សៀមរាប៖ បើតាមសមត្ថកិច្ចស្រុកពួក បានឲ្យដឹងថា កាលពីវេលាម៉ោង០៧ និង៤៥នាទីថ្ងៃទី១៥ ខែកញ្ញា ឆ្នាំ២០២០នេះ មានករណីគ្រោះថ្នាក់ចរាចរណ៍មួយបានកើតឡើង នៅចំនុចផ្លូវជាតិលេខ៦ ស្ថិតក្នុងភូមិកិត្តិយស ឃុំព្រៃជ្រូក ស្រុកពួក ខេត្តសៀមរាបនៅ ដែលបង្កឡើងដោយរថយន្ដសាំងយ៉ុងដឹកអ្នកដំណើរមួយគ្រឿង ពាក់ស្លាកលេខ ២M-៤៤០៦ បើកបរពីទិសខាងពីកើតទៅទិសខាងលិច លុះមកដល់កន្លែងកើតហេតុ ក៏បានរ៉េចង្កូតទៅបុករ៉ឺម៉កកង់បីកែឆ្នៃ ដែលឈប់ចតស្របទិសគ្នា បណ្ដាលឲ្យរថយន្តក្រឡាប់ធ្លាក់ផ្លូវ ទៅទិសខាងត្បូងផ្លូវជាតិ រីឯរ៉ឺម៉កធ្លាក់ផ្លូវទៅទិសខាងជើង ។
សមត្ថកិច្ច បានឲ្យដឹងទៀតថា ក្នុងករណីគ្រោះថ្នាក់ចរាចរណ៍នេះដែរ បានបណ្ដាលឲ្យមនុស្សស្លាប់ម្នាក់ និងរងរបួសធ្ងន់ស្រាល ១៥នាក់ ហើយមូលហេតុដែលបណ្ដាលឲ្យមានគ្រោះថ្នាក់ចរាចរណ៍នេះ គឺដោយសារដោយតៃកុងឡានងងុយដេក អ្នកបើកបររថយន្ត បើកបរក្នុងស្ថានភាពងងុយដេក ។ ក្រោយកើតហេតុកម្លាំងជំនាញ ក៏បានចុះវាស់វែង ដើម្បីកសាងសំណុំរឿង និងដកហូតវត្ថុតាងពាក់ព័ន្ធរក្សាទុក នៅអធិការដ្ឋាននគរបាលស្រុកដើម្បីដោះស្រាយនៅពេលក្រោយ ។ ចំនែកសាកសពជនរងគ្រោះត្រូវបានប្រគល់ជូនក្រុមគ្រួសារ យកទៅធ្វើបុណ្យតាមប្រពៃណី រីឯអ្នករងរបួសកំពុងសង្គ្រោះនៅមន្ទីរពេទ្យ ៕
អត្ថបទ និង រូបភាព៖ ខេង ឧត្តម
កែសម្រួល៖ អ៊ុន ណារាជ្យ
