នារសៀលថ្ងៃទី២៧ ខែសីហា ឆ្នាំ២០២០ម្សិលមិញនេះ លេខាធិការដ្ឋាន នៃគណៈកម្មាធិការប្រយុទ្ឋប្រឆាំងអំពើជួញដូរមនុស្សខេត្តសៀមរាប បានរៀបចំប្រជុំប្រចាំខែសីហាឆ្នាំ២០២០ ក្រោមកិច្ចដឹកនាំរបស់លោកស្រី យូ សុភា អភិបាលរងខេត្ត និងជាប្រធានលេខាធិការដ្ឋាននៃគណៈកម្មាធិការប្រយុទ្ឋប្រឆាំងអំពើជួញដូរមនុស្សខេត្តសៀមរាប ហៅកាត់ថា គ.ខ.ប.ជ ដោយមានការអញ្ជើញចូលរួមពីលោក លោកស្រី ជាសមាជិក សមាជិកា លេខាធិការដ្ឋាន គ.ខ.ប.ជ ពីមន្ទីរ អង្គភាពពាក់ព័ន្ធ ព្រមទាំងតំណាងអង្គការ ដៃគូពាក់ព័ន្ធ ចំនួន ៥៨នាក់ចូលរួម ។
មានប្រសាសន៍បើកកិច្ចប្រជុំនេះ លោកស្រី យូ សុភា អភិបាលរងខេត្ត និងជាប្រធានលេខាធិការ គ.ខ.ប.ជ បានឲ្យដឹងថា កិច្ចប្រជុំប្រចាំខែ ដើម្បីធ្វើការពិភាក្សាលើបញ្ហាប្រឈមមួយចំនួនដែលបានកើតមានឡើងក្នុងខែកន្លងមក ស្វែងរកដំណោះស្រាយរួមគ្នាសម្រាប់ការពារជនរងគ្រោះ និងងាយរងគ្រោះ ដោយអំពើហិង្សាទាក់ទងនឹងយេនឌ័រ ឬការរំលោភបំពានផ្សេងៗ ដែលពាក់ព័ន្ធទៅនឹងច្បាប់ស្តីពី ការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ ដោយផ្តោតលើបញ្ហាដែលនៅតាមមូលដ្ឋានក្រុង ស្រុកជួបប្រទះ ដើមី្បជាគោលដៅក្នុងការដោះស្រាយឲ្យបានរួចរាល់នូវបញ្ហាប្រឈមរបស់គ្រួសារជនរងគ្រោះដោយការរំលោភសេពសន្ថវៈ ដែលត្រូវគ្រួសារជនជាប់ចោទធ្វើការគម្រាមកំហែង បានធ្វើឲ្យគ្រួសារនៃជនរងគ្រោះមានការភ័យខ្លាច ។
គួររំលឹកថា អង្គប្រជុំទាំងមូលបានធ្វើការពិភាក្សា និង ដោះស្រាយលើបញ្ហាមួយចំនួន ដែលបានកើតមានឡើងពីខែមុនដូចជា ៖ ១. ការគ្រោងថវិកាក្នុងកញ្ចប់ថវិកាសេវាសង្គមលើសកម្មភាពប្រយុទ្ធប្រឆាំងអំពើជួញដូរមនុស្ស ឬ ការធ្វើចំណាកស្រុកប្រកបដោយសុវត្តិភាព , ២. ការស្វែងរកវិធានការ និងដំណោះស្រាយជាបន្ទាន់ លើករណីកុមារនៅតាមដងផ្លូវ ឆ្ពោះទៅរមណីយរដ្ឋានពើងបាក់រទេះ ដែលស្ថិតនៅក្នុងស្រុកជីក្រែង , ៣. ការជួយសម្របសម្រួលបង្រួមមណ្ឌលចត្តាឡីស័ក និងរៀបចំវិទ្យាល័យសម្រាប់ការត្រៀម ប្រឡងសញ្ញាបត្រនាពេលកំណត់ខាងមុខ និងទៅលើការសម្អាតមណ្ឌលចត្តាឡីស័ក តាមគោលការណ៍របស់សុខាភិបាល នៅក្នុងស្រុកពួក , ៤. ករណីសាលារៀនដែលត្រូវរៀបចំរបៀបរៀបរយហើយធ្វើការសំអាត និងសម្លាប់មេរោគតាមបច្ចេកទេសរបស់សុខាភិបាល , ៥. ករណីផ្តល់ជូនទិន្នន័យសិស្សានុសិស្ស ដែលបានបោះបង់ការសិក្សានៅតាមក្រុងស្រុក មកលេខាធិការដ្ឋាន ដើម្បីចងក្រងទុកជាឯកសារនៅពេលមានតម្រូវការ និង ករណីមន្ទីរព័ត៌មានខេត្តធ្វើការសហការជាមួយនឹងវិទ្យាស្ថានទាំងពីរ ដើម្បីផ្សព្វផ្សាយពីការជ្រើសរើសបេក្ខជន ឱ្យចូលរៀននៅក្នុងបវេសនការថ្មីនេះ , ៦. ករណីផ្សព្វផ្សាយបន្តទៅភូមិឃុំនានា ដើម្បីឱ្យប្រជាពលរដ្ឋ ដែលចង់ទទួលបានជំនាញវិជ្ជាជីវៈ ដោយឥតគិតថ្លៃ ពិសេសពលករទើបត្រឡប់មកវិញ និងធ្វើការស្រង់ឈ្មោះអ្នកទទួលចង់ទទួលបានជំនាញ , ៧. ករណីលើករណីដែលក្រុមហ៊ុន ស៊ូជីង មិនបើកផ្តល់ប្រាក់ប្រចាំថ្ងៃជូនដល់កម្មករ និង ៨. ករណីធ្វើការរៀបចំដោះស្រាយដល់យោធិនពិការចំនួន០១នាក់ ដែលពិការទាំងដៃនិងជើងសងខាង ហើយសព្វថ្ងៃនេះគាត់កំពុងស្នាក់នៅក្នុងវត្តព្រះឥន្រ្ទកោសា ដោយចុះទៅធ្វើការស្រាវជ្រាវ ពិនិត្យលើនយោបាយរបស់យោធិនពិការ ដើម្បីពិនិត្យលទ្ធភាពក្នុងផ្ដល់ផ្ទះជូនគាត់ ។
ក្នុងឱកាសនោះដែរ លោកស្រី យូ សុភា បានសម្ដែងនូវការអរគុណចំពោះសមាជិកទាំងអស់នៃអង្គប្រជុំដែលបានពិភាក្សាដោះស្រាយរួមគ្នាលើបញ្ហាដែលនៅសេសសល់កាលពីខែមុន ដោយទទួលបានលទ្ធល្អប្រសើរ ដូច្នេះសម្រាប់កិច្ចប្រជុំក្នុងខែកញ្ញាខាងមុខនេះ គឺនឹងពិភាក្សាលើការងារយុត្តិធម៌ ព្រហ្មទណ្ឌ ដើមី្បធ្វើការពង្រឹងទៅលើការអនុវត្តច្បាប់ ការផ្តល់សេវាកម្ម ដល់ជនរងគ្រោះដោយអំពើហិង្សាទាក់ទងនឹងយេនឌ័រ ព្រមទាំងពង្រឹងសមត្ថភាពក្រុមការងារនៅថ្នាក់ក្រុង ស្រុក ឃុំសង្កាត់ ពាក់ព័ន្ធនឹងការអនុវត្តតួនាទី ភារកិច្ច និង ច្បាប់ពាក់ព័ន្ធ ជាពិសេសរដ្ឋបាលក្រុង ស្រុក និង អ្នកពាក់ព័ន្ធត្រូវពិនិត្យលើបញ្ហាជនជាតិឥណ្ឌា ដែលប្រកបអាជីវកម្ម ដើររាប់លុយពីប្រជាពលរដ្ឋ ឬ ហៅថាការចង់ការប្រាក់ នៅតាមមូលដ្ឋាន ៕
អត្ថបទ ៖ លោក លីវ សាន្ត
រូបថត ៖ លោក ធន់ ពូថេ
