លោក ព្រឿង សុខា ជាមន្ដ្រីនាយកដ្ឋានសណ្ដាប់ធ្នាប់និងសហប្រតិបត្ដិការនៃអាជ្ញាធរជាតិអប្សរា ជាអ្នកមើលការខុសត្រូវនៅប្រាសាទអង្គរវត្ដ និងភ្នំបាខែង បានដឹងនៅល្ងាចថ្ងៃទី២០ ខែកញ្ញានេះថា ចាប់ពីថ្ងៃទី១៦ដល់ថ្ងៃទី២០ខែកញ្ញា ឆ្នាំ២០២០នេះ ដែលជាឱកាសក្នុងពិធីភ្ជុំបិណ្ឌនេះ មានភ្ញៀវទេសចរជាច្រើនបានដើរកំសាន្ដនៅក្នុងតំបន់អង្គរ ដូចកាលពីថ្ងៃឈប់សម្រាកចូលឆ្នាំដែរ ប៉ុន្ដែពួកគាត់បានចូលរួមជាច្រើនក្នុងការរក្សាសណ្ដាប់ធ្នាប់ដោយមធ្យោបាយធ្វើដំណើរនិយមួយៗបានចូលចតនៅក្នុងចំណតត្រឹមត្រូវ ដោយគ្រាន់តែមន្ដ្រីសណ្ដាប់ធ្នាប់ណែនំាពួកគាត់បន្ដិចបន្ទួចប៉ុណ្ណោះ ។ ជាមួយគ្នានោះ ការរក្សានូវបរិស្ថានអនាម័យក៍ភ្ញៀវទេសចររក្សាបានល្អប្រសើរដែរ ដូចជាការមិនចោលសំរាមអនាធិបតេយ្យ ការហូបអាហារ គ្រៀងស្រឹវឹងនៅតាមកសិន្ធុអង្គរនិងមិនចាក់ធុងបាស់ឮកងរំពងដែលបង្ហាញថា ភ្ញៀវទេសចរបានលើកស្ទួយវប្បធម៌របស់ខ្មែរបានល្អប្រសើរ បើធៀបនឹងឆ្នាំមុនៗ ។
លោក ព្រឿង សុខា បានឲ្យដឹងទៀតថា កាលពីមុនឆ្នាំ២០២០នេះ ភ្ញៀវទេសចរទៅទស្សនារមណីយដ្ឋានអង្គរពិបាកណែនាំ និងខ្វះការយល់ដឹងច្រើន ប៉ុន្ដែចាប់ពីខាងមុខប្រាសាទអង្គរវត្ដមានទីធ្លាស្អាត គ្មានអ្នកលក់ដូរអនាធិបតេយ្យ ភ្ញៀវទេសចរឃើញស្អាតក៍មិហ៊ានចោលសមំរាមនិងចតយានយន្ដរញ៉ែរញ៉ាយដែរ។លោកសម្ដែងមោទភាពនៅពេលឃើញភ្ញៀវទេសចររក្សាបាននូវសណ្ដាប់ធ្នាប់ល្អ និងបរិស្ថានអនាម័យស្អាតនៅក្នុងតំបន់អង្គរនេះ។
លោកបានបញ្ជាក់ទៀតថា ទីធ្លានៅខាងមុខអង្គរវត្ដបាននឹងកំពុងអភិវឌ្ឍន៍អោយទេសភាពពណ៌បៃតងគ្រប់រដូវកាលចាប់ពីឆ្នាំ២០២១ទៅ ខណៈដែលបច្ចុប្បន្ននេះ កំពុងអនុវត្ដជិតរួចរាល់ហើយ។ជាមួយគ្នានោះដែរ អាជ្ញាធរអប្សរា បានមមាញឹកក្នុងការ រៀបចំបរិស្ថាន និងការកែលម្អសណ្តាប់ធ្នាប់ឱ្យកាន់តែប្រសើរឡើងក្នុងតំបន់អង្គរ។ ការថែរក្សាបេតិកភណ្ឌ និងថែរក្សាបរិស្ថាននៅតំបន់ឧទ្យានអង្គរទាំងមូលសំខាន់ណាស់ដែលអាជ្ញាធរជាតិអប្សរា ភាគីពាក់ព័ន្ធទាំងអស់បានខិតខំកន្លងមកឱ្យរីកចម្រើនគ្រប់វិស័យ ក្នុងការទាក់ទាញភ្ញៀវទេសចរឱ្យកើនឡើងជាលំដាប់។ ក្នុងនោះដែរការអភិវឌ្ឍនិងអភិរក្សនៅតំបន់រមណីយដ្ឋានអង្គរ ត្រូវមានការចូលរួមពីភ្ញៀវទេសចរ អ្នកលក់ដូរ ក៍ដូចប្រជាពលរដ្ឋផងដែរ ព្រោះប្រាសាទអង្គរវត្ដជារបស់មនុស្សជាតិគ្រប់រូប ៕
អត្ថបទ និង រូបភាព៖ ឈិត សាវី
