មុនការផ្ទុះឡើងនៃជំងឺកូវីដ១៩ ប្រជាជនកូវ៉េខាងត្បូង ស្នាក់នៅក្នុងខេត្តសៀមរាប មានប្រមាណជាង១៣០០នាក់ ភាគច្រើនពួកគេជា ផ្ដល់សេវា និង បម្រើការក្នុងវិស័យទេសចរណ៍ ក្នុងប្រទេសកម្ពុជា ជាពិសេសក្នុងខេត្តសៀមរាប បច្ចុប្បន្ន ពួកគេស្នាក់នៅក្នុងខេត្តត្រឹមតែចន្លោះ៣០០ ទៅ៤០០នាក់ប៉ុណ្ណោះ ដោយសារពួកគេពុំមានការងារធ្វើ នេះបើតាមការឲ្យដឹងពី លោក ផាក វ៉ូ ស៊ុក ប្រធានសមាគមកូរ៉េប្រចាំខេត្តសៀមរាប នៅថ្ងៃទី២៦ ខែសីហា ឆ្នាំ២០២០។
តាមរយៈរបាយការណ៍ របស់ក្រសួងទេសចរណ៍ បង្ហាញថា នៅឆ្នាំ២០១៨ ភ្ញៀវទេសចរកូរ៉េខាងត្បូង មានចំនួនជាង៣០ម៉ឺននាក់ ដោយឡែកនៅ៤ខែដើមឆ្នាំ២០២០ ទេសចរបរទេស មានត្រឹមតែជាង ១.១លាននាក់ប៉ុណ្ណោះ។
តាមរយៈអ្នកបកប្រែ ប្រធានសមាគមកូរ៉េប្រចាំខេត្តសៀមរាបរូបនេះ បញ្ជាក់ថា នៅទូទាំងប្រទេសកម្ពុជាប្រជាជនកូរ៉េមានចំនួនជាង១៣០០០នាក់ សម្រាប់ខេត្តសៀមរាប មានជនជាតិកូរ៉េ សរុបចន្លោះពី៣០០ទៅ៤០០នាក់ ក្នុងនោះ ជនជាតិកូរ៉េ បានរៀបការជាមួយជនជាតិខ្មែរប្រហែល៥០នាក់។
ទោះបីស្ថិតក្នុងស្ថានភាពនៃវិបត្តិជាសកលនៃជំងឺកូវីដ១៩ ក្រុមហ៊ុនទេសចរកូរ៉េក្នុងខេត្តសៀមរាប រំពឹងថា កំណើនភ្ញៀវទេសចរបរទេសនឹងមានការកើនឡើងវិញ បន្ទាប់ពីវិបត្តិនេះមានភាពធូរស្រាល ឬបញ្ចប់ទាំងស្រុង។ តែចំពោះមុខ ការផ្ដល់ជំនួយសប្បុរសធម៌ គឺជាផ្នែកមួយ ដែលសមាគមកូរ៉េប្រចាំខេត្តសៀមរាប តែងតែបានស្វែងរកអង្គការដៃគូ ដើម្បីជួយឧបត្ថម្ភទៅដល់អ្នក ដែលបានជួបផលប៉ះពាល់នៃវិបត្តិនេះ។ ទន្ទឹមនោះ អង្គការសារាំងបាត់ ដែលមានទីស្នាក់ការកណ្ដាលនៅប្រទេសកូរ៉េខាងត្បូង បានចូលរួមជាលើកដំបូង ជាមួយសមាគមកូរ៉េប្រចាំខេត្តសៀមរាប សម្រាប់ជាការរំលែកនូវការលំបាកមួយរយៈពេល ដល់ប្រជាពលរដ្ឋខ្មែរ និងកូរ៉េក្នុងខេត្តសៀមរាប។
លោកស្រីតំណាងអង្គការសារាំងបាត់ប្រចាំខេត្តសៀមរាប តាមរយៈអ្នកបកប្រែ បង្ហាញថា សម្រាប់ខេត្តសៀមរាប អង្គការរបស់លោកស្រី នាពេលកន្លងមកបានចូលរួមការងារមនុស្សធម៌ ការងារសង្គមជាច្រើននៅតាមសហគមន៍ជាមួយអាជ្ញាធរខេត្ត ។
គួរជម្រាបថា អំណោយឧបត្ថម្ភដោយ អង្គការសារាំងបាត់ និងអនុវត្តន៍ដោយ សមាគមកូរ៉េប្រចាំខេត្តសៀមរាប ផ្ដល់ជូនប្រជាពលរដ្ឋកូរ៉េ និងប្រជាពលរដ្ឋខ្មែររៀបការជាមួយជនជាតិកូរ៉េ ចំនួន ១៥០គ្រួសារ ដោយមួយគ្រួសារទទួលបាន អំណោយមួយកេស រួមមាន គ្រឿងឧបភោគបរិភោគ និងសម្ភារៈប្រើប្រាស់ប្រចាំថ្ងៃ។
អត្ថបទ និង រូបថត ៖ លោក សេង ផល្លី
