នៅថ្ងៃទី២៧ ខែសីហា ឆ្នាំ២០២០ ឯកឧត្តមបណ្ឌិត ទិន ពន្លក រដ្ឋលេខាធិការក្រសួងបរិស្ថាន និង លោក ពៅ ពិសិដ្ឋ អភិបាលរងខេត្តសៀមរាប បានអញ្ជើញជាអធិបតី ក្នុងពិធីដាំកូនឈើចម្រុះជិត៤ពាន់ដើម នៅតាមព្រំប្រទល់ មជ្ឈមណ្ឌលស្រាវជ្រាវ និង អភិរក្សកេសរកូល សុខ អាន ភ្នំគូលែន នៃឧទ្យាជាតិព្រះជ័យវរ្ម័ននរោត្តម ភ្នំគូលែន លើផ្ទៃដីជាង២ពាន់ហិកតា ស្ថិតនៅភូមិស្រះខ្វាវ ឃុំត្បែង ស្រុកបន្ទាយស្រី ខេត្តសៀមរាប ដើមី្បរួមចំណែក ស្តារ គម្របព្រៃឈើឡើងវិញ និង ទប់ស្កាត់ការហូរច្រោះដី ព្រមទាំងជាសារផ្សព្វផ្សាយពីសារប្រយោជន៍ នៃធនធានព្រៃឈើ ដល់សហគមន៍មូលដ្ឋាន និង សាធារណជន។
យុទ្ធនាការដាំកូនឈើនេះ ស្ថិតក្នុងគម្រោងជំរុញបរិយាកាស អំណោយផលសម្រាប់ការអភិវឌ្ឍដោយចីរភាព (BESD) និង កម្មវិធីសម្ព័ន្ធភាព ប្រែប្រួលអាកាសធាតុកម្ពុជា ជំហានទី៣ ដែលមានការឧបត្ថម្ភ ពីអង្គការសហប្រជាជាតិ (UNDP / SIDA) ។
មានចំណាប់អារម្មណ៍នោះដែរលោកស្រី នីក បឺរ រីសហ្វដ (Nick Beresford) តំណាងកម្មវិធីអភិវឌ្ឍន៍ អង្គការសហប្រជាជាតិ លើកឡើងថា ព្រៃឈើបានផ្តល់នូវគុណសម្បត្តិជាច្រើនដល់មនុស្ស សត្វ ហើយវាក៏ជាផ្នែកមួយដ៏សំខាន់ ក្នុងការរក្សាលំនឹងបរិកាសផែនដី ព្រមទាំងទប់ស្កាត់គ្រោះធម្មជាតិផងដែរ ។
ថ្លែងក្នុងឱកាសនោះ លោក ពៅ ពិសិដ្ឋ បង្ហាញថា ពិធីដាំកូនឈើ នៅមជ្ឈមណ្ឌលស្រាវជ្រាវ និង អភិរក្សកេសរកូល សុខ អាន ភ្នំគូលែននេះ បានបំផុសនូវចលនា ស្រឡាញ់ព្រៃឈើ ដល់ប្រជាពលរដ្ឋក្នុងមូលដ្ឋាន និងទូទាំងប្រទេស ដើម្បីបញ្ឈប់ការកាប់បំផ្លាញព្រៃឈើ ចូលរួម ការពារ និងដាំដើមឈើឡើងវិញ។ មួយវិញទៀតទិវានេះ ក៏បានឆ្លុះបញ្ចាំងឲ្យឃើញនូវការខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការស្តារគម្របព្រៃឈើឡើងវិញ ដើម្បីកាត់បន្ថយបម្រែបម្រួលអាកាសធាតុ បង្កដោយឧស្ម័នពុលយ៉ាងច្រើនសន្ធឹកសន្ធាប់ ដែលបញ្ចេញដោយបណ្ដាប្រទេសមានសេដ្ឋកិច្ចជឿនលឿនលើសកលលោក។
ឯកឧត្តមបណ្ឌិត រដ្ឋលេខាធិការ ក្រសួងបរិស្ថាន បញ្ជាក់ថា រាជរដ្ឋាភិបាលកម្ពុជា ដែលមាន សម្ដេចតេជោ ហ៊ុន សែន នាយករដ្ឋមន្ត្រី បានយកចិត្តទុកដាក់ខ្ពស់លើការបម្រែបម្រួលអាកាសធាតុជាសកល ក្នុងនោះការគ្រប់គ្រង និងអភិរក្សធនធានព្រៃឈើនៅកម្ពុជា មានគាំទ្រពីអង្គការជាដៃគូរជាតិ និងអន្តរជាតិជាច្រើន មានជាអាទិ៍ អង្គការ SEDA សហគមអឺរ៉ុប ជាដើម។
ឯកឧត្តម បានអំពាវនាវដល់ប្រជាពលរដ្ឋគ្រប់រូប ដែលកំពុងកាប់បំផ្លាញព្រៃឈើ ដើម្បីតែផលប្រយោជន៍ផ្ទាល់ខ្លួន សូមបញ្ឈប់សកម្មភាពរបស់ខ្លួនជាបន្ទាន់ ព្រោះការធ្វើអាជីវកម្មព្រៃឈើ និងជំនួញដីព្រៃឈើខុសច្បាប់ គឺជាបទល្មើសដ៏ធ្ងន់ធ្ងរបំផុត ជាពិសេសវានឹងបង្កនូវមហន្ដរាយផ្សេងៗ ដល់ប្រជាជាតិខ្លួនឯង និងពិភពលោកទាំងមូល។
អត្ថបទ និង រូបថត ៖ លោក ម៉ី សុខារិទ្ធ
កែសម្រួលអត្ថបទ ៖ លោក សេង ផល្លី
