សម្តេចកិត្តិព្រឹទ្ធបណ្ឌិត ប្រធានកាកបាទក្រហមកម្ពុជា ផ្ញើជូននូវការកោតសរសើរចំពោះបេសកកម្មរបស់មន្ទីរពេទ្យកុមារអង្គរខេត្តសៀមរាប ថាបានបំពេញការងារមនុស្សធម៌ លើការផ្តល់សេវាដោយឥតគិតថ្លៃ ក្នុងការធ្វើឲ្យប្រសើរឡើង នូវការគាំពារសុខភាពកុមារកម្ពុជា !
គឺជាទឹកចិត្តដ៏សប្បុរស ថវិកាចំនួន២ម៉ឺនដុល្លាអាមេរិក នៃសម្តេចកិត្តិព្រឹទ្ធបណ្ឌិត ប៊ុនរ៉ានី-ហ៊ុនសែន ប្រធានកាកបាទក្រហមកម្ពុជា បាននាំយកទៅឧបត្ថម្ភជូនដល់មន្ទីរពេទ្យកុមារអង្គរខេត្តសៀមរាប នារសៀលថ្ងៃទី២៩ ខែសីហា ឆ្នាំ២០២០នេះ តាមរយ:នៃការអញ្ជើញផ្ទាល់ជាតំណាងដ៏ខ្ពង់ខ្ពស់ ដោយលោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រមកម្ពុជា និងសហការី ព្រមទាំងមានវត្តមាន លោកជំទាវ ទាងអេង-ទៀសីហា អនុប្រធានគណ:កម្មាធិការសាខាកាកបាទក្រហមកម្ពុជាខេត្តសៀមរាប ។
នេះមិនមែនជាលើកដំបូងនោះទេ ដែលសម្តេចកិត្តិព្រឹទ្ធបណ្ឌិតប្រធាន បានយកចិត្តទុកដាក់ជួយឧបត្ថម្ភជាថវិកាដល់កិច្ចដំណើរការរបស់មន្ទីរពេទ្យពេទ្យកុមារមួយនេះ ក្នុងតម្លៃនៃការគាំទ្រ និងរួមចំណែកដល់ការទ្រទ្រង់សុខុមាលភាពកុមារកម្ពុជា។ លោកជំទាវ ម៉ែន នារីសោភ័គ មានប្រសាសន៍ឲ្យដឹងយ៉ាងដូច្នេះ ក្នុងឱកាសប្រគល់ជូនថវិកាអំណោយសប្បុរសធម៌នោះ និងបានជួបសំណេះសំណាលជាមួយថ្នាក់ដឹកនាំ និងបុគ្គលិកពេទ្យ ដោយភ្ជាប់ជាមួយនូវការកោតសរសើរចំពោះបេសកកម្មមនុស្សធម៌ ពិនិត្យ-ព្យាបាល និងថែទាំជំងឺកុមារដោយឥតគិតថ្លៃ អស់រយ:ពេលជាង២០ឆ្នាំកន្លងមកនេះ ដែលបេសកកម្មនោះ អាចនិយាយបានថា ជាការជួយសម្រាលបន្ទុកយ៉ាងច្រើនរបស់រាជរដ្ឋាភិបាល លើសពីនោះតម្លៃ ដែលមិនអាចកាត់ថ្លៃបាននោះ គឺជាការជួយសង្គ្រោះជីវិតកុមារកម្ពុជា ចេញពីការគំរាមកំហែងនៃជំងឺផ្សេងៗផងដែរ ។
លោកស្រី Claudia Turner នាយិកាប្រតិបត្តិ នៃមន្ទីរពេទ្យកុមារអង្គរ បង្ហាញជូនថា មន្ទីរពេទ្យនេះ គឺជាអង្គភាពក្រៅរដ្ឋាភិបាលមិនរកប្រាក់ចំណេញ បង្កើតឡើងនៅក្នុងឆ្នាំ១៩៩៩ ដោយអ្នកថតរូបមួយរូប ជាជនជាតិជប៉ុន ( លោក ខេនរ៉ូ អុីស៊ុ ) ។ ជាមធ្យមក្នុង១ថ្ងៃៗ មានកុមារជាង៥០០នាក់ មកទទួលយកសេវាសុខភាព។ ២១ឆ្នាំកន្លងមកនេះ មន្ទីរពេទ្យបានផ្តល់ការពិនិត្យព្យាបាលជំងឺ និងថែទាំកុមារកម្ពុជាបានជាង២លាន៥សែនករណី ប្រកបដោយគុណភាព និងឥតគិតថ្លៃ។ សេវាសុខាភិបាល ឥតគិតថ្លៃ សម្រាប់ទារក និងកុមារទាំងនោះរួមមាន ការពិគ្រោះពិនិត្យជំងឺក្រៅ ការថែទាំសុខភាព ការសម្រាកព្យាបាល សេវាសង្គ្រោះបន្ទាន់ ការថែទាំជំងឺធ្ងន់ធ្ងរ សេវាថែទាំសុខភាពមាត់ធ្មេញ ការព្យាបាលភ្នែក វះកាត់តូចធំ ថែទាំជំងឺរ៉ាំរ៉ៃដូចជា អេដស៍ មហារីក ជំងឺបេះដូង ប្រព័ន្ធប្រសាទ ជាដើម។
ដើម្បីទទួលបានលទ្ធផលទាំងនេះ ក្នុង១ឆ្នាំៗ មន្ទីរពេទ្យមានតម្រូវការថវិកាប្រមាណជា ៦លាន ៥សែនដុល្លា ដែលបានមកពីការចូលរួមដោយសប្បុរសជនក្នុង និងក្រៅប្រទេស។ បេសកកម្មរបស់មន្ទីរពេទ្យនេះ គឺធ្វើឲ្យប្រសើរឡើង នូវការគាំពារសុខភាពសម្រាប់កុមារកម្ពុជាគ្រប់រូប បើទោះជាពួកគេរស់នៅទីណា នៅកន្លែងណា មិនមានលុយកាក់ក៏ដោយ ៕
អត្ថបទ និងរូបភាព: លោក ងិន គឹមឡេង
កែសម្រួលដោយ លីវ សុខុន
