អាជ្ញាធរជាតិអប្សរា បានបញ្ចប់គម្រោងការជួសជុលជញ្ជាំង កំផែងក្រុងអង្គរធំ ដំណាក់កាលទី៣ជាស្ថាពរ ដោយទទួលបានជំនួយថវិកាពីរាជរដ្ឋាភិបាលកម្ពុជា នេះបើតាមប្រសាសន៍របស់លោក ម៉ៅ សុខនី អ្នកគ្រប់គ្រងគម្រោងការដ្ឋានជួសជុលកំផែងក្រុងអង្គរធំ នៃអាជ្ញាធរជាតិអប្សរា នៅថ្ងៃទី២៨ ខែសីហា ឆ្នាំ២០២០។
អ្នកគ្រប់គ្រងគម្រោងការដ្ឋាន ជាជនជាតិខ្មែររូបនេះ បញ្ជាក់ថា ទោះបីគម្រោងការជួសជុលជញ្ជាំង កំផែងក្រុងអង្គរធំ ដំណាក់កាលទី៣ បានបញ្ចប់ទៅហើយក្ដី ក៏រាជរដ្ឋាភិបាលកម្ពុជា បានយកចិត្តទុកដាក់ខ្ពស់ ក្នុងអភិរក្ស ថែរក្សា និងជួសជុល ចំពោះសំណង់បុរាណ ដែលជាសម្បត្តិវប្បធម៌ជាតិ ដែលមិនអាចកាត់ថ្លៃបានបន្តទៀតផងដែរ។ ជាក់ស្ដែង គម្រោងការជួសជុលជញ្ជាំង កំផែងក្រុងអង្គរធំ ដំណាក់កាលទី៤ នឹងបន្តអនុវត្តន៍នៅឆ្នាំក្រោយ ក្រោមជំនួយថវិការាជរដ្ឋាភិបាលកម្ពុជា។
អ្នកជំនាញរូបនេះ បញ្ជាក់បន្ថែមថា ជញ្ជាំងក្រុងអង្គរធំនេះ មានការខូចខាតសរុបចំនួន ២២កន្លែង បច្ចុប្បន្នក្រុមការងារជំនាញនៃ អាជ្ញាធរជាតិអប្សរាជួសជុលរួចរាល់ជាស្ថាពរទើបតែបាន៣កន្លែងប៉ុណ្ណោះ។
គួររំលឹកថា ជញ្ជាំងកំផែងក្រុងអង្គរធំតភ្ជាប់គ្នា ដោយមានក្លោងទ្វារចំនួន៥ ហើយគម្រោងជួសជុលជញ្ជាំងកំផែង ក្រុងអង្គរធំ បានចាប់ផ្ដើមតាំងពីឆ្នាំ២០១៣ ដល់ឆ្នាំ២០១៦ ក្នុងដំណាក់កាលទី១ ហើយដំណាក់កាលទី២នៅឆ្នាំ២០១៩ និងដំណាក់កាលទី៣បានរួចរាល់ហើយ ។ ដំណាក់កាលទីមួយ និងទីនៅក្លោងទ្វារទន្លេរអុំ និងដំណាក់កាលទី៣នេះ នៅខាងកើតក្លោងទ្វារដៃឆ្នាំង ដែលសរុបទាំងបីលើកមានចំនួនប្រវែង១៣៦ម៉ែត្រ។លោកបានបន្ថែមថា ជញ្ជាំងកំផែងក្រុងអង្គរធំនេះ បានរងការបែកបាក់ និងមានបញ្ហាប្រឈមខ្លាំង ដោយសារកត្ដាច្រើនយ៉ាងដូចជា ថ្មពុកផុយដោយសារអាយុវកាល ដួលបាក់រលំថ្មដោយសារដើមឈើដុះពីលើហើយចាក់ឬសចូលដែលថ្មជគាំទ្របាន ខណៈជញ្ជាំងកំផែងនេះមានអាយុកាលជិត១ពាន់ឆ្នាំ៕
អត្ថបទ និង រូបថត ៖ លោក បូ សាវី
កែសម្រួលអត្ថបទ ៖ លោក សេង ផល្លី
