លោក ថុំ បណ្តូល អនុប្រធាននាយកដ្ឋានគ្រប់គ្រងទិន្នន័យនិងបញ្ជីបោះឆ្នោត បានបង្ហាញឲ្យដឹងថា គណៈកម្មាធិការជាតិរៀបចំការបោះឆ្នោត ដែលហៅកាត់ថា គ.ជ.ប ដាក់ឲ្យដំណើរការជាលើកដំបូង នូវប្រព័ន្ធផ្លាស់ប្តូរឯកសារចុះឈ្មោះបោះឆ្នោតពីចម្ងាយ(អនឡាញ) សម្រាប់ការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០២០ ដែលប្រព័ន្ធផ្លាស់ប្តូរឯកសារនេះ ដំណើរការតាមគេហទំព័រ Voterlist.nec.gov.kh ចាប់ពីថ្ងៃទី២៨ ខែសីហា ដល់ថ្ងៃទី១៩ ខែតុលា ឆ្នាំ២០២០ ។
លោក ថុំ បណ្តូល បានបញ្ជាក់ទៀតថា ការប្រើប្រាស់ប្រព័ន្ធថ្មីនេះ គឺដើម្បីបង្កលក្ខណៈងាយស្រួលឲ្យអ្នកមានឈ្មោះក្នុងបញ្ជីបោះឆ្នោតចុងក្រោយឆ្នាំ២០១៩ ដែលបានប្រើប្រាស់ឯកសារចុះឈ្មោះបោះឆ្នោត ដូចជាអត្តសញ្ញាណសញ្ជាតិខ្មែរប្រភេទ១ , ប្រភេទ២អស់សុពលភាព ឬបានប្រើប្រាស់ត្រឹមតែឯកសារបញ្ជាក់អត្តសញ្ញាណនោះ បានផ្លាស់ប្តូរឯកសារចុះឈ្មោះរបស់ខ្លួនតាមអត្តសញ្ញាណបណ្ណសញ្ញាតិខ្មែរប្រភេទថ្មីវិញ សំដៅធ្វើឲ្យបញ្ជីឈ្មោះបោះឆ្នោតកាន់តែច្បាស់លាស់ពេញលេញ និងមានបច្ចុប្បន្នភាព ។
លោក ថុំ បណ្តូល មានប្រសាសន៍យ៉ាងដូច្នេះក្នុងឱកាសបើកវគ្គបណ្តុះបណ្តាល ដល់មន្រ្តីលេខាធិការដ្ឋានរៀបចំការបោះឆ្នោតខេត្តសៀមរាប និងភាគីពាក់ព័ន្ធ នាព្រឹកថ្ងៃទី២៨ ខែសីហា ឆ្នាំ២០២០ ស្តីពីការពិនិត្យបញ្ជីឈ្មោះនិងការចុះឈ្មោះបោះឆ្នោតឆ្នាំ២០២០ ដែលមានរយៈពេល២ថ្ងៃ គឺនៅថ្ងៃទី២៨-២៩ ខែសីហា ឆ្នាំ២០២០ ដោយមានការចូលរួមពីតំណាងក្រុមប្រឹក្សាខេត្ត គណៈអភិបាលខេត្ត សមត្ថកិច្ចទាំង៣ប្រភេទ តំណាងគណបក្សនយោបាយនានា អង្គការក្រៅរដ្ឋាភិបាល និងមន្រ្តីលេខាធិការដ្ឋានរៀបចំការបោះឆ្នោតខេត្តសៀមរាប សរុបជិត ៦០នាក់ ។
លោក អ៊ាម ស៊ីណា អនុប្រធានលេខាធិការដ្ឋានរៀបចំការបោះឆ្នោតខេត្តសៀមរាប បានឲ្យដឹងថា ការពិនិត្យបញ្ជីឈ្មោះ និងការចុះឈ្មោះបោះឆ្នោតនឹងចាប់ផ្តើមពីថ្ងៃទី០១ រហូតដល់ថ្ងៃទី១៩ ខែតុលា ឆ្នាំ២០២០ ចំពោះអ្នកដែលមានអាយុ១៨ឆ្នាំឡើង ដោយត្រូវប្រើអត្តសញ្ញាណប័ណ្ណសញ្ជាតិខ្មែរប្រភេទថ្មី ហើយមេភូមិនឹងចុះចែកលិខិតអញ្ជើញដល់អ្នកដែលមានឈ្មោះក្នុងបញ្ជីបោះឆ្នោតផ្លូវការឆ្នាំ២០១៩ សម្រាប់ការពិនិត្យបញ្ជីឈ្មោះនិងចុះឈ្មោះបោះឆ្នោតឆ្នាំ២០២០ ចាប់ពីថ្ងៃទី០១ ដល់ថ្ងៃទី៣០ ខែកញ្ញា ឆ្នាំ២០២០ និងបន្តផ្តល់លិខិតអញ្ជើញឲ្យទៅសាលាឃុំ-សង្កាត់ ចាប់ពីថ្ងៃទី០១ ដល់ថ្ងៃទី១៩ ខែតុលា ឆ្នាំ២០២០ ដើម្បីឲ្យអ្នកដែលបានយកអត្តសញ្ញាណប័ណ្ណសញ្ជាតិខ្មែរប្រភេទចាស់ ឬឯកសារសំអាងទៅចុះឈ្មោះបោះឆ្នោតកាលពីឆ្នាំមុនៗកន្លងទៅ មកធ្វើការកែតម្រូវឡើងវិញតាមអត្តសញ្ញាណប័ណ្ណប្រភេទថ្មី ក្នុងអំឡុងពេលនៃការពិនិត្យបញ្ជីឈ្មោះ និងចុះឈ្មោះបោះឆ្នោតឆ្នាំ២០២០ ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
