នៅព្រឹកថ្ងៃទី២៥ ខែសីហា ឆ្នាំ២០២០ មន្ទីរវប្បធម៌ និងវិចិត្រសិល្ប:ខេត្តសៀមរាប បានបើកវគ្គបណ្តុះបណ្តាលពង្រឹងសមត្ថភាព និងក្បួនខ្នាតល្ខោនបាសាក់មហាជន នៅសាលាវិចិត្រសិល្ប:ភូមិភាគខេត្តសៀមរាប ដែលមានរយ:ពេល៣ថ្ងៃ គឺចាប់ពីថ្ងៃទី២៤ដល់ថ្ងៃទី២៦ ខែសីហា ឆ្នាំ២០២០នេះ ជូនដល់ប្រធានក្រុមសិល្ប:ចំនួន ១០នាក់ ដែលមកពីភូមិចំនួន១០ ក្នុងស្រុកនានានៃខេត្តសៀមរាប ដោយមានគ្រូបង្គោល និងមន្ត្រីបុគ្គលិក សិល្បករ សិល្បការិនីប្រមាណជាង១០០នាក់បានចូលរួមផងដែរ ។
លោក មួន សុភាព ប្រធានប្រធានមន្ទីរវប្បធម៌ និងវិចិត្រសិល្ប:ខេត្តសៀមរាប បានបង្ហាញថា នៅខេត្តផ្សេងៗទៀត មិនមានឱកាសច្រើនសម្រាប់សិក្សារៀនសូត្របន្ថែមដូចសិល្បករ សិល្បការិនីនៅខេត្តសៀមរាបនោះឡើយ ដោយសារខេត្តទាំងនោះពុំសូវមានកម្មវិធីច្រើនដូចនៅខេត្តសៀមរាប ដូច្នេះហើយទើបលោកជំទាវរដ្ឋមន្ត្រីក្រសួងវប្បធម៌ និងវិចិត្រសិល្ប: បានយកចិត្តទុកដាក់យ៉ាងខ្លាំង និង ជំរុញលើកស្ទួយវិស័យសិល្ប:នៅខេត្តសៀមរាប ដោយធ្វើយ៉ាងណាឲ្យមានឱកាសដល់សិល្បករ សិល្បការិនីនៅក្នុងខេត្តនេះ ទទួលបាននូវវគ្គបណ្តុះបណ្តាលផ្នែកសិល្ប:ជារៀងរាល់ឆ្នាំ គឺក្នុងមួយឆ្នាំយ៉ាងតិចម្តងដែរ។
លោក មួន សុភាព មានប្រសាសន៍ទៀតថា គោលបំណងសំខាន់នៃវគ្គបណ្តុះបណ្តាលនេះ គឺចង់ឲ្យសិល្បករ សិល្បការិនីនៅក្នុងខេត្តទាំងអស់គ្នា បានទទួលនូវការផ្លាស់ប្តូរបទពិសោធន៍ថ្មីៗរវាងគ្នានិងគ្នា មានទំនាកទំនងគ្នាបានល្អ កាន់តែជិតស្និទ្ធថែមទៀត គឹបានចែករំលែកនៅបទពិសោធន៍ពាក់ព័ន្ធនឹងផ្នែកសិល្ប: នេះ ដើម្បីរកភាពរីកចម្រើន ខណៈដែលពីមុនមកសិល្បករ សិល្បការិនីនៅតាមស្រុកនិមួយៗ ពុំសូវបានជួបជុំប្រាស្រ័យទាក់ទងគ្នាឡើយ ។
លោក ប៉ុក ឌីរ៉ាម៉ា អនុប្រធានការិយាល័យបណ្តុះបណ្តាល នៃក្រសួងវប្បធម៌និងវិចិត្រសិល្ប: និងជាគ្រូបង្គោល បានឲ្យដឹងថា ចំពោះល្ខោនបាសាក់មហាជននេះ មិនមែនចេះតែសម្តែងលេងៗ ធ្វើឲ្យតែបានៗ ឲ្យគេមើលនោះទេ គឹវាមានក្បួនខ្នាតរបស់វាទើបអាចសម្តែងបានល្អ ហើយល្ខោនបាសាក់មហាជននេះ វាមានក្បួនខ្នាតច្រើនយ៉ាងរហូតដល់ទៅ១០ក្បួនឯណោះ ដែលនៅក្នុងពេលនេះ គឺលើកយកតែពីរបីក្បួនប៉ុណ្ណោះ ដើម្បីបង្ហាញជូនដល់ប្អូនៗប្រធានក្រុមសិល្ប:មកពីតាមបណ្តាស្រុកមួយចំនួននៅក្នុងខេត្តសៀមរាប ជារួមមាន៖ ក្បាច់សម្តែងចាប់រុយ , ក្បាច់សម្តែងទៅដើររកអុស និងក្បាច់សម្តែងហៅទូកឲ្យចម្លងជាដើម។
លោក ប៉ុក ឌីរ៉ាម៉ា បានបញ្ជាក់ទៀតថា តាមរយៈនៃវគ្គបណ្តុះបណ្តាលនេះ រំពឹងថាប្រធានក្រុមសិល្ប:មហាជនទាំងអស់ នឹងបានយល់ដឹងបន្ថែមទៀតលើក្បាច់សម្តែង ដែលជាមូលដ្ឋានធ្វើឲ្យទម្រង់ល្ខោនបាសាក់របស់យើង ទទួលបានការគាំទ្រកាន់តែច្រើនឡើងថែមទៀត ពីសំណាក់ប្រជាពលរដ្ឋខ្មែរយើង ៕
អត្ថបទ និង រូបថត ៖ លោក ស៊ាន សុផាត
កែសម្រួលអត្ថបទ ៖ លោក លីវ សាន្ត
