បើតាមលោកវរសេនីយ៍ឯក លឹម សម្បត្តិ អធិការ នគរបាលស្រុកប្រាសាទបាគង បានឲ្យដឹងថា នៅថ្ងៃទី១៥ ខែកញ្ញា ឆ្នាំ២០២០នេះ កម្លាំងនគរបាលស្រុកប្រាសាទបាគង បានបញ្ជូនខ្លួនជនសង្ស័យម្នាក់ទៅកាន់តុលាការ ជាប់ពាលក់ព័ន្ធករណីលួចដោះក្រវិលក្មេង ក្នុងចំនុចភូមិពពេល ឃុំបល្ល័ង្ក ស្រុកប្រាសាទបាគង ខេត្តសៀមរាប ដោយជនសង្ស័យមានឈ្មោះ ភួង សុជាតិ ហៅចំបើង ភេទស្រី អាយុ២៤ឆ្នាំ រស់នៅក្នុងភូមិលលៃ ឃុំបាគង ស្រុកប្រាសាទបាគង ខេត្តសៀមរាប ។
លោកអធិការ បានបញ្ជាក់ថា មុនធ្វើការឃាត់ខ្លួនជនសង្ស័យខាង កម្លាំងសមត្ថកិច្ចបានទទួលព័ត៌មានពីប្រជាពលរដ្ឋ
ថាមានស្រ្តីម្នាក់ជិះម៉ូតូម៉ាកហុងដា សេរីឆ្នាំ២០០៥ ពណ៌ក្រហម បានមកធ្វើសកម្មភាពលួចដោះក្រវិលក្មេង ចំណុចភូមិពពេលឃុំបល្ល័ង្ក ស្រុកប្រាសាទបាគង ។ ក្រោយទទួលព័ត៌មានភ្លាមកម្លាំងនគរបាលប៉ុស្តិ៍ រដ្ឋបាលបាគង និងកម្លាំងប្រជាការពារ សហការជាមួយកម្លាំអធិការដ្ឋាននគរបាលស្រុកប្រាសាទបាគង បានធ្វើការប្រដេញ និងស្ទាក់តាមផ្លូវចាប់ឃាត់ខ្លួនបានភ្លាមៗតែម្តង ។
លោកបញ្ជាក់ថា ក្រោយឃាត់ខ្លួនជនសង្ស័យខាងលើបានសារភាពថា ខ្លួនពិតបានធ្វើសកម្មភាពលួចដោះក្រវិល ពីត្រចៀកក្មេងៗ ពិតប្រាកដមែន ហើយខ្លួនធ្លាប់ធ្វើសកម្មភាពលួចជាច្រើនលើកផងដែរ ។ បច្ចុប្បន្នជនសង្ស័យ រួមនឹង វត្ថុតាងដកហូតបានរួមមាន ម៉ូតូម៉ាកហុងដាសេរីឆ្នាំ២០០៥ លោហៈធាតុពណ៌លឿង ចំនួន២គូរទំងន់ ៥ហ៊ុន ត្រូវបានកម្លាំងនគរបាលជំនាញស្រុកប្រាសាទបាគង កសាងសំណុំរឿងបញ្ជូនទៅតុលាការដើម្បីចាត់ការតាមនិតិវិធី នៃច្បាប់ ៕
អត្ថបទ និង រូបភាព ៖ ខេង ឧត្តម
កែសម្រួល៖ អ៊ុន ណារាជ្យ
