សៀមរាប៖ កាលពីរសៀលថ្ងៃទី១៣ ខែកញ្ញា ឆ្នាំ២០២០ ប្រជាពលរដ្ឋដែលមានជីវភាពខ្វះខាតចំនួន៤៤គ្រួសារមកពី៦ភូមិ ក្នុងឃុំបាគង ស្រុកប្រាសាទបាគង ខេត្តសៀមរាប ទទួលបានជំនួយឧបត្ថម្ភជាគ្រឿងឧបភោគបរិភោគ សម្ភារៈផ្ទះបាយ និងថវិកាមួយចំនួន ពីចៅអធិការវត្តប្រាសាទលលៃ។ ដែលពិធីនេះរៀបចំធ្វើឡើងនៅវត្តប្រាសាទលលៃ ស្ថិតក្នុងភូមិលលៃ ឃុំបាគង ស្រុកប្រាសាទបាគង ។
ប្រជាពលរដ្ឋទាំង ៤៤គ្រួសារនោះ ក្នុងមួយគ្រួសារៗទទួលបាន: អង្ករ ២៥គីឡូ, មី១៥កញ្ចប់ ចានស្រាក់១ឈុត, ធុងទឹកកក ឬបំពង់ទឹកក្តៅ១ឈុត, ឆ្នាំងខ្ទះ វែកឆា ចង្អើរ, ប៊ីចេង ១កញ្ចប់, អំបិល ១គ.ក្រ, ទឹកដោះគោ ១កំប៉ុង, ស្ករស១គ.ក្រ , ទឹកត្រី ៣ដប, ទឹកស៊ីអ៊ីវ ៣ដប និងថវិកា៤០,០០០៛។ សរុបថវិកាចំណាយ ចំនួនជាង ២,២០០ដុល្លារ ។ ថវិកាទាំងនេះបានមកពីការចូលរួមរបស់សប្បុរសជន ពុទ្ធបរិស័ទជិតឆ្ងាយនៅក្នុងប្រទេស, មួយផ្នែកទទួលបានពីសប្បុរសជនខ្មែរនៅប្រទេសអូស្ត្រាលី និងថវិកាផ្ទាល់ព្រះអង្គចៅអធិការវត្ត ដើម្បីបំពេញបន្ថែមបង្គ្រប់ឱ្យបានស្មើៗគ្នា ។
ព្រះគ្រូរតនវិសុទ្ឋិបញ្ញា មុត្ត វិបុល ព្រះចៅអធិការវត្តលលៃ មានថេរដីកាថា នេះមិនមែនជាលើកទី១ទេ ដែលព្រះអង្គបានបរិច្ចាកចែករំលែកទៅតាមលទ្ឋភាពដែលមាន ដើម្បីជួយសម្រាលទុក្ខលំបាកដល់គ្រួសារ ដែលមានជីវភាពខ្វះខាត។ ថ្វីត្បិតព្រះសង្ឃពុំមានធនធានថវិកាផ្ទាល់ខ្លួនរស់គង់នៅដោយពឹងអាស្រ័យ លើប្រជាពុទ្ឋបរិស័ទក្តី តែដោយសារមានបំណងអនុគ្រោះដល់ញាតិញោមពុទ្ឋបរិស័ទកំពុងខ្វះខាត ដើម្បីផ្សារភ្ជាប់មនោសញ្ចេតនារំលែកការលំបាករវាងព្រះសង្ឃ និងប្រជាពុទ្ឋបរិស័ទ នេះបញ្ជាក់ឱ្យឃើញពីស្មារតីរួមសាមគ្គី ជួយទុក្ខធុរៈគ្នាទៅវិញក្នុងគ្រាលំបាក ជាពិសេសក្នុងអំឡុងជំងឺឆ្លងជាសកលនៃជំងឺកូវីដ-១៩ បានបណ្តាលឱ្យគ្រួសារបងប្អូនខ្លះជួបនូវបញ្ហាជីវភាពដោយសារបាត់បង់ការងារ មិនអាចរកចំណូលប្រចាំថ្ងៃជាដើម ។
ក្នុងឱកាសនោះដែរព្រះគ្រូរតនវិសុទ្ឋិបញ្ញា មុត្ត វិបុល ក៏បានធ្វើការក្រើនរំលឹក និងអប់រំបន្ថែមដល់ប្រជាពុទ្ឋបរិស័ទ ឲ្យបានយល់ដឹង និងប្រុងប្រយ័ត្ននូវជំងឺឆ្លងកូវីដ-១៩ ដែលមិនទាន់ទៅណាឆ្ងាយនោះឡើយ។ ហេតុនេះយើងមិនត្រូវធ្វេសប្រហែសជាដាច់ខាត ត្រូវនាំគ្នាអនុវត្តឱ្យបាន តាមអនុសាសន៍របស់ប្រមុខរាជរដ្ឋាភិបាល និងការណែនាំរបស់ក្រសួងសុខាភិបាល ដើម្បីបង្កើនការបង្ការទប់ស្កាត់ ការរីករាលដាលនៃជំងឺកូវីដ១-៩ក្នុងសហគមន៍។ ត្រូវមានម៉ាស់ពាក់នៅពេលចូលទីចំណោមមនុស្សច្រើន ត្រូវលាងសំអាតដៃជាមួយសាប៊ូ ជេលឬអាល់ និងត្រូវរក្សាគម្លាតសុវត្ថិភាពសង្គមឱ្យបានត្រឹមត្រូវ ។
ថ្លែងសំណេះ សំណាលក្នុងឱកាសនោះ លោក សឹម សម្បត្តិ អធិការនៃអធិការដ្ឋានស្រុកប្រាសាទបាគង ក្នុងនាមសប្បុរសជន ដែលបានចូលរួមបរិច្ចាកថវិកាចំនួន១០០ដុល្លារក្នុងពិធីដែរនោះ បានសម្តែងនូវទឹកចិត្តកោតសរសើរព្រះចៅអធិការវត្តលលៃដែលតែងតែបានខិតខំកៀរគររកថវិកាពីសប្បុរសជនជិតឆ្ងាយយកមកជួយឧបត្ថម្ភដល់ប្រជាពលរដ្ឋនៅមូលដ្ឋាននេះជាញឹកញាប់ ទោះតិចក្តីច្រើនក្តីទៅតាមលទ្ឋភាព ។
លោកក៏បានជំរុញដល់អាជ្ញាធរភូមិឃុំ និងកម្លាំងមានសមត្ថកិច្ចក្រោមឱវាទ និងប្រជាពលរដ្ឋក្នុងមូលដ្ឋាននេះទាំងអស់ សូមចូលរួមអនុវត្តនូវគោលនយោបាយភូមិឃុំមានសុវត្ថិភាព ជាពិសេសចូលរួមទប់ស្កាត់ ការបង្រ្កាបការជួញដូរ និងប្រើប្រាស់គ្រឿងញៀន ព្រមទាំងណែនាំ និងអប់រំកូនចៅរបស់ខ្លួននៅឱ្យឆ្ងាយពីគ្រឿងញៀន ព្រោះវានាំឱ្យខូចសុខភាព និងបំផ្លាញអនាគតអ្នកប្រើប្រាស់ ដល់គ្រួសារបងប្អូនមិត្តភក្តិ និងសង្គមជាតិផងដែរ។ ត្រូវគោរពច្បាប់ចរាចរណ៍ផ្លូវគោកឱ្យបានជាប្រចាំ និងសូមខិតខំដាំដំណាំរួមផ្សំបន្ថែម និងធ្វើស្រែចំការ ដើម្បីលំនឹងជីវភាពសេដ្ឋកិច្ចគ្រួសារ។ ត្រូវថែទាំសុខភាព សំអាតបរិស្ថានជុំវិញផ្ទះ លុបបំបាត់ជម្រកមូសខ្លា បំផ្លាញចោលសំបកកំប៉ុង និងសំបកកង់ឡានចាស់ៗ ដើម្បីបំបាត់ប្រភពនៃមូសដែលនាំឱ្យកើតជំងឺគ្រុនចាញ់ គ្រុនឈាម និងគ្រុនឈិក ៕
អត្ថបទ និងរូបភាព៖ លោកយូ វង្ស
កែសម្រួល៖ លីវ សុខុន
