នាព្រឹកថ្ងៃទី១៤ ខែកញ្ញា ឆ្នាំ២០២០នេះ លោកជំទាវ មាស សន ជា ម៉ន អនុប្រធានកិត្តិយសគណៈកម្មាធិការ សាខាកាកបាទក្រហមកកម្ពុជាខេត្ត និងលោកជំទាវ ស៊ិន ណម សមាជិកាក្រុមប្រឹក្សាខេត្ត រួមជាមួយលោកជំទាវ អស់លោក លោកស្រីជាសមាជិកសមាជិកាគណៈកម្មាធិការសាខាកាកបាទក្រហមខេត្ត អស់លោក លោកស្រីជាអនុសាខាក្រុង អាជ្ញាធរសង្កាត់ បានអញ្ជើញទៅចូលរួមក្នុងពិធីកាន់វេនជាមួយបងប្អូនប្រជាពុទ្ធបរិស័ទ នៅវេនទី១២ ដោយបាននាំយកនូវទេយ្យទាន និងគ្រឿងឧបភោគ-បរិភោគ ដើម្បីវេរប្រគេនដល់ព្រះសង្ឃគង់ចាំព្រះវស្សា ក្នុងវត្តប្រាសាទគោកចក នៅសង្កាត់គោកចក ក្រុង/ខេត្តសៀមរាប ។
ក្នុងឱកាសនោះដែរ លោកជំទាវអនុប្រធានកិត្តិយសគណៈកម្មាធិការសាខា និងលោកជំទាវសមាជិកាក្រុមប្រឹក្សាខេត្ត រួមជាមួយលោកជំទាវលោកលោកស្រីជាសមាជិកសមាជិកាគណៈកម្មាធិការសាខាកាកបាទក្រហមខេត្ត បានថ្វាយភូងផ្កា បូជាទៀនធូក ចំពោះព្រះពុទ្ធរូបព្រះសម្មាសាម្ពុទ្ធ និង នមសកាព្រះរតនត្រ័យ ទៅតាមគន្លងព្រះធម៌ព្រះសម្មាសាម្ពុទ្ធរួចមក និងបានធ្វើពិធីរាប់បាត្រ បង្សុកូល ឧទ្ទិសកុសលផលបុណ្យ ជូនដល់ដួងវិញ្ញាណក្ខ័ន្តឧបការីជន មានមាតាបិតា ជីដូនជីតា និង ញាតិកាលទាំង៧សណ្តាន ដែលបានចែកឋានទៅកាន់បរលោកខាងមុខហើយនោះ ព្រមទាំងឧទ្ទិសដល់ដួងវិញ្ញាណក្ខ័ន្ត ។ ជាមួយគ្នានោះសមាជិកសមាជិកា ក៏បានធ្វើការបួងសួងឧទ្ទឹសកុសល ដល់កម្មាភិបាល យុទ្ធជន ដែលបានពលីជីវិត ក្នុងបុព្វហេតុការពារកសាង អភិវឌ្ឍន៍ជាតិមាតុភូមិកម្ពុជា សូមឲ្យមកទទួលនូវផល្លានិសង្ឃដែល ឯកឧត្តម លោកជំទាវ និង ប្រតិភូសាខាកាកបាទក្រហមខេត្ត បានឧទ្ទិសជូនតាមរយៈព្រះសង្ឃ ដែលជាស្រែបុណ្យ ក្នុងរដូវកាលបុណ្យកាន់បិណ្ឌ និង ភ្ជុំបិណ្ឌនេះ សូមឲ្យអំណាចនៃអានិសង្ឃនេះជួយទ្រទ្រង់ឲ្យវិញ្ញាណក័្ខន្តអ្នកទាំងនោះ បានទៅកាន់ទីសោយសុខឋានបរមសុខកុំបីឃ្លៀងឃ្លាតឡើយ ។
ក្រុមការងារក៏បានប្រគេននូវទ័យ្យទានដល់ព្រះសង្ឃ សម្រាប់ប្រើប្រាស់នូវគ្រឿងឧបភោគបរិភោគទាំងឡាយចំនួន ១០មុខ និង បច្ច័យ ២លាន ៩សែនរៀល សម្រាប់ព្រះសង្ឃយកទៅធ្វើការប្រើប្រាស់កសាងក្នុងទីវត្តប្រាសាទគោកចកនេះផងដែរ ៕
អត្ថបទ និង រូបភាព៖ ស៊ាន សុផាត
