រយៈពេល២ថ្ងៃចុងក្រោយ គឺថ្ងៃទី១៦ និងទី១៧ ខែកញ្ញា នៃពិធីបុណ្យភ្ជុំបិណ្ឌ ឆ្នាំ២០២០នេះ ខេត្តសៀមរាប ទទួលបានភ្ញៀវទេសចរជាតិសរុប ៦ ៧,០០០នាក់ ក្នុងនោះភ្ញៀវទេសចរ ជិត៣ម៉ឺននាក់ បានធ្វើដំណើរទៅកម្សាន្តនៅតំបន់រមណីយដ្ឋានធម្មជាតិនានា និងភ្ញៀវទេសចរប្រមាណ ៤ម៉ឺននាក់ទៀត បានទៅទស្សនាប្រាសាទបុរាណ នេះបើតាមរបាយការណ៍របស់មន្ទីរទេសចរណ៍ខេត្តសៀមរាប កាលពីយប់ថ្ងៃទី១៧ ខែកញ្ញា ឆ្នាំ២០២០។
ក្រៅពីភ្ញៀវទេសចរជាតិជិតប្រាំពីរម៉ឺននាក់ របាយការណ៍នេះ ក៏បានបង្ហាញដែរថា ចំនួនភ្ញៀវទេសចរអន្តរជាតិមកទស្សនាតំបន់ទេសចរណ៍នានាក្នុងខេត្ត មានចំនួនជាងមួយពាន់នាក់។ ប៉ុន្តែ លោក ងូវ សេងកាក់ ប្រធានមន្ទីរទេសចរណ៍ខេត្តសៀមរាប លើកឡើងថា ចំនួនភ្ញៀវទេសចរនេះ នៅតែមានការធ្លាក់ចុះនៅឡើយ ដោយសារតែវិបត្តិនៃជំងឺកូវីដ១៩។
តាមការលើកឡើង របស់អ្នកទេសចរមកពីខេត្តបាត់ដំបង និងបន្ទាយមានជ័យ ដែលបានមកកម្សាន្តនៅរមណីយដ្ឋានបារាយណ៍ទឹកថ្លា បង្ហាញថា ពួកគាត់ មានអារម្មណ៍ថារីករាយស្រស់ថ្លា នៅពេលដែលបានមកលេងនៅតំបន់រមណីយដ្ឋានធម្មជាតិក្នុងខេត្តសៀមរាប និងមានអារម្មណ៍ប្លែកភ្នែក ចំពោះការអភិវឌ្ឍក្នុងខេត្តសៀមរាប។
((សំឡេងសម្ភាសន៍))
អត្ថបទ និង រូបភាព៖ ងិន គឹមឡេង
កែសម្រួល៖ សេង ផល្លី
