នៅថ្ងៃទី១៥ ខែកញ្ញា ឆ្នាំ២០២០នេះ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការសុវត្ថិភាពចរាចរណ៍ផ្លូវគោក បានចេញសេចក្ដីអំពាវនាវដល់ប្រជាពលរដ្ឋ និងអ្នកបើកបរធ្វើដំណើរទៅស្រុកកំណើត ឬកម្សាន្តនៅរមណីយដ្ឋាននានា សូមចូលរួមគោរពច្បាប់ចរាចរណ៍ទាំងអស់គ្នា និងត្រួតពិនិត្យ លក្ខណៈបច្ចេកទេសយានយន្ត ឲ្យបានទៀងទាត់មុនធ្វើដំណើរ ពិសេសត្រួតពិនិត្យកង់ ចង្កូត ហ្វ្រាំង ភ្លើងបំភ្លឺ ជាដើម។
សេចក្ដីអំពាវនាវនេះធ្វើឡើង ស្របពេល នាយកដ្ឋាននគរបាលចរាចរណ៍ និងសណ្ដាប់ធ្នាប់សាធារណៈ នៃអគ្គស្នងការដ្ឋាននគរបាលជាតិ បានបង្ហាញរបាយការណ៍ពីករណីគ្រោះថ្នាក់ចរាចរណ៍នៅទូទាំងប្រទេស រយៈពេល១ថ្ងៃ គឺនៅថ្ងៃទី១៤ ខែកញ្ញាម្សិលមិញនេះ មានរហូត១៤ករណី ក្នុងនោះ ករណីស្លាប់ចំនួន៨នាក់ របួសធ្ងន់ចំនួន១៦នាក់ និងរបួសស្រាលចំនួន៤នាក់ ។
គួរបញ្ជាក់ថា តាមរបាយការណ៍ពីនាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ នៅថ្ងៃទី១៤ ខែកញ្ញា នេះដែរ ចំពោះការរឹតបន្ដឹងច្បាប់ស្ដីពីចរាចរណ៍ផ្លូវគោកនៅទូទាំងប្រទេស រយៈពេល១៤ថ្ងៃ គឺចាប់ពីថ្ងៃ០១ ដល់ថ្ងៃទី១៤ ខែកញ្ញា ឆ្នាំ២០២០ សមត្ថកិច្ច បានរកឃើញយានយន្តល្មើសច្បាប់សរុបជិត១២,០០០គ្រឿង ក្នុងនោះម៉ូតូមានចំនួនជាង ៨០០០គ្រឿង ត្រូវបានផាកពិន័យតាមអនុក្រឹត្យលេខ៣៩ អនក្រ.បក។
អត្ថបទ និង រូបភាព៖ មន្ទីរព័ត៌មានខេត្តសៀមរាប
