នៅព្រឹកថ្ងៃទី២៥ ខែសីហា ឆ្នាំ២០២០នេះ គណៈកម្មាធិការបច្ចេកទេសរបស់ក្រុមប្រឹក្សាខេត្តសៀមរាប
នៅក្នុងកិច្ចប្រជុំរបស់ខ្លួន ក្រោមការដឹកនាំរបស់លោក ង៉ាន់ ភិរុណ អភិបាលរងខេត្តសៀមរាប ដោយមានការចូលរួមពីសំណាក់ឯកឧត្ដម លោក លោកស្រី ជាសមាជិកក្រុមប្រឹក្សាខេត្ត ថ្នាក់ដឹកនាំមន្ទីរ អង្គភាពនានាក្នុងខេត្ត អាជ្ញាធរជាតិអប្សរា និងអាជ្ញាធរក្រុង-ស្រុកទាំងអស់ក្នុងខេត្ត ដើម្បីត្រួតពិនិត្យ និង ស្វែងរកដំណោះស្រាយ ទៅលើសំណួរនិងសំណូមពររបស់ប្រជាពលរដ្ឋ ដែលបានលើកឡើងនៅក្នុងវេទិកាផ្សព្វផ្សាយនិងពិគ្រោះយោបល់របស់ក្រុមប្រឹក្សាខេត្តសៀមរាបអណត្តិទី៣ ឆ្នាំ២០១៩ មានចំនួន៣០៧សំណួរ-សំណូមពរ និងត្រូវបានអនុម័តកិច្ចដោយកិច្ចប្រជុំសាមញ្ញលើកទី៩ របស់ក្រុមប្រឹក្សាខេត្ត កាលពីថ្ងៃទី១១ ខែកុម្ភៈ ឆ្នាំ២០២០កន្លងទៅ ខណៈដែលសំណួរ-សំណូមពរ ចំនួន៨៥ ត្រូវបានដោះស្រាយរួចហើយនោះ ។
លោក ង៉ាន់ ភិរុណ អភិបាលរងខេត្តសៀមរាប មានប្រសាសន៍ថា៖ កិច្ចប្រជុំនេះ មានរបៀបវារៈសំខាន់ គឺដើម្បីពិនិត្យ និងធ្វើបច្ចុប្បន្នភាពនៃដំណោះស្រាយសំណួរ-សំណូមពរដែលនៅសេសសល់ទាំងនោះ ក្នុងនោះគ្រោងនឹងពិភាក្សាដោះស្រាយលើចំនួន៦៤សំណួរ-សំណូមពរ ដើម្បីលុបចេញពីបញ្ចីសេសសល់ និងតាមដានលើ៨០សំណួរសំណូមពរបន្ថែមទៀត ដូច្នេះអាចនិយាយបានថា ការធ្វើបច្ចុប្បន្នភាពនៃដំណោះស្រាយតាមរយៈនៃកិច្ចប្រជុំនេះ សំណួរ-សំណូមពរសរុបចំនួន៣០៧ គឺនៅសល់តែ៧៨ប៉ុណ្ណោះ សម្រាប់កិច្ចប្រជុំលើកក្រោយរបស់គណៈកម្មាធិការបច្ចេកទេសក្រុមប្រឹក្សាខេត្តសៀមរាប។
គួររំលឹកថា កិច្ចប្រជុំនេះបានបង្ហាញអំពីការទទួលខុសត្រូវខ្ពស់ តាមរយៈនៃជម្រើសជាអាទិភាពដែលត្រូវបានលើកយកមកពិភាក្សាធ្វើដំណោះស្រាយ ក្នុងនោះគឺទី១ ទាក់ទងទៅនឹងការដោះស្រាយកង្វល់របស់ប្រជាពលរដ្ឋ និង ទី២ គឺការផ្តោតទៅលើដំណោះស្រាយណា ដែលមានឧត្តមភាពលើការងារអភិវឌ្ឍន៍មូលដ្ឋាន ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
