្រុងប្រយ័ត្ន និងបានបង្ហាញពីសេចក្ដីស្រឡាញ់ចំពោះសហគមន៍ បងប្អូន ញាតិសណ្តានរបស់ខ្លួន៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក សេង ផល្លី
